Buligi sing Mahigugmaon Yadtong mga Nagapakita sang Interes
1 Sang gintuytuyan sang anghel ni Jehova si Felipe sa isa ka Etiopeanhon nga nagpakita sang sinsero nga interes sa Pulong sang Dios, mahigugmaon nga ginbuligan niya sia nga mahangpan ang iya ginabasa. (Binu. 8:26-39) Nagahimo bala kita sing pinasahi nga panikasog agod buligan yadtong nagapakita sing interes? Ano ang aton mahimo agod buligan sila?
2 Mag-iskedyul sing tion kada semana sa paghimo sing mga pagduaw liwat. Padayuna ang mga punto nga inyo ginhambalan sa una nga pagduaw. Ibutang sa hunahuna ang tulumuron nga makasugod sing isa ka pagtuon sa Biblia. Magbalik sing regular agod magtanyag sing pinakaulihi nga mga isyu sang mga magasin. Kon may masapwan nga interes, mahimo ka magtanyag sang mga suskripsion.
3 Kon ginhambalan ninyo ang kapuslanan sang Biblia sa imo una nga pagduaw, mahimo mo mapadayon ang paghambalanay nga nagagamit sang isa ka panugda sa pahina 66 sang “Reasoning” nga libro kag magsiling:
◼ “Ang iban nagapati nga ang laygay sang Biblia indi praktikal sa aton moderno nga kalibutan. Ano ang masiling mo sa sini? [Pasabta sia.] Nagaugyon ka bala nga ang isa ka libro nga nagaaman sing laygay kon paano makatigayon sing isa ka malipayon nga kabuhi sa pamilya dapat nga praktikal? [Pasabta sia.] Ang mga pamilya nga nagaaplikar sang ginasiling sang Biblia masami nga malig-on kag malipayon.” Basaha ang Colosas 3:18-21.
4 Mahimo mo masugdan ang isa ka paghambalanay tuhoy sa kahimtangan sang mga patay sa sini nga paagi:
◼ “Ano sa banta mo ang nagakatabo sa aton kon mapatay kita? [Pasabta sia.] Ginatudlo sang kalabanan nga relihion nga padayon kita nga nagaluntad sa pila ka lain nga porma. Madamo ang nakibot sa paghibalo kon ano ang ginasiling sang Biblia tuhoy sa sini nga butang. [Basaha ang Manugwali 9:5.] Bisan pa nga ang mga patay wala na sing pangalibutan, wala sila malipatan sing lubos. Ang Dios nagsaad nga buhion sila liwat sa idalom sang iya Ginharian.” Magliton sa Oktubre 15, 1994 nga Lalantawan ukon sa pahina 162 sang Mabuhi sing Dayon nga libro, kag ipaathag ang mga kasulatan kag mga ilustrasyon. Maghimo sing kahimusan nga makabalik agod makasugod sang isa ka pagtuon sa Biblia.
5 Kon luyag mo maghatag sing dugang nga paathag tuhoy sa Cristianong pagtamod sa inaway sa tunga sang mga pungsod, ayhan luyag mo isiling:
◼ “Nagapati ang iban nga ang inaway amo ang lamang nga paagi sa paghusay sa mga dipaghangpanay. Ano sa banta mo? [Pasabta sia.] Ginapakita sang Biblia nga luyag sang Dios nga ang mga tawo magpuyo sing tingob sa paghidait. [Basaha ang Roma 12:17, 18.] Mangin matuod ina sa bug-os nga kalibutan sa idalom sang Ginharian sang Dios.” Patuhuyi ang brosyur nga Nagaulikid Gid Bala sa Aton ang Dios?, sa pahina 25-6. Magtanyag nga magbalik agod maghatag sing dugang pa nga pagpaathag sa masunod nga tion.
6 Ginbaton sang Etiopeanhon nga eunuco ang iya diikasarang sa paghangop kon wala sang isa nga magbulig sa iya. (Binu. 8:31) Ginbuligan sia sing mahigugmaon ni Felipe. Mapakita naton ang aton gugma sa iban paagi sa pagbulig sa ila sa amo man nga paagi.