“Mga Babayi nga Nagapangabudlay sing Lakas sa Ginuo”
1 Paagi sa mga pinamulong sa ibabaw, ginlaragway ni Pablo sanday Trifena kag Trifosa, ang duha ka mapisan nga babayi sa kongregasyon sa Roma. Tuhoy sa isa pa, si Persis, nagsiling sia: “Naghimo sia sing madamo nga pagpangabudlay sa Ginuo.” Ginsambit man niya sing kalahamut-an si Febe subong “manugpangapin sang madamo.” (Roma 16:2, 12) Sa Kasulatan, si Dorcas ginsambit subong isa nga “bugana sa maayo nga mga buhat kag mga dulot sang kaluoy.” (Binu. 9:36) Daw ano nga pagpakamaayo ang espirituwal nga mga babayi sa kongregasyon!
2 Ginaapresyar bala naton ang mga kauturan nga babayi nga nagapangabudlay sing lakas sa aton kongregasyon? Sila ang nagahimo sang kadamuan sang pagbantala nga hilikuton, nagadumala sang kalabanan nga mga pagtuon sa Biblia, kag nagabulig sa madamo sang mga bag-uhan. Nagahinguyang man sila sing madamo nga tion sa pagbulig sa mga kabataan sa pag-uswag sa espirituwal. Ang Cristianong mga babayi nagahimo sang ila bahin sa pagpalig-on sang espiritu sang gugma, kalipay, paghidait, kag kakugi sa kongregasyon. Masinakdagon sila sa madamong paagi agod ang ila mga bana kag ang iban pa nga mga katapo sang pamilya makahimo sing dugang pa sa pag-alagad kay Jehova.
3 Mga Kauturan nga Babayi sa Bug-os Tion nga Pag-alagad: Lakip sa mga nagapangabudlay sing lakas gid sa Ginuo amo ang misyonera nga mga utod, madamo sa ila ang nakigbahin sa pagpauswag sang hilikuton sa mga pungsod sa luwas. Sa mga kongregasyon nga ginaalagaran sang ila mga bana, ang mga asawa sang nagalakbay nga mga manugtatap masako sa ministeryo sa latagon, nagapalig-on sa madamong utod nga babayi. Indi dapat pasapayanan amo ang mga kauturan nga babayi sa Bethel, nga makugi nga nagahimo sing sagrado nga pag-alagad sa pagsuporta sa organisasyon ni Jehova. Kag ang aton regular payunir nga mga kauturan nga babayi, nga paagi sa ila matutom nga mga panikasog sa pagdayaw sa Dios, nagabulig sa linibo sa pagtuon sang kamatuoran.
4 Ining matutom nga mga babayi nalipay sing daku sa ila nagasakripisyo-sa-kaugalingon nga pagkabuhi. (1 Tim. 6:6, 8) Takus sila sa komendasyon kag sa ano man nga pagpalig-on kag suporta nga mahatag naton sa ila.
5 Ang mga Cristianong babayi isa ka bilidhon nga pagkabutang sang organisasyon ni Jehova, nga nagahimo sing matutom nga pag-alagad nga isa ka pagpakamaayo sa tanan. Kabay nga padayon naton nga pabaloran ini nga mga babayi kag ipangamuyo nga pakamaayuhon sila ni Jehova samtang padayon sila nga “nagapangabudlay sing lakas sa Ginuo.”