Padayon Nga Sunda Si Jesus
1 Si Jesus nagsiling: “Kon ang bisan sin-o luyag magsunod sa akon, isikway niya ang iya kaugalingon kag pas-anon ang iya usok sang pag-antos kag padayon nga magsunod sa akon.” (Mat. 16:24) Luyag gid naton nga himuon ang ginsiling ni Jesus. Usisaon naton kon ano ang ginalakip sa tagsa ka dinalan sang iya imbitasyon.
2 “Isikway Niya ang Iya Kaugalingon”: Sang gindedikar naton ang aton kabuhi kay Jehova, ginsikway naton ang aton kaugalingon. Ang sadsaran nga kahulugan sang Griegong tinaga nga ginbadbad nga “isikway” amo ang “pagsiling sing indi.” Nagakahulugan ina nga boluntaryo naton nga ginasikway ang aton mga ambisyon, handum, kasulhay, kag makagod nga mga kalipayan, subong nga determinado kita nga pahamut-an si Jehova sa wala katubtuban.—Roma 14:8; 15:3.
3 “Pas-anon ang Iya Usok sang Pag-antos”: Ang kabuhi sang Cristiano amo ang pagkabuhi nga nagapas-an sang usok sang pag-antos sang masinakripisyuhon nga pag-alagad kay Jehova. Ang espiritu sang pagsakripisyo sa kaugalingon mahimo mapakita paagi sa pagpanikasog sing lakas sa ministeryo. Tubtob sini nga tion karon nga tuig, madamong manugbantala ang nagakalipay sa pag-auxiliary payunir. Ayhan isa ikaw sa ila kag mapamatud-an mo nga ang mga pagpakamaayo nga natigayon mo mas labi pa sangsa mga sakripisyo nga ginahimo mo. Ang mga indi makauxiliary payunir masunson nga nagahimo sing kahimusan nga makahinguyang sing mas madamo nga tion sa pagbantala nga hilikuton subong mga manugbantala sang kongregasyon. Bangod sina, ang pila ka kongregasyon nagaiskedyul sing dugang nga mga miting sa pag-alagad sa latagon sa mga oras nga kombeniente sa mga manugbantala. Ang iban may maayo man nga mga resulta sang namat-od sila nga magpabilin sing malawiglawig diutay sa latagon kag magduaw sing ‘isa na lamang ka balay’ ukon magpangabudlay ‘sing pila pa ka minuto.’
4 Ang isa pa ka paagi nga ang espiritu sang pagsakripisyo sa kaugalingon ginapakita amo ang pagtalana sing personal nga mga tulumuron. Paagi sa mahalungon nga pagplano kag pagbag-o sa ila mga iskedyul, ang pila nangin mga regular payunir. Ginhimos sang iban ang ila mga kahimtangan agod makasaylo sa isa ka lugar diin may daku pa nga kinahanglanon para sa mga manugbantala sang Ginharian.
5 “Padayon nga Magsunod sa Akon”: Bisan pa nga ang mga disipulo ni Jesus nakaeksperiensia sing madamong pagtilaw, napalig-on sila bangod sang iya kakugi kag pagbatas sa ministeryo. (Juan 4:34) Nakabatyag sila sing kapagsik bangod sang iya presensia. Amo ina kon ngaa ang mga nagsunod sa iya nagkalipay sing daku. (Mat. 11:29) Palig-unon man naton ang isa kag isa nga himuon sing padayon ang pinakaimportante nga hilikuton sa pagbantala sang Ginharian kag paghimo sing disipulo.
6 Kabay nga batunon naton tanan ang imbitasyon ni Jesus nga padayon sia nga sundon paagi sa pagpalambo sing espiritu sang pagsakripisyo sa kaugalingon. Samtang ginahimo naton ini, maagom naton karon ang daku nga kalipay kag ang daku pa nga mga kabulahanan sa palaabuton.