1999-2000 “Matagnaon nga Pulong sang Dios” nga Distrito nga mga Kombension
1 Sang ang mga Israelinhon magasulod pa lang sa Ginsaad nga Duta, si Moises nakitluoy sa ila nga apresyahon ang instruksion sang Dios. Nagsiling sia sa ila: “Indi ini butang nga walay pulos sa inyo, kundi nagakahulugan ini sang inyo kabuhi.” (Deut. 32:45-47) Wala bala kita nagapasalamat kay Jehova nga ang aton kabuhi hamili gid sa iya amo nga padayon niya kita nga ginatuytuyan paagi sa iya bilidhon nga Pulong? Busa malangkagon naton nga ginahulat ang tatlo-ka-adlaw nga “Matagnaon nga Pulong Sang Dios” nga Distrito nga Kombension kag ang ginatigana ni Jehova para sa aton.
2 Sini nga tuig, 52 ka distrito nga kombension ang kombeniente nga ginplano sa 46 ka nagkalainlain nga siudad kag banwa sa bug-os nga Pilipinas. Ang programa sang kombension hiwaton sa Bicol, Cebuano, Hiligaynon, Iloko, Ingles, Pangasinan, Philippine Sign Language, Samar-Leyte, kag Tagalog. Ginapalig-on namon ang tanan nga magtambong sa kombension nga gintangdo sa ila luwas lamang kon may di-kinaandan nga sirkunstansia. Importante ini ilabi na sa Tagalog nga mga kombension sa Quezon City, diin limitado lamang ang pulungkuan kag paradahan sang salakyan. Ang kadamuon sang mga sirkito nga gintangdo sa tagsa ka Tagalog nga kombension sa Assembly Hall iguigo lamang sa kapasidad sang tilipunan, gani kon tuman kadamo ang magginutok, indi ini mangin kombeniente para sa mga natangdo sa pagtambong. Ang imo mahigugmaon nga kooperasyon may kaangtanan sini ginapasalamatan sing daku.
3 Walay duhaduha nga nakahimo ka na sing mga kahimusan agod matambungan ang tanan nga adlaw sang kombension bangod nagapati ka nga si Jehova nagapaabot sa imo sa pagtambong. Makasalig ka nga nakita niya ang indibiduwal nga mga panikasog kag mga sakripisyo nga ginahimo sang iya mga alagad agod makatambong, kag ginadumdom niya ini nga may apresasyon. (Heb. 6:10) Paagi sa pagtambong sa tagsa ka adlaw sang kombension halin sa nagabukas nga ambahanon tubtob sa nagatakop nga pangamuyo, ginapakita naton kay Jehova nga ginapabaloran naton ang iya mga pulong sa aton. (Deut. 4:10) Ginapakita man naton ang apresasyon sa lakas nga pagpangabudlay sang aton madamong kauturan nga nagapanghikot sa paghanda para sa kombension.
4 Ang paghimo sing kahimusan agod magtipon ang linibo ka katawhan sang Dios sa tagsa ka lugar sang kombension nagakinahanglan sing abanse nga pagplano kag maayo nga pag-organisar. Ang paghibalo nga ang mga kahimusan sang kombension mahigugmaon nga ginhimo dapat magpahulag sa aton nga magkooperar, agod “ang tanan nga butang himuon sing nagakaigo kag suno sa kahimusan.” (1 Cor. 14:40) Ang masunod nga impormasyon kag mga pahanumdom ginahatag agod magakadto ka sa inyo kombension nga nakahanda sing maayo sa pagtigayon sing espirituwal nga pagkaon kag Cristianong paghiliupod.
Sa Wala Pa ang Kombension
5 Ang imo bala mga ginatudluan sang Biblia kag iban pa nga mga interesado nagakinahanglan sing bulig sa paghimo sing personal nga mga kahimusan agod makatambong sa kombension? Ang ila makita kag mabatian didto mahimo magpahulag sa ila nga mangin mga sumilimba ni Jehova. (1 Cor. 14:25) Ang mga gulang dapat mangin alisto tuhoy kay bisan sin-o nga nagakinahanglan sing bulig sa transportasyon, ilabi na ang may edad nga mga katapo sang kongregasyon, kag mahigugmaon nga atipanon ang ila mga kinahanglanon.—Gal. 6:10.
6 Sanglit ang First Aid Department sa kombension gintukod sa pag-atipan sa emerhensia nga mga sirkunstansia lamang, ginarekomendar namon nga magdala ka sang imo kaugalingon nga aspirin, mga pangpatunaw, kag kaanggid nga mga butang sa kombension kon ginatan-aw mo nga mahimo ini kinahanglanon. Kon ikaw ukon ang isa ka hinigugma may serioso na nga kahimtangan, subong sang balatian sa tagipusuon, diabetes, ukon katalagman sang mga atake, magdala palihug sing kinahanglanon nga bulong sa kombension agod maatipan ini nga mga kinahanglanon subong sang kon yara ka sa imo balay ukon sa bakasyon. Maalamon nga updan sia pirme sang isa ka katapo sang pamilya ukon sang mahirop nga abyan nga nakahangop sang kahimtangan, kay yara sia sa labing maayo nga kahimtangan sa paghatag sing kinahanglanon nga bulig.
7 Ang mga higayon nga makapanaksi sing di-pormal mahimo gid nga mag-utwas samtang nagalakbay ka pakadto-pakari sa kombension. Handa ka bala sa pagpaambit sang kamatuoran sa iban? Kita tanan, lakip na ang magagmay nga kabataan, mahimo makapakigbahin paagi sa pagtanyag sing mga tract sa mga nagatrabaho sa gasolinahan kag sa iban pa nga masumalang mo sa imo paglakbay. May mga kahigayunan nga mapahamtang ang mga magasin, mga brosyur, kag iban pa nga literatura sa mga interesado. Maghanda sa pagpanaksi sing di-pormal sa mga tawo nga ayhan indi mapanaksihan paagi sa mas kinaandan nga mga paagi sa pagbantala.
Sa Tion sang Kombension
8 Mahimo ka lamang magtigana sing pulungkuan para sa imo pamilya ukon sa mga kaupod sa salakyan. Kon mahimo, ang kombeniente nga mga pulungkuan ireserba sa tigulang nga mga kauturan, kag may mga lugar nga itigana sa mga may sablag kag sa mga naka-wheelchair. Sa pagtaliwan kada adlaw sa imo pulungkuan, pat-ura palihug nga ginadala mo ang tanan mo nga pagkabutang.
9 Mapabawtismo ka bala sa distrito nga kombension? Para sa sesyon sa Sabado sang aga, ang isa ka seksion sang mga pulungkuan ireserba para sa mga kandidato sa bawtismo, kag ang mga attendant magatuytoy sa imo sa sining lugar. Kon mahimo, palihug maglingkod na sa wala pa magsugod ang sesyon. Dalha ang imo Biblia, songbook, tualya, kag maugdang nga balas-on. Ang mga kamiseta nga may mga islogan kag kaanggid nga panapton indi nagakaigo sa sining dungganon nga okasyon. Dapat pat-uron sang mga gulang nga nagarepaso sang mga pamangkot sa Aton Ministeryo nga libro sa mga kandidato sa bawtismo nga nahangpan sang kada isa ini nga mga punto. Sanglit ang bawtismo isa ka simbulo sang personal nga dedikasyon kay Jehova nga Dios, indi nagakaigo nga mag-uyatay sing kamot ang mga kandidato samtang ginabawtismuhan.
10 Mahimo nimo magamit ang kamera, camcorder, kag audiocassette recorder sa kombension. Apang, ang puwesto ukon paggamit sini indi dapat magbalabag sa alagyan, maglipon sa iban, ukon magtublag sa programa. Indi ini dapat itakod sa mga sistema sang koryente ukon tunog.
11 Samtang nagalapnag ang paggamit sing cellular phone kag pager, palihug maghalong nga ini nga mga gamit wala nagatublag sang imo pagpamati sa programa ukon sang konsentrasyon sang mga nagalingkod sa palibot mo. Ining mga gamit indi dapat pagtugutan nga magragingring ukon mag-beep sing mabaskog samtang nagalingkod ka upod sa mga tumalambong. Kon kinahanglan nga maggamit ka sing cellular phone samtang may programa, himua ini palihug sa guwa sang awditoryom.
12 Para sa tion kag sa pagpasimple, ang Sosiedad nagpangabay sa aton sa pagbalon sang aton palanyagahon sa kombension kada adlaw. Ginsunod sang kalabanan nga kauturan ini nga instruksion kag nakita nila nga sa tigpalanyaga, makalingkod sila upod sang ila pamilya kag makaon nila ang ila balon sa sina nga adlaw. Madamo ang nagsiling nga ang higayon nga makapahunayhunay sa tion sang pahuway sa udto kag makapakig-upod sing dugang sa ila mga kauturan makalilipay. Nagakinahanglan ini sang pagbakal sing pagkaon kag ilimnon sing maaga kag sang pagbutang sini sa magamay nga suludlan ukon cooler nga makaigo sa idalom sang pulungkuan. Ginapangabay namon ang tanan nga nagatambong nga sundon ini nga instruksion. Sining karon lang, natalupangdan nga ang iban nga mga kauturan nagalakat kag nagabakal sing pagkaon sa mga manugbaligya sa dalan kag sa malapit nga fast-food nga mga establisamento. Nagapalig-on ini sa madamo pa nga manugbaligya sa dalan sa pagdugok sa guwa sang istadyum, nga ginabangdan sang pagginutok kag malaw-ay nga talan-awon. Busa, ginapangabay namon nga panikasugan sang kada isa nga magbalon sing pagkaon kag ilimnon sa kombension kada adlaw. Ang mga interesado nga nagaupod sa imo sa kombension dapat man magbalon. Ang kristal nga mga suludlan kag alkoholiko nga mga ilimnon wala ginatugot sa mga pasilidad sang kombension.
13 Nahisanto sa ibabaw, indi gid nagakaigo para kay bisan sin-o nga utod nga hingalitan ang kombension paagi sa paghimo sing mga butang nga mabaligya, subong sang mga panghapin sa libro ukon kamiseta, kuyab, ukon kalendaryo nga naimprintahan sang tema sang kombension. Ang mga duog nga ginahiwatan sang kombension nangin isa ka daku nga Kingdom Hall diin wala sing negosyo nga dapat himuon.
14 Makaboluntaryo ka bala sa pagbulig sa pagtinlo sa pasilidad pagkatapos sang mga sesyon kada adlaw? Ukon makapangabudlay ka bala sa isa sang iban pa nga mga departamento sang kombension? Kon makabulig ka, magkadto palihug sa Volunteer Service Department sa kombension. Ang mga kabataan nga ubos sa 16 anyos ang edad ginatugutan sa pagpangabudlay upod sa isa ka ginikanan ukon sa iban pa masaligan nga adulto. Sa pagkamatuod, ang tanan sarang makabulig sa pagtinlo sa pasilidad paagi sa pagpat-od nga ang bisan ano nga basura ginapudyot kag ginahaboy sing nagakaigo.
15 Nakabaton kita sing maayong mga giya sa kon ano ang nagakaigo nga pamayo kag pamustura sa aton mga kombension. Halimbawa: May instruksion kita tuhoy sini sa mga suplemento sang Ang Aton Ministeryo sa Ginharian, may mga ilustrasyon kag mga retrato kita sa aton literatura, kag labing importante sa tanan, may pulong kita ni Jehova sa Biblia. (Roma 12:2; 1 Tim. 2:9, 10) Nahibaluan sang katawhan kon sin-o kita kag kon ngaa nagtipon kita sa ila siudad. Sa amo, ang aton pamayo kag pamustura daku na mismo nga panaksi. Kalabanan sang katawhan ni Jehova nagapahamtang sing maayo nga halimbawa sa sining bahin. Apang, kon kaisa, makita naton ang espiritu sang kalibutan sa pamayo kag pamustura sang iban nga nagatambong sa aton mga kombension. Ang bisan ano nga sahi sang wawa nga panapton nagahimutig sa pangangkon sang isa nga sia espirituwal nga tawo. Ang maugdang, matinlo, mahipid nga dagway amo ang labing makagalanyat. Busa, ang mga ulo sang pamilya dapat magtalupangod kon ano ang ginaplano nga suksukon sang ila mga katapo sang pamilya. Maaplikar man ini kon wala kita sa duog nga ginahiwatan sang kombension. Ang pagsuksok sang aton mga lapel badge sa wala pa kag sa tapos sang mga sesyon nagapakilala man sa aton nga kaupod ni Jehova kag sang iya matinlo nga katawhan.—Ipaanggid ang Marcos 8:38.
16 Ang maalamon nga si Hari Solomon gin-inspirar sa pagsiling nga “ang kabuangan naangot sa tagipusuon sang bata” kag “ang bata nga ginpabay-an nagahatag sing kahuluy-an sa iya iloy.” (Hulu. 22:15; 29:15) Sa tion sang mga sesyon, ginatublag sang wala mabantayan nga kabataan nga mga Saksi ang mga kauturan nga nagapanikasog nga makabenepisyo gikan sa programa. Sa mga kombension sa Estados Unidos sang nagligad nga tuig, ang pila ka bata nakita nga naglingkod sa naibabaw nga seksion sang pulungkuan, nga nagawaras sang laser pointer sa tumalambong. Ang silak gikan sa sining mga pointer makasililaw kag makahalit sa mata, bisan sa malayo. Maathag nga ining mga pamatan-on wala nagapanginpulos gikan sa espirituwal nga programa nga ginhanda nga sila ang ginahunahuna. Sanglit ang mga ginikanan manabat kay Jehova tungod sa paggawi sang ila mga anak, mapat-od sang iloy ukon amay nga ang kabataan nagapahimunong kag nagapamati sa instruksion ni Jehova kon ang mga kabataan nagalingkod upod sa ila. Palapitan sang mga attendant ang bisan sin-o nga nagatublag kag pangabayon nga mag-untat sa paghimo sini, malulo nga nagapahanumdom sa ila sa pagpamati sa programa.
17 Bangod ginaabiabi naton ang publiko sa aton mga kombension, maalamon nga magpangandam may kaangtanan sa mga kabataan kag personal nga mga pagkabutang. Ang aton mga kabataan hamili nga dulot gikan kay Jehova. Apang nahibaluan naton nga ang kalibutan nagapabanaag sang mahingaliton nga kinaiya ni Satanas. Gani, palihug hibalua pirme kon diin ang imo mga anak. Subong man, ang mga kamera, kahita, kag iban pa nga pagkabutang dapat nimo pirme dalhon kag indi pag-ibilin sa pulungkuan. Pat-ura nga ang imo salakyan nakandaduhan, kag ibutang ang personal nga mga pagkabutang sa buli sini ukon dalha ini. Nagabuhin ini sang pagsulay sa isa nga kawatan ang imo salakyan.
18 Makapalig-on makita ang mga kauturan nga nagakuha sing mga nota sa tion sang mga sesyon sa kombension. Ang malip-ot nga mga nota nagabulig sa imo sa pagkonsentrar kag sa pagdumdom sa pangunang mga punto. Ang pagrepaso sa ulihi sang imo mga nota upod sa pamilya ukon mga abyan nagatugot sa imo nga pamalandungan ang talalupangdon nga mga punto sa kombension agod indi ini malipatan.
19 Ang katawhan ni Jehova pirme maalwan sa pag-amot sa teokratikong mga intereses. (Ex. 36:5-7; 2 Cron. 31:10; Roma 15:26, 27) Ang imo boluntaryo nga mga amot sa bug-os kalibutan nga hilikuton ginagamit sa pagbayad sa mga kagastuhanan may kaangtanan sa pag-arkila sa dalagku nga mga pasilidad nga ginahiwatan sang mga kombension. Kon tseke ang imo amot, isulat palihug nga bayaran ini sa “Watchtower.”
20 Suno sa Amos 3:7, si Jehova nagsiling nga “indi [sia] maghimo sing isa ka butang kon indi niya anay mapahayag ang iya kompidensiyal nga butang sa iya mga alagad nga mga manalagna.” Subong “Manugpahayag sang mga tinago,” ginparekord ni Jehova sa Biblia ang ginatos ka tagna nga natuman sing sibu kag bug-os. (Dan. 2:28, 47) Ang daku nga mga saad matuman pa lamang. Ang 1999-2000 nga “Matagnaon nga Pulong Sang Dios” nga Distrito nga mga Kombension magapabakod sang imo pagtuo sa mga saad sang Dios. Pamatii sing maayo ang pulong ni Jehova para sa imo. Iaplikar ang imo makita kag mabatian—sa ministeryo, sa kongregasyon, kag sa imo personal nga kabuhi. Ginapangamuyo namon ang bugana nga pagpakamaayo ni Jehova sa imo tanan nga kahimusan nga matambungan ang tagsa ka adlaw sining bugana, espirituwal nga piesta!
[Blurb sa pahina 3]
Magplano nga tambungan ang bug-os nga adlaw sang Biernes, Sabado, kag Domingo!