Ang Aton Ministeryo​—⁠Pagpakita Sing Matuod nga Gugma

¹ Paagi sa aton ministeryo ginapakita naton ang aton pagkamatinumanon sa duha ka labing daku nga sugo. (Mat. 22:​37-39) Ang aton gugma kay Jehova nagapapagsik sa aton sa paghambal sing positibo tuhoy sa iya. Ang aton gugma sa aton mga isigkatawo nagapahulag sa aton sa pagpalig-on sa ila nga pangitaon ang ihibalo tuhoy sa kabubut-on kag mga katuyuan sang Dios agod nga, kaangay naton, mahigugma nila si Jehova kag mapahisanto ang ila kaugalingon para sa padya nga kabuhi nga walay katapusan. Gani, nian, paagi sa aton ministeryo ginapadunggan naton ang ngalan ni Jehova kag ginapaambit ang hamili nga paglaum sa Ginharian sa aton mga isigkatawo. Huo, ang aton ministeryo isa ka pagpakita sing matuod nga gugma sa Dios kag sa tawo.

² Ang aton gugma nagatiklod sa aton sa pagpakigsugilanon sa tanan nga sahi sang tawo, sa tanan nga sahi sang kahimtangan. (1 Cor. 9:​21-23) Sa pag-ilustrar: Sakay sa eroplano, ang isa ka Cristianong gulang naglingkod sa tupad sang Romano Katoliko nga pari. Napahambal sang gulang ang pari paagi sa pagpamangkot sing pila ka mataktikanhon nga mga pakiana kag, pagkatapos sina, ginliton ang paghambalanay sa Ginharian. Sang nanaug ang pari sa eroplano, nakakuha sia sing duha sang aton mga libro. Daw ano katahom nga resulta bangod sang pagpakita sang gulang sing matuod nga gugma sa iya isigkatawo!

³ Ang Gugma Nagapahulag sa Aton sa Pagbantala: Ang mga nagaaux­il­iary kag bug-os nga tion nga nagapayunir nagapakita gid sing matuod nga gugma sa Dios kag sa isigkatawo. Ang mga payunir dalayon nga nagasakripisyo sang ila tion kag kusog sa pagbulig sa iban sa espirituwal. Ano ang nagapahulag sa ila sa paghimo sini? Ang isa ka payunir nagsiling: “Nahibaluan ko nga ang gugma isa ka bunga sang espiritu sang Dios. Gani kon wala ini mahimo nga wala gid ako sa kamatuoran, kag mahimo nga indi ako magamadinalag-on subong payunir. Ang gugma nagabulig sa akon nga mangin interesado sa mga tawo, nga nakahibalo sang ila mga kinahanglanon, kag nagapasalamat ako nga ang mga tawo nagahulag sa gugma.” Ginpakita ni Jesus ang subong sini nga gugma sa mga tawo. Isa ka bes sang sia kag ang iya nakapoy nga mga disipulo naglakat agod “magpahuway sing diutay,” ang mga kadam-an nag-una sa ila didto. Ano ang ginhimo ni Jesus? “Ginpahulag sing kaluoy para sa ila,” ginpaiway niya ang iya personal nga mga kinahanglanon agod ‘tudluan sila sing madamo nga butang.’​—⁠Mar. 6:​30-34.

⁴ Bisan ginasikway sang mga tawo ang maayong balita nga ginadala naton, may yara kita nasulod nga kalipay, sa pagkahibalo nga, napahulag sing gugma, ginahimo naton ang aton bug-os nga masarangan agod buligan sila nga makatigayon sing kaluwasan. Kon kita tanan pagahukman sa ulihi ni Cristo, malipay gid kita nga ginpakita naton ang matuod nga gugma paagi sa ‘pagtuman sing bug-os sang aton ministeryo.’​—⁠2 Tim. 4:⁠5.