Buligi ang Iban sa Pag-apresyar sa Balor sang Biblia
1 Ang Lucas 24:45 nagasiling tuhoy kay Jesus: “Ginbuksan niya sing bug-os ang ila mga painoino agod makahangop sila sang kahulugan sang mga Kasulatan.” Nahibaluan niya nga kinahanglan nila tun-an kag hangpon ang Pulong sang Dios. (Sal. 1:1, 2) Sa aton pagbantala nga hilikuton, ang aton tulumuron amo ang pagsugod sing mga pagtuon sa Biblia, diin aton ‘matudluan ang mga tawo sa pagtuman sang tanan nga butang nga ginsugo ni Jesus.’ (Mat. 28:20) Ang masunod amo ang pila ka panudlo sa kon ano ang mahimo nga isiling mo kon nagaduaw liwat.
2 Kon ginhambalan na ninyo ang libro nga “The Bible—God’s Word or Man’s?” mahimo nimo mapadayon ang inyo paghambalanay sa sining paagi:
◼ “Luyag ko ipakita sa imo ang iban pa nga praktikal nga balor sang laygay sang Biblia. Madamo nga tawo ang nabudlayan makig-upod sa iban. Ano ang sarang naton himuon agod mapalambo ang mas maayo nga kaangtanan sa sadtong sa palibot naton? [Pagkatapos sang sabat, buksi ang pahina 167-8, parapo 15, kag basaha ang Mateo 7:12. Idugang ang mga panghunahuna nga ginpabutyag sa parapo 16.] Isa pa ini ka halimbawa sang kaalam nga masapwan sa laygay sang Biblia. Sa akon masunod nga pagduaw, luyag ko ipakita sa imo ang laygay nga ginahatag sang Biblia sa pagbulig sa mga mag-asawa nga makatigayon sing daku pa nga kalipay sa ila kaangtanan.” Maghimo sing mga kahimusan nga makabalik agod mahambalan ang pahina 170-2 tuhoy sa pagkabuhi sang pamilya.
3 Kon nagapakighambal ka sa isa nga nagpakita sing interes sa Biblia, nian ining pagpalapit mahimo nga epektibo agod masugdan ang isa ka pagtuon:
◼ “Halos tanan nga masugilanon mo magasiling sa imo nga luyag nila magpuyo sa isa ka mahidaiton nga kalibutan. Kon amo sina ang luyag sang tanan, ngaa ang aton kalibutan puno sing tuman nga kasingki? [Pasabta sia.] Ginapakita sang New World Translation kon sa diin mo masapwan sa Biblia ang sabat sa sinang pamangkot.” Buksi ang pahina 1659, kag ipakita ang “Bible Topics for Discussion” Num. 43a: “Sin-o ang salaon sa kasisit-an sa kalibutan?” Basaha ang 2 Corinto 4:4. Ipaathag kon paano laglagon sang Dios ang Yawa kag paluntaron ang kalibutan nga may mapinadayunon nga paghidait kag kalipay. Basaha ang Bugna 21:3, 4. Nian maghimos para sa dugang pa nga paghambalanay sa masunod nga pagduaw.
4 Kon ginagamit mo ang direkta nga pagpalapit sa pagsugod sing pagtuon kag maayo ang reaksion, mahimo nimo ini masiling sa pagbalik mo:
◼ “Sadtong nagligad nga paghambalanay naton, ginhambalan naton kon ngaa mapuslanon nga tun-an ang Biblia. [Basaha ang Juan 17:3.] May yara kami programa sa pagtuon sa Biblia nga nakabulig sa linibo sa pagtuon sing dugang pa tuhoy sa kon ano ang ginsaad sang Dios kag kon paano naton sia mapahamut-an.” Ipakita ang Mabuhi sing Dayon nga libro, repasuha ang mga tig-ulo sang kapitulo, kag ipasundayag kon paano naton ginahimo ang pagtuon sa Biblia.
5 Kon mabuligan mo ang hanuot nga mga tawo sa pag-apresyar sang balor sang Pulong sang Dios, nian ang kaalam nga matun-an nila paagi sa pagtuon sa mga pahina sini mahimo nga mangin “kahoy sang kabuhi,” nga magahatag sa ila sing daku nga kalipay.—Hul. 3:18.