Iluga ang Ila Pagtuo
1 Ginlaragway ni apostol Pablo ang pagtuo subong “ang masaligan nga pagpaabot sang mga butang nga ginalauman, ang maathag nga pagpasundayag sang mga katunayan bisan dimakita.” Gindugang niya nga “sa walay pagtuo imposible mapahamut-an [ang Dios].” (Heb. 11:1, 6) Ginlaygayan kita ni Pablo nga magtuo, magbugana sa sini, maghimud-os sini.—2 Cor. 4:13; Col. 2:7; 2 Tim. 2:22.
2 May yara madamong talalupangdon nga mga halimbawa sang pagtuo nga ginsaysay sa Biblia. Sa Hebreo 11, ginahatag ni Pablo ang malaba nga listahan sang mga saksi nga nagpasundayag sing mabakod nga pagtuo. Nalakip sa sining listahan amo si Abel, nga amo ang una nga ginpatay tungod sa iya pagtuo. Si Noe ginlista bangod sa iya pagtuo nagpakita sia sing diosnon nga kahadlok agod maluwas ang iya panimalay. Si Abraham ginhatagan sing komendasyon tungod sang iya pagtuo kag pagkamatinumanon. Si Moises gindayaw bangod sa iya pagtuo nagpadayon sia nga dimationg subong nga nakita ang Isa nga dimakita. Nagapasalamat gid kita nga sarang naton mapabakod ang aton pagtuo paagi sa pagrepaso sa ila “balaan nga mga pagginawi kag mga buhat sang diosnon nga debosyon”!—2 Ped. 3:11.
3 Sadtong nahaunang siglo, si Jesus namangkot: “Kon magkari ang Anak sang tawo, makakita bala sia sing pagtuo sa duta?” (Luc. 18:8) Ti, kon amo, may buhi bala kita nga mga halimbawa sang pagtuo sa tunga naton karon? Makakita bala kita sing mga lalaki kag mga babayi nga nagapadayag sing dimalingkang nga pagtuo kay Jehova subong anay sang katawhan sang Dios sang panahon sang Biblia?
4 Modernong-Adlaw nga mga Halimbawa sang Pagtuo: Ginapalibutan kita sang tumalagsahon nga mga halimbawa sang pagtuo! Ang pagtuo sang mga manugtatap nga nagapanguna sa tunga naton takus ilugon. (Heb. 13:7) Apang indi lamang sila ang huwaran sa pagtuo. Nagapakig-upod sa tagsa ka kongregasyon amo ang mga mainunungon nga may madugay na nga rekord sang matutom nga pag-alagad kay Jehova, sa masami ginahimo sa idalom sang tuman kabudlay nga mga kahimtangan.
5 Dapat naton dayawon ang aton matutom nga mga kauturan nga babayi nga, sa mga tinuig, nagbatas sang pagpamatok sang ila nagapamatok nga mga bana. Dapat atubangon sang nagaisahanon nga mga ginikanan ang hangkat sa pagpadaku sa kabataan. May gulang-gulang nga mga balo sa tunga naton nga wala gid nagapalya sa mga hilikuton sang kongregasyon walay sapayan nga wala sing nagabulig sa ila nga mga katapo sang pamilya. (Ipaanggid ang Lucas 2:37.) Nahalawhaw kita sa pagtuo sadtong nagabatas sing nagabalikbalik nga mga problema sa kapagros. Madamo ang padayon nga nagaalagad sing matutom walay sapayan sang ila mga limitasyon nga nagaupang sa ila sa pagbaton sang dugang pa nga mga pribilehiyo sa pag-alagad. May lamharon nga mga Saksi nga maisugon nga nagpakita sing pagtuo walay sapayan sang pagpamatok sa eskwelahan. Ang aton diosnon nga debosyon labi nga nagabakod samtang ginapanilagan naton ang matutom nga mga payunir nga nagapadayon sa sulod sang mga tinuig walay sapayan sang dimaisip nga mga problema.
6 Ining mga halimbawa sang mga matutom nagahatag sa aton sing lugpay kag pagpalig-on. (1 Tes. 3:7, 8) Maayo nga ilugon naton ang ila pagtuo bangod “ang nagahisayo sing minatuod amo ang kalipay [ni Jehova].”—Hulu. 12:22.