Mangin Bug-os Tagipusuon!
1 May madamo kita nga rason agod magpasalamat kay Jehova. Nagalakip ini sa mga butang nga ginhimo niya sang nagligad, sa ginahimo niya karon, kag sa pagahimuon pa niya para sa aton sa palaabuton. Bangod sang aton pagpasalamat, ano ang dapat naton himuon? Si David nagasabat: “Pakamaayuhon ko si Jehova sa tanan nga tion; ang iya pagdayaw mangin sa akon baba sing dalayon.”—Sal. 34:1.
2 Sang nagdedikar kita kay Jehova, ginsikway naton ang aton kaugalingon kag ginpas-an ang aton usok sang pag-antos subong mga disipulo ni Jesus. (Mat. 16:24) Ano ang buot silingon sina? Ginakabig sang tawo nga nagsikway sang iya kaugalingon ang paghimo sang kabubut-on sang Dios subong ang labing importante nga hilikuton sa kabuhi. Kabubut-on ni Jehova nga ang iya ngalan mapakilala sa bug-os nga duta.—Sal. 83:18.
3 Maathag nga ginapakita sang Biblia nga ginasugo kita sa pagbantala. Amo ini ang hilikuton nga ginahimo naton sing “bug-os kalag nga kay Jehova.” (Col. 3:23) Daw ano kadamo ang pagahimuon naton sa ministeryo kon bug-os tagipusuon gid kita? Kon binagbinagon naton ang gugma ni Jehova tungod sa aton, pat-od gid nga ang aton tagipusuon magapahulag sa aton nga makigbahin sing bug-os sa pagsugid sa iban nahanungod sa iya kag sa iya mga saad!
4 Luyag pirme ihugod sang tawo nga may bug-os tagipusuon ang iya igtalupangod sa sagrado nga pag-alagad. Ang salmista nagsiling: “Makapito sa isa ka adlaw ginadayaw ko ikaw.” (Sal. 119:164) Ginahimuslan sang mga may balatyagon subong sang salmista ang tanan nga kahigayunan agod dayawon si Jehova.
5 Ginapalibutan Kita sang mga Kahigayunan Agod Dayawon si Jehova: Indi kinahanglan nga hulaton pa naton nga makigbahin kita sa pamalaybalay nga hilikuton agod ibantala ang maayong balita. Ang aton mga kaupdanan sa trabaho, mga kabutho, mga himata, kag mga kilala tanan nagakinahanglan nga makabati sang mensahe sang Ginharian. Kon nagalakbay, mahimo naton masugilanon ang kaupod nga mga pasahero, mga mamumugon sa restawran, mga nagatrabaho sa gasolinahan, ukon mga tsuper sang taksi. Samtang sa balay, mahimo naton mapanaksihan ang mga kaingod ukon mga nagadul-ong sing delivery sa aton balay. Kon kita maospital, may mga nars, mga doktor, kag iban pa nga mga pasyente nga mahimo naton mabantalaan sing dipormal.
6 Ang Di-pormal nga Pagpanaksi May mga Resulta: Isa ka adlaw, duha ka Saksi ang nagalakat sa parke kag nakapakighambal sa isa ka lamharon nga lalaki nga nagadayandayan sang iya anak. Sang ulihi, ginbaton nila sang iya asawa ang kamatuoran. Ginsugid sang ulihi sang lamharon nga lalaki nga pila lamang ka tion antes niya primero nga masugilanon ang duha ka Saksi, nangamuyo sia sa Dios, nga nagapangabay, ‘Kon nagaluntad ka gid man, palihug pahibalua ako.’ Ginakabig niya ang pagsumalangay nila sa parke subong ang sabat ni Jehova sa iya pangamuyo.
7 Ang mga bug-os tagipusuon nagaagom sing labing daku nga kalipay. Nakahibalo sila nga ang pag-alagad “upod ang bug-os nga tagipusuon” nagapahamuot kay Jehova.—1 Cron. 28:9.