Maggawi sa Paagi nga Takus sa Maayong Balita
1 Subong mga Saksi ni Jehova, handum naton nga padunggan ang ngalan ni Jehova. Nahibaluan naton nga ang aton paggawi, panghambal, pamustora, kag pamayo sarang makaimpluwensia kon paano ginatamod sang iban ang matuod nga pagsimba. Matuod ini ilabi na sa aton mga miting. Luyag naton pat-uron nga ang tanan nga ginasiling kag ginahimo sa mga miting takus sa maayong balita kag nagahatag sing kadungganan kay Jehova.—Fil. 2:4.
2 Ang mga talaksan sang kalibutan sa pamayo kag pamustora nangin makalilibog sa madamong bahin. Isa ini ka butang nga dapat talupangdon sing maayo sang mga ministro sang maayong balita. Ang Hunyo 1, 1989, Lalantawan, .pahina 20, nagsiling: “Indi kinahanglan nga mangin malahalon ang aton panapton, kundi dapat ini mangin matinlo, matahom, kag maugdang. Ang aton sapatos dapat man nga indi gubaon kag maayo sing hitsura. Sa kaanggid, sa tanan nga miting, lakip sa Pagtinuon sa Libro sang Kongregasyon, ang aton lawas dapat mangin matinlo, kag dapat kita magpanapot sing mahipid kag nagakaigo.”
3 Ang pag-abot sing maaga isa ka tanda sang mahigugmaon nga pagkamapatugsilingon kag pagkamadinumdumon. Kon kaisa, ang dimalikawan nga mga kahimtangan mahimo nga magaupang sa aton sa pag-abot sing husto sa oras para sa miting. Apang ang kinabatasan nga pag-abot sing ulihi mahimo nga nagapakita sing kakulang sing pagtahod sa sagrado nga katuyuan sang mga miting. Subong man, ang mga nagaabot sing ulihi masami nga nagatublag sa iban kag nagaupang sa ila nga makabenepisyo sing bug-os gikan sa programa. Ang pag-abot sing maaga nagapakita sing pagtahod sa balatyagon kag kaayuhan sang tanan nga tumalambong.
4 Ang gugma para sa aton mga isigkatawo dapat magbulig sa aton nga likawan ang paghimo sing mga tublag sa tion sang mga miting. Ang paghutikanay, pagkaon, pag-usang sing gum, pagkumos sang papel, dikinahanglanon nga pagkadto sa kasilyas, magatublag sa iban kag magabuhin sang dignidad nga nagakaigo sa duog sang pagsimba ni Jehova. Indi nagakaigo para kay bisan sin-o nga himuon ang katungdanan sa kongregasyon ukon sugilanunon ang iban luwas lamang kon may pila ka emerhensia nga nagakinahanglan sa mga utod nga lalaki nga magtindog sa ila pulungkuan. Luwas sina, ang tanan dapat maglingkod kag magpamati sa programa agod makabenepisyo sila kag ang ila pamilya. Ang dimaayo nga pagginawi wala sing lugar sa Kingdom Hall bangod “ang gugma . . . wala nagagawi sing indi desente.”—1 Cor. 13:4, 5; Gal. 6:10.
5 Ang maayong pagginawi sang aton mga kabataan sa mga miting nagahatag man sing kadungganan sa ngalan ni Jehova. Ang suod nga pagtatap sang mga ginikanan kinahanglanon. Ang mga kabataan dapat palig-unon sa pagpamati kag sa pagpakigbahin. Ginapakamaayo sang madamong ginikanan nga may magagmay nga kabataan nga maglingkod sa isa ka lugar diin mahapos sila nga makaguwa kag makadipara sa mga kinahanglanon sang ila mga kabataan nga wala nagatublag sing dinagakaigo sa iban.
6 Si Pablo naglaygay: “Maggawi kamo sa paagi nga takus sa maayong balita.” (Filip. 1:27) Manikasog kita, nian, nga maggawi sing takus kag sing mapatugsilingon sa iban kon nagatambong sa mga miting.