Pagpaiwag sang Aton Kapawa sing Padayon

¹ Ano ang kapawa? Walay sapayan sang iya abanse nga teknolohiya, wala gihapon mahibalui sing bug-os sang tawo ang sabat sa pamangkot nga ginbangon ni Jehova sa Job 38:24. Mahimo bala kita mabuhi nga wala sing kapawa? Kon wala sing kapawa indi kita mahimo mabuhi. Ang kapawa kinahanglanon para sa pisikal nga itululok, kag ang Biblia nagasugid sa aton nga sa espirituwal nga kahulugan, “ang Dios kapawa.” (1 Juan 1:5) Nagasalig kita sing bug-os sa Isa nga “nagahatag sa aton sing kapawa.”​—Sal. 118:27.

² Matuod ini sa pisikal nga kahulugan apang ilabi na gid sa espirituwal nga paagi. Ginpatalang sang butig nga relihion ang mga tawo, nagabilin sa ila sa espirituwal nga kadudulman, ‘nagapangapkap sa dingding kaangay sang mga bulag.’ (Isa. 59:​9, 10) Ginpahulag sang iya dimalabawan nga gugma kag kaawa, ‘ginpadala [ni Jehova] ang iya kapawa kag kamatuoran.’ (Sal. 43:3) Sing literal, minilyon sang mga mainapresyahon ang naghulag, nga nagguwa “gikan sa kadudulman pakadto sa iya kalatingalahan nga kapawa.”​—1 Ped. 2:9.

³ Si Jesucristo may importante nga bahin sa pagdala sining kapawa sa kalibutan. Sia nagsiling: “Nagkari ako subong isa ka kapawa sa kalibutan, agod nga ang bisan sin-o nga nagatuo sa akon indi magpabilin sa kadudulman.” (Juan 12:46) Gingamit niya ang iya tanan nga tion, enerhiya, kag manggad sa pagpalapnag sang kapawa. Naglakbay sia sa iya bug-os nga dutang natawhan, nga nagbantala kag nagpanudlo sa halos tanan nga siudad kag minuro.

⁴ Sa Mateo 5:​14-16 ginsugo ni Jesus ang iya mga disipulo: “Kamo ang suga sang kalibutan. . . . Sa amo nga bagay paiwaga ninyo ang inyo kapawa sa atubangan sang mga tawo, agod nga makita nila ang inyo mga buhat nga maayo kag himayaon nila ang inyo Amay nga yara sa langit.” Kaangay ni Jesus, sila mangin “mga sulu sa kalibutan.” (Filip. 2:15) Malipayon nila nga ginbaton yadto nga katungdanan, ginkabig ini subong ang ila pangunang katuyuan sa kabuhi. Ang bug-os nga Cristianong kongregasyon nahiusa sa.pagtuman sadtong dakung hilikuton.

⁵ Dapat kita magpasalamat karon nga nalakip kita sa tunga sadtong ‘nagsikway sang mga buhat sang kadudulman.’ (Roma 13:​12, 13) Sarang naton mapakita ang aton apresasyon paagi sa pag-ilog sang halimbawa nga ginpahamtang ni Jesus kag sang matutom nga mga Cristiano sang nagligad. Ang kinahanglanon nga pamatian sang iban ang kamatuoran mas hilingagawon kag ital-ital karon sangsa bisan anong tion sa maragtas sang tawo.

⁶ Paano Kita Makaiwag Subong mga Sulu? Ang pangunang paagi sa pagpaiwag sang aton kapawa amo ang pagpakigbahin sa pagbantala sang Ginharian nga hilikuton. Ang kada kongregasyon may regular, organisado nga mga kahimusan sa pagbantala sa gintangdo sa sini nga teritoryo. Ang madamo nga literatura matigayon sing nanuhaytuhay kag sa madamong hambal. Ang maid-id nga edukasyon ginaaman paagi sa mga miting, kag ang bulig sa paghanas sa iban personal nga ginahimo sadtong mga eksperiensiado. Ang mga kahigayunan sa pagpakigbahin bukas sa mga lalaki, mga babayi, mga tigulang, kag bisan sa mga kabataan. Ang tanan nga hilikuton sang kongregasyon ginhugod sa pagbantala, nga may mga aman sa pagbulig sa tanan nga katapo nga makigbahin sa pila ka paagi. Ang regular kag suod nga pagpakig-upod sa kongregasyon amo ang labing maayo nga paagi sa pagpat-od nga ang aton kapawa padayon nga nagaiwag.

⁷ Mahimo kita makaiwag sa mga paagi nga wala nagakinahanglan sang pagpanaksi sa hambal. Mahimo naton maganyat ang igtalupangod sang iban paagi lamang sa aton pagginawi. Amo sina ang ginahunahuna ni Pedro sang naglaygay sia: “Hupti ang inyo pagginawi nga nagakaigo sa tunga sang mga pungsod, agod nga . . . sila bangod sang inyo maayong mga buhat nga ila nakita maghimaya sang Dios.” (1 Ped. 2:12) Ginahukman sang madamo ang isa ka hilikuton ukon ang isa ka organisasyon paagi sa pagginawi sadtong nagapakig-upod sa sini. Kon makita sang mga manugpanilag ang mga tawo nga matinlo sa moral, bunayag, mahidaiton, kag masinulundon sa kasuguan, ginakabig nila ina nga mga tawo subong tuhay kag nagahinakop nga nagakabuhi sila suno sa mga talaksan nga mas mataas sangsa ginasunod sang kalabanan. Gani ginapaiwag sang isa ka bana ang iya kapawa kon ginapadunggan kag ginapalangga niya ang iya asawa sa mahigugmaon nga paagi; ginahimo man ini sang asawa paagi sa pagtahod sa pagkaulo sang iya bana. Ang mga kabataan makita nga tuhay kon ginatuman nila ang ila mga ginikanan kag ginalikawan ang seksuwal nga imoralidad kag ang paggamit sang droga. Ang isa ka empleyado nga mapisan sa iya trabaho, bunayag, kag mapatugsilingon sa iban ginapabaloran sing daku. Paagi sa pagpakita sining Cristianong mga kinaiya, ginapaiwag naton ang aton kapawa.

⁸ Ang pagbantala amo ang pagpakigsugilanon sa iban tuhoy sa aton natun-an gikan sa Pulong sang Dios. Ginahimo ina paagi sa paghatag sing mga pamulongpulong sa mga miting ukon sa pagpakighambal sa mga ganhaan, apang indi lamang ini limitado sa subong sina nga mga okasyon. Sa aton adlaw-adlaw nga hilikuton masumalang naton ang madamong tawo. Pila ka beses sa isa ka adlaw nga nagapakigsugilanon ka sa imo mga kaingod? Daw ano kasunson nga may nagapanuktok sa imo ganhaan? Pila ka lainlain nga tawo ang masumalang mo kon nagapamalaklon ka, nagasakay sa bus, ukon nagakadto sa imo sekular nga trabaho? Kon isa ikaw ka pamatan-on sa eskwelahan, maisip mo bala ang kadamuon sang mga indibiduwal nga ginasugilanon mo kada adlaw? Ang mga kahigayunan sa pagpakigsugilanon sa iban halos wala sing latid. Ang imo lamang dapat nga himuon amo ang pagdumdom sang pila ka Makasulatanhon nga mga panghunahuna, pagdala sing Biblia kag mga tract, kag ang pag-umpisa nga makighambal kon may kahigayunan.

⁹ Bisan pa nga ang di-pormal nga pagpanaksi simple lamang, ang iban nagapangalag-ag sa pagtilaw sini. Ayhan nahuya ukon ginakulbaan sila katama sa pagpalapit sa mga estranghero. Ayhan natahap sila nga basi sing-alan sila. Yadtong eksperiensiado sa di-pormal nga pagpanaksi magasugid sa imo nga halos wala gid sing kabangdanan nga magkabalaka. Ang iban halos kaangay lang naton; may kaanggid sila nga mga kinahanglanon, kaanggid nga mga kabalaka, kag kaanggid nga mga luyag para sa ila kaugalingon kag sa ila mga panimalay. Ang kalabanan nagahulag sa malulo nga paagi sa isa ka malipayon nga yuhum ukon mainabyanon nga panamyaw. Sa pag-umpisa, ayhan kinahanglan mo ‘magtipon sing kaisog.’ (1 Tes. 2:2) Apang, sa tion nga makaumpisa ka na, mahimo ka makibot kag malipay sa mga resulta.

¹⁰ Ginapakamaayo Kita Kon Ginapaiwag Naton ang Aton Kapawa: Yari ang pila ka halimbawa sang mga eksperiensia nga resulta sang di-pormal nga pagpanaksi. Ang isa ka 55-anyos nga babayi manugtabok sa dalan. Sang malapit na sia maipit sang salakyan, gin-uyatan sia sang isa ka utod nga babayi sa butkon kag ginbutong sia pakadto sa lugar nga wala sing peligro, nga nagasiling: “Maghalong ka palihug. Nagakabuhi kita sa makatalagam nga mga tion!” Nian ginpaathag niya kon ngaa tuman ka makatalagam ang tion. Ang babayi namangkot, “Isa ka bala sang mga Saksi ni Jehova?” Bangod nakakuha sia sing isa sang aton mga libro gikan sa iya magulang nga babayi, luyag niya masugilanon ang isa sa mga Saksi ni Jehova, kag ginpaposible ini sini nga hitabo.

¹¹ Ginsugdan sang isa ka utod nga babayi ang pagpakighambal sa babayi sa hulot-hululatan sa opisina sang doktor. Ang babayi namati sing maayo kag nian nagsiling: “Nasugilanon ko na ang mga Saksi ni Jehova, apang kon mangin isa gid man ako sang mga Saksi ni Jehova sa ulihi, ini bangod sang bag-o lang nga ginsugid mo sa akon. Ang pagpamati sa imo kaangay sang pagsugod nga makakita sing kasanag sa isa ka madulom nga duog.”

¹² Ang isa ka malulo nga buhat mahimo mangin isa ka paagi agod mabuligan ang iban sa pagtuon sang kamatuoran. Samtang nagalakat pauli halin sa pag-alagad sa latagon, nakita sang duha ka babayi ang tigulang nga babayi nga daw malain ang pamatyag pagpanaug niya sa bus. Nagdulog sila kag ginpamangkot sia kon nagakinahanglan sia sing bulig. Nakibot gid sia nga ang duha ka estranghero magapakita sing interes sa iya amo nga namilit sia nga mahibaluan kon ano ang nagtiklod sa sinang malulo nga buhat. Nagbukas ini sang dalan para sa pagpanaksi. Gilayon nga ginhatag sang babayi ang iya direksion kag mainabyanon nga gin-agda sila nga duawon sia. Isa ka pagtuon ang ginsugdan. Sang ulihi ang babayi nagsugod sa pagtambong sa mga miting kag nagasugid na karon sang kamatuoran sa iban.

¹³ Ginahimuslan sang isa ka tigulang nga utod nga babayi ang pagpanaksi sa kaagahon sa lokal nga baybayon. Nasugilanon niya ang mga kabulig sa balay, mga yaya, mga klerk sa bangko, kag manggaranon nga mga babayi nga nagadayandayan kon aga sa baybayon. Nagadumala sia sing mga pagtuon sa Biblia, nga nagapungko sa mga bangko malapit sa baybayon. Natun-an sang pila ka tawo ang kamatuoran gikan sa iya kag karon mga Saksi ni Jehova na.

¹⁴ Sa iya sekular nga trabaho, nabatian sang isa ka utod nga babayi ang kaupod sa trabaho nga naghambal tuhoy sa partido sa politika nga ginapatihan niya nga makalubad sang mga problema sa kalibutan. Ang utod nagsaligbat, nagsugid sang mga saad nga pagahimuon sang Ginharian sang Dios. Ining paghinambalanay sa trabaho nagdul-ong sa isa ka regular nga pagtuon sa Biblia sa balay, kag sang ulihi ang babayi kag ang iya bana nangin mga Saksi.

¹⁵ Indi Gid Pagkalimti nga Ikaw Isa ka Saksi! Sang ginlaragway ni Jesus ang iya mga disipulo subong “suga sang kalibutan,” nangatarungan sia nga dapat nila buligan ang iban nga makapanginpulos gikan sa espirituwal nga kasanagan sang Pulong sang Dios. Kon ginapadapat naton ang laygay ni Jesus, paano naton pagatamdon ang aton ministeryo?

¹⁶ Kon nagapangita sing palamugnan, ginapakamaayo sang pila ka tawo ang part-time nga trabaho. Ginalatiran nila kon daw ano kadaku nga tion kag panikasog ang ihinguyang nila sa sini bangod ginapakamaayo nila nga gamiton ang kalabanan nila nga tion sa mga hilikuton nga natukiban nila nga mas makapaladya sing personal. Amo man bala sina ang aton pagtamod sa aton ministeryo? Bisan pa nga ayhan magabatyag kita nga obligado kag mangin handa pa gani nga magpain sing pila ka tion para sa ministeryo, dapat bala nga ang aton pangunang mga interes yara sa iban nga butang?

¹⁷ Nakahangop nga wala sing ginatawag nga part-time nga Cristiano, ginhimo naton ang aton dedikasyon, ‘ginsikway ang aton kaugalingon’ kag nag-ugyon sa pagsunod kay Jesus “sing padayon.” (Mat. 16:24) Ang aton handum amo ang magpadayon nga mangin “bug-os kalag,” nagahimulos sang tanan nga kahigayunan nga ipaiwag ang aton kapawa agod malab-ot ang mga tawo bisan diin man sila. (Col. 3:​23, 24) Dapat naton pamatukan ang kalibutanon nga mga panimuot, huptan ang aton kakugi subong sang ginsuguran, kag pat-uron nga ang aton kapawa padayon nga nagaiwag sing masanag. Ayhan ginatugutan sang iban ang ila kakugi nga mag-ugdaw kag ang ila kapawa nga magakipawkipaw na lamang, nga halos dikitaon sa indi tanto kalayo. Mahimo sia nagakinahanglan sing bulig agod mapasag-uli ang nawasi nga kakugi para sa ministeryo.

¹⁸ Ang iban mahimo nga magaisol bangod madamo ang wala nagapati sa aton mensahe. Si Pablo nagsiling nga ang mensahe nahanungod kay Cristo “kabuangan sa nagakawala.” (1 Cor. 1:18) Apang, bisan ano man ang ginasiling sang iban, makusog sia nga nagsiling: “Wala ko ginakahuya ang maayong balita.” (Roma 1:16) Ang isa nga nahuya nagabatyag nga kubos ukon di-takus. Paano kita mahimo magbatyag nga nahuya kon nagapamulong kita tuhoy sa Supremo nga Soberano sang uniberso kag sa makatilingala nga mga aman nga ginhimo niya para sa aton dayon nga kalipay? Indi gid mahunahuna nga magabatyag kita nga kubos ukon di-takus kon nagapamulong kita sining kamatuoran sa iban. Sa baylo, dapat kita magbatyag nga ginahimo ang aton bug-os nga masarangan, nagapakita sang aton pagtuo nga kita “wala sing dapat ikahuya.”​—2 Tim. 2:15.

¹⁹ Ang kapawa sang kamatuoran nga nagaiwag karon sa mga kadutaan sa bug-os nga duta mainit nga nagatanyag sing paglaum nga kabuhi nga walay katapusan sa isa ka paraiso nga bag-ong kalibutan. Ipakita naton nga ginadumdom naton ang laygay nga ipaiwag ang aton kapawa sing padayon! Kon himuon naton ini, may rason kita sa pagkalipay kaangay sang mga disipulo nga sa kada adlaw “wala sila mag-untat sa pagpanudlo kag pagwali kay Jesus subong nga Cristo.”​—Binu. 5:42.