Sarang Bala Naton Mahimo ang Abril 2000 nga Aton Pinakamaayo Gid nga Bulan?
1 Ang Mierkoles sang gab-i, Abril 19, importante gid sa aton tuig sa pag-alagad. Sa sina nga adlaw, samtang nagatunod ang adlaw sing amat-amat sa bug-os nga duta, ang tanan nga kongregasyon kag grupo sang mga Saksi ni Jehova sa bug-os nga kalibutan magasaulog sang Memoryal sang kamatayon ni Cristo. Bisan diin man nga sona sang oras kita nagapuyo, ang pagdumdom sa halad ni Jesucristo isa gid ka importante nga hitabo sa tuig. Ang petsa sang Memoryal ginmarkahan sa kaupod nga “Teokratikong Kalendaryo Para sa Abril 2000,” nga makita sa pahina 6 sini nga suplemento.
2 Ang bug-os nga bulan sang Abril nagahatag sa aton sing matahom nga kahigayunan agod ipakita sing bug-os kalag ang aton apresasyon sa di-bagay nga kaayo ni Jehova nga ginpabutyag paagi sa paghalad sa iya Anak. Paano? Si apostol Pablo nagsulat: “Ang gugma ni Cristo nagatiklod sa aton, bangod amo ini ang amon ginhukom, nga ang isa ka tawo napatay para sa tanan; gani, nian, ang tanan napatay; kag napatay sia para sa tanan agod nga ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.” (2 Cor. 5:14, 15) Huo, ipakita naton sa Abril nga wala kita nagakabuhi para sa aton kaugalingon kundi para sa iya nga napatay tungod sa aton, ginahimo ini nga ang pinakamaayo gid nga bulan subong mga ministro sang Ginharian!
3 Mag-auxiliary Payunir sa Abril: Si apostol Pablo nagpahamtang sing tumalagsahon nga halimbawa para sa aton sang nagsiling sia: “Wala ko pagkabiga ang akon kalag nga mahal sa akon, agod nga matapos ko lamang ang akon dalaganon kag ang ministeryo nga akon nabaton kay Ginuong Jesus, sa pagpanaksi sing bug-os sa maayong balita sang di-bagay nga kaayo sang Dios.” (Binu. 20:24) May amo man kita nga pribilehiyo sa pagpanaksi sing bug-os tuhoy kay Jehova nga Dios. Bangod sina, luyag naton himuon ang Abril nga aton pinakamaayo gid nga bulan sa pagpanghikot subong auxiliary payunir!
4 Bangod may lima ka talipuspusan nga semana, ang Abril 2000 isa gid ka maayo nga bulan agod magpayunir ang madamo. Sadto anay sang Abril 1997, sang nalab-ot naton ang aton pinakamataas gid nga kadamuon sang mga auxiliary payunir, ang 22,410 nga nagpayunir nagrepresentar anay sa 18 porsiento sang kabug-usan nga mga manugbantala. Duha ka tuig kag tunga sang ulihi, ang kabug-usan nga kadamuon sang mga manugbantala nga nagreport sang Oktubre 1999 nagdugang sing halos 6 porsiento. Nagakahulugan ini nga mahimo gid naton labawan ang aton nagligad nga pinakamataas nga kadamuon sang mga auxiliary payunir. Dugang pa, ang kinahanglanon nga oras ginbuhinan na sugod sadto, nagahimo sini nga bahin sang pag-alagad nga bukas sa madamo pa sa kongregasyon. Dapat binagbinagon sing mapangamuyuon sang tagsa ka bawtismado nga manugbantala kon bala sarang sia makaauxiliary payunir sini nga Abril.
5 Nagagamit sang “Teokratikong Kalendaryo Para sa Abril 2000” sining suplemento, planuha ang imo iskedyul karon para sa masunod nga bulan. Magpamat-od kon ano nga mga adlaw ikaw makapakigbahin sa pag-alagad sa latagon, kag tinguba ang tanan nga oras nga sa banta mo mahinguyang mo sa pagbantala nga hilikuton sa sina nga bulan. Ilakip ang oras nga mahinguyang mo sa pagpanaksi sa iban sa pormal kag di-pormal. Ang kabug-usan bala malapit sa kinahanglanon nga 50 ka oras para sa mga auxiliary payunir? Kon kulang ang imo oras, mabag-o mo bala ang imo iskedyul agod mabakal mo ang tion sa pag-auxiliary payunir? Kinahanglan mo ang promedyo nga isa ka oras kag 40 minutos lamang kada adlaw agod malab-ot ang 50 ka oras sa isa ka bulan.
6 Karon nga ang kinahanglanon nga oras ginpanubuan man para sa mga regular payunir, nabinagbinag mo na bala ang magsulod sa bug-os tion nga pag-alagad? Ngaa hulaton pa ang Septiembre agod magsugod? Ang Abril isa ka maayo gid nga bulan sa pagsugod! Kon indi ka sigurado sa imo ikasarang sa paglab-ot sa 70-ka-oras nga kinahanglanon para sa mga regular payunir, ngaa indi anay mag-auxiliary payunir sa Abril kag himuon ang 70 ka oras subong imo tulumuron? Sa tion nga makita mo nga masarangan mo ini, mahimo gid ikaw makaaplay sa pagbuylog sa grupo sang mga regular payunir sa gilayon.—Tan-awa ang —Aton Ministeryo, pahina 113-14.
7 Makigbahin sing Bug-os Subong Isa ka Manugbantala sing Maayong Balita: Para sa aton tanan, mga manugbantala man kag mga payunir, ang aton matuod nga gugma sa Dios kag sa isigkatawo nagapahulag sa aton nga mangin bug-os kalag sa paghimo sang tanan nga aton masarangan sa pag-alagad kay Jehova suno sa aton personal nga mga kahimtangan. (Luc. 10:27) Busa ginapakita naton nga “nagapangabudlay kita sing lakas kag nagapanikasog, bangod ginpahamtang naton ang aton paglaum sa buhi nga Dios, nga amo ang Manluluwas sang tanan nga sahi sang mga tawo, labi na sang mga matutom.” (1 Tim. 4:10) Amo ina kon ngaa dapat kita magpaabot nga makita ang 100-porsiento nga pagpakigbahin sa Abril, nga ang tanan nagapakigbahin sing bug-os sa hilikuton sang Ginharian.
8 Indi naton pagkalimtan ang laygay ni Jesus: “Ang alanyon bugana, apang pila lamang ang mga mamumugon. Busa, pakitluoy kamo sa Agalon sang alanyon agod magpadala sia sing mga mamumugon sa iya alanyon.” Sa gilayon sa tapos mahambal ina, gintawag ni Jesus ang iya 12 ka apostoles kag ginpalakat sila sa pagbantala. (Mat. 9:37, 38; 10:1, 5, 7) Mga isa ka tuig sang ulihi, sa tapos mahanas sing maayo ang 12 sa pagbantala nga hilikuton, si Jesus “nagtangdo sing kapituan pa kag ginpadala sila,” naghatag sa ila sang pareho nga mga instruksion: “Sa pagkamatuod, ang alanyon bugana . . . Busa pakitluoy kamo sa Agalon sang alanyon nga magpadala sing mga mamumugon sa iya alanyon.” (Luc. 10:1, 2) Ang tulun-an sang Binuhatan sa Biblia nagareport kon paano ginsabat ni Jehova yadto nga mga pangamuyo. Sang Pentecostes 33 C.E., ang kadamuon sang mga disipulo naglab-ot sa mga 120. Nian, ang alagisod nga kataason nga 3,000 kag 5,000 ka disipulo nalab-ot. (Binu. 1:15; 2:41; 4:4) Pagkatapos sadto, “ang kadamuon sang mga disipulo padayon nga nagdamo.” (Binu. 6:7) Subong man, sa karon nga dag-on, dapat kita magpadayon sa pagpakitluoy sa Agalon para sa dugang pa nga mga manugbantala sang Ginharian! Nahisuno sa aton mga pangamuyo, ang tagsa ka manugbantala sa kongregasyon dapat maghimo sing espesipiko nga mga kahimusan sa pagpakigbahin sa ministeryo kada bulan.
9 Palihug tan-awa liwat ang kaupod nga “Teokratikong Kalendaryo Para sa Abril 2000.” Sanglit Sabado kag Domingo ang nahaunang duha ka adlaw sang bulan, makaplano ka bala sa pagpakigbahin sa pag-alagad sa sinang talipuspusan sang semana, nagasugod sing maaga sa bulan? Masuportahan mo bala ang tagsa ka “Adlaw Sang Magasin” sa bulan upod sang imo grupo sa Pagtinuon Sang Kongregasyon sa Libro? Kamusta naman ang paghinguyang sing isa ka oras ukon kapin pa kada Domingo sa ministeryo? Makahimo ka bala sing kahimusan sa pagpakigbahin sa pila ka pagpanaksi sa gab-i? Kag indi pagkalimti nga himuslan ang imo tanan nga higayon sa pagpanaksi sing di-pormal sa trabaho, sa eskwelahan, ukon samtang nagahimo sang iban pa adlaw-adlaw nga mga hilikuton. Markahi ang mga adlaw nga makahinguyang ka sing pila ka tion sa ministeryo, kag gamita ang kalendaryo sa pagrekord sang imo oras sa pag-alagad para sa bulan.
10 Ang Abril isa gid ka maayo nga tion para sa tanan nga kalipikado kag naaprobahan sang mga gulang sa pagsugod sa pag-alagad subong di-bawtismado nga mga manugbantala. Kon may ginatun-an ka sa Biblia, nag-uswag na bala sia sing nagakaigo agod mapalapitan niya ang nagadumala nga manugtatap sa pagpangabay nga makabig subong isa ka manugbantala sing maayong balita? Kon ikaw may di-bawtismado nga mga kabataan, ginpakighambal mo na bala upod sa mga gulang ang ila espirituwal nga pag-uswag? Indi bala ini ang maayo nga tion para magsugod sila sa pagbantala?—Tan-awa ang Aton Ministeryo, pahina 97-100.
11 Sa panikasog naton nga himuon ang Abril 2000 nga aton pinakamaayo gid nga bulan, kita tanan dapat makigbahin sa ministeryo kag nian ihatag ang aton report sa pag-alagad sa latagon sa katapusan sang bulan. (Ipaanggid ang Marcos 6:30.) Ang bag-ong di-bawtismado nga mga manugbantala nga nagapakigbahin sa pag-alagad sa latagon sa nahauna nga tion dapat palig-unon nga ireport sa gilayon ang ila hilikuton. Paagi sa paghimo sang aton bahin, makaamot kita sing maayo sa report sa Abril kag sa daku nga singgit sang pagdayaw nga idulot kay Jehova paagi sa aton mga panikasog sa pagpanaksi.
12 Upda ang Iban Pa sa Memoryal: Indi bala kita malipay nga makita ang bag-ong kataason sa tumalambong sa Memoryal sang kamatayon ni Cristo sa 2000? Huo! Bangod magakahulugan ini nga ang kalabanan nga mga tawo magatipon sa pagpakita sang ila pasalamat sa labing daku nga mga pagpakita sing gugma nga ginhimo ni Jehova nga Dios kag ni Jesucristo para sa aton! (Juan 3:16; 15:13) Maghimo sing bisan ano man nga mga kahimusan nga kinahanglan agod wala sing makapugong sa imo kag sa imo pamilya sa pagtambong sa Memoryal.
13 Karon man ang tion sa pagsugod sa pag-agda sa iban sa Memoryal. Maghimo sing listahan sang tanan nga luyag mo nga magtambong. Ilakip ang bisan sin-o nga nagtuon anay sa Biblia, ang mga nagatuon karon, kag ang tanan sang mga ginaduaw mo liwat. Idugang sa listahan ang imo mga kakilala sa trabaho, sa eskwelahan, kag sa komunidad, subong man ang bisan sin-o sang imo transaksion sa negosyo. Indi pagkalimti nga ilakip ang iban nga mga kakilala kag ang imo mga paryente. Sa tapos mahimo ang listahan, sugdi nga agdahon sing hanuot kag sing personal ang kada isa. Athaga kon san-o kag kon diin hiwaton ang Memoryal. Samtang nagahilapit ang Abril 19, pahanumduma ang mga yara sa imo listahan, sing personal man ukon sa telepono. Agdaha sila nga mag-upod sa imo sa Memoryal sa sina nga gab-i.
14 Nahisuno sa nagligad nga direksion gikan sa Sosiedad, ang hubon sang mga gulang magapanikasog sing pinasahi nga palig-unon ang tanan di-aktibo nga mga manugbantala sa teritoryo sa pagtambong sa Memoryal. (Mat. 18:12-14) Mahimo repasuhon sang mga gulang ang Pebrero 2, 1999 nga sulat sang Sosiedad. Ang sekretaryo sang kongregasyon magalista sang tanan nga di-aktibo nga mga manugbantala, kag ang manugtatap sa pag-alagad magatangdo sa mga gulang sa pagduaw sa ila kag sa pag-agda sa ila sa Memoryal. Ayhan paagi sa makapalig-on nga nagabantay nga pagduaw sing mas maaga kon mahimo pa, ining mga di-aktibo mabuligan nga mangin aktibo liwat sa ministeryo sa latagon, bisan sa Abril. Makapalig-on gid para sa ila nga agdahon sa pag-upod sa isa ka eksperiensiado nga manugbantala sa pag-alagad sa latagon.
15 Palig-una ang Maayo nga Suporta Para sa Abril! Magakinahanglan sing maayo nga paghituhog sa bahin sang tanan nga gulang, ministeryal nga mga alagad, kag mga padre-de-pamilya nga himuon ang Abril 2000 nga aton pinakamaayo gid nga bulan. Ang mga gulang mangin makugi sa pag-organisar sang tanan nga butang kag sa pagpanguna. (Heb. 13:7) Ang praktikal nga mga kahimusan dapat himuon para sa mga miting sa pag-alagad sa latagon sa ordinaryo nga mga adlaw kag sa mga talipuspusan sang semana. Mahimo himuon ang dugang nga mga miting sa pag-alagad para sa hilikuton sa hapon kag sa kasisidmon. Ang kompleto nga iskedyul sang tanan nga ginaplano para sa Abril dapat ibutang sa information board. May isa nga dapat tangduan sa pagpanguna sa naiskedyul nga miting sa pag-alagad. Dapat maghanda sing bastante nga teritoryo agod may makobrehan ang tagsa ka grupo.
16 Sa Abril ang mga magasin nga Lalantawan kag Magmata! itanyag. Sa panikasog nga makasugod sing mga pagtuon sa Biblia sa puluy-an, ang Ginapatuman nga brosyur itanyag sa tanan nga nagapakita sing interes. Gani, ang nagakaigo nga suplay sang mga magasin kag mga brosyur dapat iaman.
17 Sa katapusan sang bulan, ang tanan nga konduktor sa pagtinuon sa libro kag ang ila mga kabulig magapalig-on sang kada isa sa ila grupo sa paghatag sa gilayon sang report sa pag-alagad sa katapusan sang bulan. Ayhan sarang ini himuon sa Domingo, Abril 30. Nian, sa pagsuma sang sekretaryo sa mga report, kon makita niya nga ang pila ka manugbantala wala pa makahatag sang ila report, mainayuhon nga pahanumdumon niya sila nga ihatag ini antes ang Mayo 6, sa tion nga isumiter niya ang report sang kongregasyon sa Sosiedad. Mahimo niya pabuligon ang mga konduktor sa pagtinuon sa libro sa pagpakig-angot sa indibiduwal nga mga manugbantala.
18 Ang panahon sang Memoryal amo ang pinakaimportante nga tion sa sulod sang isa ka tuig para sa katawhan sang Dios. Isa gid ini ka masako nga tion para sa aton tanan sa pag-alagad kay Jehova. Mangin amo gid ini kon ang tanan makigbahin sing bug-os subong manugbantala sing maayong balita, kon ang tanan nga sarang makaauxiliary payunir magahimo sini, kag kon makugi naton nga updon ang iban pa sa Memoryal sang kamatayon ni Cristo. Hanuot naton nga ipangamuyo ang bugana nga pagpakamaayo ni Jehova samtang nagapanikasog kita nga himuon ang Abril 2000 nga ang aton pinakamaayo gid nga bulan, ang tanan sa kadayawan kag himaya sang Dios!—Heb. 13:15.
[Kahon sa pahina 3]
Ang Aton Pinakamataas Gid nga Kadamuon:
22,410 ka Auxiliary Payunir
(Abril 1997)
[Kahon sa pahina 4]
Ang Aton Pinakamataas Gid nga Kadamuon:
133,297 ka Kabug-usan nga Manugbantala
(Nobiembre 1999)
[Kahon sa pahina 5]
Ang Aton Pinakamataas Gid nga Kadamuon:
407,094 ka Tumalambong sa Memoryal
(1999)