Pagpangita sa mga Interesado Paagi sa Epektibo nga Pagpanaksi sa Dalan
1 Ginsugo ni Jesus ang iya mga disipulo nga pangitaon ang mga nagakabagay nga makabati sang maayong balita sang Ginharian. (Mat. 10:11) Apang, sa madamong lugar karon, labi kag labi nga nagabudlay nga masugilanon ang mga tawo sa ila puluy-an. Gani, ano ang sarang himuon agod malab-ot ang mga takus nga mahimo wala masugilanon sa ila puluy-an?
2 Ang pagpanaksi sa dalan mahimo mangin isa ka epektibo nga paagi agod makita ang mga tawo nga wala masugilanon sa pamalaybalay nga hilikuton. Mahimo kita makapanaksi sa dalan sa mga pulunduhan sang bus, sa tupad sang estrikto sing seguridad nga mga apartment, sa publiko nga mga parke, kag sa iban pa nga mga lugar diin ginahimo sang mga tawo ang ila adlaw-adlaw nga mga hilikuton.
3 Kon ginasambit ang pagpanaksi sa dalan, ang iban nagabatyag sing pangalag-ag. Ayhan nagapangalag-ag sila sa pagpakigbahin sa sina nga hilikuton bangod mahuluy-on sila ukon ginapaabot nila nga sing-alan sila sang mga tawo. Ini nga mga kabalaka masunson nga wala sing kabangdanan. Yadtong mga eksperiensiado sa sining hilikuton nagareport nga indi ini mabudlay kaangay sang pamalaybalay nga pagpanaksi. Sa katunayan, nasapwan nila nga ang kalabanan nga mga tawo mas maluyag makigsugilanon sangsa kon manuktok kita sa ila ganhaan. Gani kon ‘makatipon [kita] sing kasidla,’ mahimo kita makibot sa maayong mga resulta nga matigayon.—1 Tes. 2:2.
4 Paano pagahimuon ang pagpanaksi sa dalan sing labing epektibo? Importante ang maayo nga paghanda. Basaha sing una ang mga magasin, kag magpili sing isa ukon duha ka punto nga mahambalan nga sa banta mo magawili sa mga tawo. Ang isa ka 30-segundo nga presentasyon nagakaigo. Magpili sing isa ka lugar diin madamo nga tawo ang regular nga nagalabay. Walay sapayan nga mahimo nga nagakaigo nga may isa pa ka manugbantala malapit sa imo, masunson nga labing maayo ang magpangabudlay sing hilayuay. Ang mga manugbantala nga nagatindog sing tuparay mahimo nga magsugilanunay kag indi makatalupangod sadtong yara sa publiko nga mahimo magapamati sa mensahe sang Ginharian.
5 Ang pagtindog sa isa ka lugar kag pag-uyat lamang sang mga magasin indi subong ka epektibo sa pagpalapit sa isa ka indibiduwal. Mangin mapagsik kag mainabyanon samtang ginapanikasugan mo nga makaumpisa sing paghambalanay. Sa pila ka kaso, ayhan mahimo ka makigdungan sa paglakat upod sa tawo samtang nagapakighambal sa iya. Kon magasabat sia, magtanyag sing mga magasin. Kon indi pagbatunon ang mga magasin, mahimo mo matanyag ang isa ka tract.
6 Masami nga labing maayo ang maghanda sing malip-ot nga pamangkot ukon pinamulong nga makapukaw sing interes. Kon interesado, tinguhai nga makuha ang ngalan, direksion sang tawo, kag ayhan ang numero sang telepono agod matatap mo ang interes. Mahimo ka makasiling: “Kon luyag mo makatuon sing dugang, malipay ako sa pagduaw sa imo ukon sa paghimos nga may isa pa ka Saksi ang makaduaw sa imo.”
7 Ang isa ka gulang nga nakigbahin sa pagpanaksi sa dalan nagpalapit sa isa ka babayi kag nahibaluan nga wala pa gid sia makapakigsugilanon sa mga Saksi sa iya puluy-an. Ginbaton niya ang libro kag nagpasugot nga isa ka utod nga babayi ang magaduaw sa iya puluy-an sa kombeniente nga oras. Madamo pa nga mga takus ang pat-od nga masapwan kag mabuligan kon epektibo kita sa pagpanaksi sa dalan.—Binu. 17:17.