Bag-ong Programa sa Sirkito nga Asambleya
1 Sugod sa Pebrero, 1996, ang tema sang sirkito nga mga asambleya amo ang “Pamatii kag Tun-i ang Pagtuman sa Pulong sang Dios.” Ining tema, nga napasad sa Deuteronomio 31:12, 13, nagahatag sing nagakaigo nga sadsaran para sa bug-os nga programa sa pagpadaku sang mga leksion nga kinahanglan naton tun-an kag ipadapat.
2 Walay sapayan nga ang kalabanan nga mga tawo sa karon nagapamati sa nagapatalang nga inspiradong mga pahayag, importante gid para sa kada isa sa aton nga pamatian ang Pulong sang Dios kag tun-an nga tumanon ini. (Luc. 11:28; 1 Tim. 4:1) Ginahunahuna ini, ang programa sa sirkito nga asambleya gindesinyo sa pag-aman sing kalig-unan kag bulig, sa mga manugbantala, mga pamilya, mga gulang kag mga payunir. Sa Sabado, may yara apat-ka-bahin nga simposium sa tema nga “Pag-atubang sa Aton mga Problema—Paagi sa Paghatag sing Igtalupangod sa Pulong sang Dios.” Kag sa Domingo sang aga, may simposium nga ginatig-uluhan “Kon Paano ang Kasulatan Nagadisiplina sa Pagkamatarong.” Ang bug-os nga programa magahatag sing espirituwal nga kalig-unan nga dapat gid ninyo kag sang inyo pamilya tambungan.
3 Sa Sabado kag Domingo, ang praktikal nga mga panugda para sa pag-alagad sa latagon igahatag kag igapasundayag. Ang makapalig-on kag makatudlo nga mga eksperiensia kag mga interbyu ihatag man. Busa, paagi sa pagtambong kag sa pagpamati upod ang tinutuyo nga ipadapat kon ano ang imo natun-an, yara ka sa mas maayo nga kahimtangan sa pagtuman sing bug-os sang mga sugo sang Pulong sang Dios.
4 Ang isa sang ginapatalupangod sang sirkito nga asambleya amo ang pagbawtismo sa bag-ong dedikadong mga kauturan nga lalaki kag babayi. Antes sining dayag nga pagpahayag sang ila dedikasyon, dapat ipabutyag sang mga kandidato ang ila handum nga magpabawtismo sa nagadumala nga manugtatap agod mahimos niya nga sapulon sila sang mga gulang.
5 Ang pamulongpulong publiko para sa sining serye sang sirkito nga asambleya ginatig-uluhan “Ngaa Magpatuytoy sa Biblia?” Antes sang asambleya, sugdi ang pag-agda sa mga interesado nga makatambong. Bilang pagpaabot sa ginakinahanglan gid katama nga kalig-unan kag bulig nga pagabatunon mo kag sang imo pamilya, maghimo sing pat-od nga mga plano nga matambungan ang bug-os nga programa.