Nagabatas Ka Bala?
1 “Wala na ako sing daku pa nga rason sa pagpasalamat sangsa sining mga butang, . . . nga ang akon mga anak padayon nga nagalakat sa kamatuoran.” (3 Juan 4) Ang pagkamabinatason sang espirituwal nga mga anak ni Juan nagpahalipay sa iya sing daku. Mahimo gid nga nalipay ang aton langitnon nga Amay nga makita ang minilyon sang iya palaabuton nga mga anak nga “padayon nga nagalakat sa kamatuoran”!—Hulu. 23:15, 16; 27:11.
2 Samtang ang katawhan sang Dios sa kabilugan nagapadayon sa makugi nga Cristianong hilikuton, ang iban amat-amat nga naghinay. Bisan pa nga nangin mapagsik anay sila sang una nila nga natun-an ang kamatuoran, sa pagligad sang mga tuig, nangin kontento na lamang sila sa pagpakigbahin sing diutay ukon sing panalagsa sa hilikuton nga paghimo sing disipulo.
3 Sing halangpunon, ang iban naghinay bangod sang mga limitasyon sa pisikal kag sang mga epekto sang katigulangon. Walay sapayan sina, dapat sila dayawon bangod sang ila pagkamabinatason. Ginahimo nila ang ila masarangan. Apang dapat pamangkuton sang kada isa nga nagdedikar sang iya kabuhi sa Dios ang iya kaugalingon: ‘Gintugutan ko bala ang akon kaugalingon nga magkonsentrar sing daku sa personal nga mga paghimud-os amo nga ang mga intereses sang Ginharian may diutay na lamang nga bahin sa akon kabuhi? Nangin “maalabaab” bala ako, ukon nagapanikasog bala ako gihapon “sing lakas”?’ (Bug. 3:15, 16; Luc. 13:24) Kabay nga mapangamuyuon nga binagbinagon naton tanan kon ano ang aton ginahimo kag maghimo sing pagbag-o kon kinahanglanon, nagadumdom nga si Jehova nagasaad sa paghatag sing “himaya kag dungog kag paghidait para sa tagsatagsa nga nagahimo sing maayo.”—Roma 2:10.
4 Kon Paano Magbatas: Ano ang nakabulig kay Jesus sa pagbatas? Si Pablo nagpaathag: “Tungod sa kalipay nga ginbutang sa iya atubang nagbatas sia sing usok sang pag-antos, nga nagatamay sang kahuluy-an, kag naglingkod sa tuo nga kamot sang trono sang Dios.” (Heb. 12:1-3) Ang kalipay nga ginbutang sa atubang ni Jesus nagalabaw sa umalagi nga mga pagtilaw nga dapat niya atubangon. Ang pagdumdom sa kalipay nga ginbutang sa atubang naton makabulig sa aton nga magbatas man. (Bug. 21:4, 7; 22:12) Kon maglaum kita kay Jehova sa paghatag sa aton sing kusog paagi sa personal nga pagtuon, tayuyon nga pagtambong sa mga miting, kag dalayon nga pangamuyo, makapadayon kita sa hilikuton nga ginhatag niya sa aton nga himuon.
5 Si Jehova nagakalipay sa pagkamabinatason sang mga mainunungon sa iya. Gani dugangan naton ang iya kalipay paagi sa padayon nga ‘paglakat sa kamatuoran.’