Magasaylo Bala Kamo?
Kon huo ang sabat sa sina nga pamangkot, madamo nga butang ang dapat ninyo kag sang iban himuon. Paagi sa pagsunod sa sadsaran nga mga tikang nga ginbalay sa ubos, gilayon kamo nga makapasibu sa inyo bag-o nga kongregasyon.
(1) Sa tion nga mahibaluan ninyo kon diin kamo masaylo, mahimo makuha sang sekretaryo sang inyo karon nga kongregasyon ang direksion sang Kingdom Hall sang inyo bag-o nga kongregasyon. Pag-abot ninyo sa sina nga lugar, pangitaa gilayon ang tilipunan kag hibalua ang mga oras sang mga miting sang kongregasyon. Kon kapin sa isa ka kongregasyon ang nagagamit sang Kingdom Hall, pamangkuta ang mga gulang kon sa diin nga teritoryo sang kongregasyon kamo nagapuyo. Indi magpalantang sa pagtambong sa mga miting kag sa pagpangilala sa lokal nga mga gulang.
(2) Ang mga sekretaryo sang inyo karon nga kongregasyon kag sang inyo bag-o nga kongregasyon magabuligay sa pagsaylo sang Congregation’s Publisher Record card ninyo sang inyo pamilya. Ipadala man ang isa ka sulat sang pagpakilala sa mga gulang sang inyo bag-o nga kongregasyon. (Tan-awa ang “Pamangkot” sa Marso 1991 nga Ang Aton Ministeryo sa Ginharian.) Ang Congregation Service Committee didto magapahibalo sa nagakaigo nga konduktor sang pagtinuon sa libro tuhoy sa inyo pag-abot agod maduaw kag mabuligan niya kamo nga matultulan ang inyo bag-ong grupo sa pagtinuon sa libro.—Roma 15:7.
(3) Ang tanan nga manugbantala sa inyo bag-o nga kongregasyon may makalilipay nga bahin—ang pangilalahon kag abiabihon kamo. (Ipaanggid ang 3 Juan 8.) Siempre pa, nagakahulugan ini nga dapat kamo magtambong sa mga miting agod maagom ninyo ang makapalig-on kag makapabakod nga paghambalanay upod sa mga kauturan nga lalaki kag babayi.
(4) Indi kamo dapat maghulat nga matapos ang tanan nga hilikuton may kaangtanan sa pagsaylo antes makigbahin sa ministeryo sa latagon upod sa inyo bag-o nga kongregasyon. Samtang ginauna ninyo ang mga intereses sang Ginharian, ang iban pa nga mga butang atipanon, kag mangin komportable gid kamo sa inyo bag-o nga mga palibot. (Mat. 6:33) Kon nakapasibu na kamo sa inyo bag-o nga puluy-an, ayhan luyag ninyo agdahon ang pila gikan sa kongregasyon sa pagduaw kag sa pagkilalahay sing maayo.—Roma 12:13b.
Ang pagsaylo isa ka daku nga proyekto. Apang, kon ang tanan nga nadalahig nagahimo sang kon ano ang ginarekomendar, ang espirituwal nga pag-uswag magapadayon. Ang tanan mahamuot gid sa aton mahigugmaon nga Cristianong paghiliutod.