Karon Pa Lang Naton Maagom ang Subong Sini sa Espirituwal!
1 Kalabanan nga mga tawo karon nagakalangkag sa adlaw nga makasiling sila, “Karon pa lang naton maagom ang subong sini!” Ang buot nila silingon amo nga nagalaum sila nga matigayon ang bugana nga materyal nga mga butang, agod ‘makapatawhay sila, makakaon, makainom, kag magkasadya.’ (Luc. 12:19) Sa kabaliskaran, makasiling kita sa karon gid nga sa espirituwal nga kahulugan, wala kita ginakulangan. (Sal. 34:10) Paano ina posible?
2 Ang Hulubaton 10:22 nagasiling nga “ang pagpakamaayo ni Jehova—amo ini ang nagapamanggad.” Makasiling kita nga ang Dios “nagahatag sa aton sing bugana sang tanan nga butang nga pagkalipayan.” (1 Tim. 6:17) Nagahimo ini sa aton nga amo ang pinakamanggaranon nga katawhan sa duta!
3 Pag-isip sang Aton mga Pagpakamaayo: Walay sapayan nga diutay sing materyal, wala kita nagakabalaka sing tuman tuhoy sa aton matag-adlaw nga mga kinahanglanon. Nakahibalo si Jehova kon ano ang aton kinahanglanon, kag nagasaad sia nga iaman ini. (Mat. 6:31-33) Nagahatag ini sa aton sing kalinong sa hunahuna nga tunay gid nga bilidhon.
4 Apang, ang aton espirituwal nga mga pagpakamaayo mas daku pa. Ang aton kabuhi nasandig sa espirituwal nga pagkaon halin kay Jehova. (Mat. 4:4) Ang mga nagalaum sing espirituwal nga kalan-on gikan sa kalibutanon nga mga ginhalinan ginagutom samtang kita bugana nga ginapaayawan sing bug-os sang ‘matutom nga ulipon.’—Isa. 65:13; Mat. 24:45.
5 Ang aton bug-os kalibutan nga paghiliutod nagaaman sa aton sing pagpakig-upod sang mahigugmaon nga mga kauturan sa tanan nga bahin sang duta. (Juan 13:35) Ang lokal nga kongregasyon amo ang lugar nga makasapo kita sing kasulhay kag kapahuwayan. Ang mga gulang padayon nga nagabantay sang aton kalag, nagabulig sa aton sa paglandas sang madamo nga sahi sang mga problema. (Heb. 13:17) Ang pagsuod naton sa aton mga kauturan nagapalig-on kag nagapabakod sa aton nga magpadayon.—Roma 1:11, 12.
6 Bisan ang aton hilikuton isa ka pagpakamaayo. Ang pagsugid sang maayong balita nagadala sang kasadya sa iban kag kalipay sa aton kaugalingon. (Binu. 20:35) Nakita gid naton ang maayo sa tanan naton nga lakas nga pagpangabudlay.—Manugw. 2:24.
7 Labaw sa tanan, may dalayawon kita nga paglaum para sa palaabuton. (Roma 12:12) Ginapaabot naton ang isa ka himpit nga bag-ong kalibutan sang pagkamatarong, diin magakabuhi kita kaupod sang aton mga hinigugma nga may kalipay kag paghidait sing dayon!
8 Paano Naton Mapakita ang Aton Apresasyon? Indi gid naton mabalusan si Jehova tungod sang nahimo niya para sa aton. Mapabutyag lamang naton ang aton apresasyon paagi sa (1) pagpasalamat sa iya kada adlaw tungod sang iya dibagay nga kaluoy (Efe. 5:20), (2) pagpakita sang aton gugma paagi sa pagkamatinumanon (1 Juan 5:3), (3) pagpakabalaan sang iya ngalan paagi sa pagbantala sang maayong balita (Sal. 83:18), kag (4) pagsakdag sa Cristianong kongregasyon paagi sa aton bug-os tagipusuon nga kooperasyon.—1 Tim. 3:15.
9 May rason gid kita agod mangin labing malipayon nga katawhan sa duta. (Sal. 144:15b) Kabay nga ang aton panimuot, pagginawi, kag pag-alagad nagapabanaag sang kalipay nga ginabatyag naton sa aton espirituwal nga paraiso—karon pa lang naton maagom ang subong sini!