Mangin “Diretso [Kita] sa Punto!”
1 Natilawan mo na bala nga ginsapar sang tagbalay ang imo nahanda sing maayo nga presentasyon sing mga pulong: “Ano bala ang tuyo mo? Diretsuha sa punto!” Ano ang matun-an naton gikan sa subong sina nga eksperiensia?
2 Ang madamo nga tawo sa karon indi mapailubon. Luyag nila mahibaluan kon sin-o kita kag kon ngaa nagaduaw kita. Kon mahibaluan gani nila nga ang tuyo sang aton pagduaw amo gali ang paghinun-anon sa Biblia, ayhan indi na sila mamati. Ang pagbasa sa Biblia kag ang espirituwal nga mga paghambalanay indi importante sa kabuhi sang madamo nga tawo. Paano naton makumbinsi ang subong sini nga mga tagbalay nga dapat sila maghinguyang sing pila ka minuto agod hinun-anunan upod sa aton ang isa ka topiko sa Biblia?
3 Kon Ano ang Labing Epektibo: Ang sekreto amo ang pagpakita sa tagbalay nga ang Biblia nagahatag sing praktikal nga mga solusyon sa mga problema nga ginakabalak-an niya kag ang paghimo sini sa pila lamang ka tinaga kon mahimo. Ang labing epektibo nga mga presentasyon nagagamit sing espesipiko nga pamangkot nga gindesinyo agod pahunahunaon ang tagbalay, ginasundan sang isa ka kasulatan nga nagasabat sang pamangkot. Ayhan malipay ka nga tilawan ang pila sang masunod nga mga panugda. Gindesinyo ini agod buligan kita nga ‘magdiretso dayon sa punto’ samtang ginapukaw ang interes sang tagbalay.
4 Sa teritoryo diin ang mga tawo masunson nagasiling nga indi sila interesado, magpautwas sing pamangkot nga nagadalahig sa ila sing personal:
◼ “Samtang nagahinampot kita sa masunod nga milenyo, ikaw bala malaumon ukon maduhaduhaon? [Pasabta sia.] Ang Biblia nagtagna sang makatulublag nga mga hitabo nga makita naton karon subong man sang ila resulta.” Basaha ang 2 Timoteo 3:1, 2, 5 kag Hulubaton 2:21, 22.
◼ “Ginakabalak-an sing daku sa sining pungsod ang pag-atipan sa kapagros. Nakahibalo ka bala nga nagasaad ang Dios nga lubaron niya sing permanente ang tanan nga problema sa kapagros?” Basaha ang Bugna 21:3, 4.
◼ “Paano makabenepisyo, sa banta mo, ang aton komunidad kon ang tanan nga nagapuyo diri nagaaplikar sang mga prinsipio sang Biblia?” Basaha ang Mateo 22:37-39.
5 Sanglit ang aton hilikuton amo ang ibantala ang maayong balita sang Ginharian, kon posible dapat naton ipatalupangod kon ano ang himuon sang Ginharian. Mahimo ka makasiling:
◼ “Nakahibalo ka bala nga gintagna sang pinakadumaan nga libro sa kalibutan, ang Biblia, nga mangin isa na lang ang panguluhan sa bug-os nga kalibutan?” Basaha ang Daniel 2:44.
◼ “Ano, sa banta mo, ang mangin kahimtangan kon maggahom si Jesucristo sa duta?” Basaha ang Salmo 72:7, 8.
6 Sa teritoryo nga sa diin ang mga tawo relihioso, matilawan mo ang isa sining mga introduksion:
◼ “Madamo nga tawo ang nagaantos sing pag-ihig-ihig bangod sang ila relihion ukon duag sang panit. Ano, sa banta mo, ang balatyagon sang Dios sa sining pagpasulabi?” Basaha ang Binuhatan 10:34, 35.
◼ “Nahibaluan naton nga si Jesucristo naghimo sing madamo nga milagro sang panahon niya. Kon mapangabay mo sia sa paghimo sing isa pa ka milagro, ano ini?” Basaha ang Salmo 72:12-14, 16.
7 Kon ang tagbalay nagapangalag-ag sa pagbukas sang ganhaan, mahimo nimo masugdan ang isa ka paghambalanay paagi sa pagsiling:
◼ “Madamo nga tawo sa karon ang natak-an na sa pagpamati sa mga problema. Luyag nila makapamati tuhoy sa mga solusyon. Walay duhaduha nga luyag mo man. Apang diin kita makakita sing tunay nga mga solusyon sa aton mga problema?” Pasabta sia. Basaha ang 2 Timoteo 3:16, 17.
8 Ngaa Indi Ini Tilawan? Sa masami ang isa ka simple, malip-ot nga pamangkot amo lamang ang ginakinahanglan agod mapukaw ang interes sang tagbalay. Ginpadayon sa balay sang isa ka babayi nga nagapamatok anay ang duha ka sister sa tapos namangkot ang isa sa ila: “Malaragway mo bala ang Ginharian nga ginapangamuyo mo sa Pangamuyo sang Ginuo?” Napukaw ang interes sang babayi sa pamangkot, kag nagbaton sia sing pagtuon sa Biblia. Isa na sia karon ka dedikado nga alagad ni Jehova!
9 Kon nagapakighambal sa tagbalay, mangin matuod sa imo ginahambal. Mangin sinsero. Ang mga tawo mahimo nga mamati sing maayo kon makumbinsi sila nga interesado gid ikaw sa ila.—Binu. 2:46, 47.
10 Ang hilikuton nga pagbantala sing maayong balita isa ka hangkat sa karon. Ang pila ka tagbalay maduhaduhaon sa mga estranghero. Ang iban masako kag diutay lamang ang tion. Apang, makapat-od kita nga madamo pa nga takus ang masapwan. (Mat. 10:11) Ang aton mga panikasog nga makita sila mahimo nga mangin mas madinalag-on kon ginahuptan naton ang aton mga presentasyon nga malip-ot kag “diretso sa punto!”