Pamangkot

◼ San-o ang nagakaigo nga tion agod magtukod sing isa pa ka grupo sang Pagtinuon sang Kongregasyon sa Libro?

Ang pagtukod sing isa ka bag-ong grupo dapat binagbinagon kon ini kinahanglanon agod huptan ang tumalambong sa mga 15 ukon kubos pa sa tagsa ka lugar nga ginahiwatan sang pagtinuon sa libro, pati na sa Kingdom Hall. Ngaa ginarekomendar ini?

Kon ang mga grupo sa Pagtinuon Sang Kongregasyon sa Libro ginahuptan nga diutay, mas mahatagan sing igtalupangod sang konduktor ang tagsatagsa nga nagatambong. Isa pa, ang tanan may nagakaigo nga higayon agod makakomento sa isa ka palibot nga nagakabagay sa pagpahayag sing dayag sang ila pagtuo. (Heb. 10:​23; 13:15) Bangod may mas diutay nga mga grupo sa pila ka lugar sa bug-os nga teritoryo sang kongregasyon, ang pagtambong sa Pagtinuon Sang Kongregasyon sa Libro kag mga miting antes mag-alagad sa latagon mas kombeniente. Natukiban sang mga kongregasyon, nga nagdugang sang kadamuon sang mga lugar nga ginahiwatan sang pagtinuon, nga ang kabug-usan nga nagatambong sa pagtinuon sa libro nagdugang man.

Mahimo may yara pinasahi nga mga kahimtangan nga nagakaigo agod magtukod sing isa pa ka grupo, bisan pa nga ini diutay lamang. Matuod ini sa nabaw-ing nga lugar ukon diin man nga ang karon nga ginatipunan gutok kag kulang sing nagakaigo nga pulungkuan. Kon kinahanglanon, mahimo matukod ang isa ka grupo nga nagatipon sa adlaw para sa kaayuhan sang mga tigulang, mga nagatrabaho sa gab-i, ukon sang mga kauturan nga babayi nga indi Saksi ang ila mga bana.

Ang tagsa ka grupo sang pagtinuon sa libro dapat nga may gintangdo nga pila ka mabakod sa espirituwal kag aktibo nga mga manugbantala kag kalipikado man nga konduktor kag manugbasa. Dapat himud-usan sang mga kauturan nga lalaki nga pun-an ini nga mga kinahanglanon sa kongregasyon.

Mapasanyog sang mga gulang ang pag-uswag sang kongregasyon paagi sa pagpat-od nga ang mga grupo sang pagtinuon sang kongregasyon sa libro iguigo lang sing kadakuon kag ginaatipan sing maayo sa espirituwal kag nga sila nagatipon sa kombeniente nga mga lugar. Kon praktikal, ang bag-ong mga grupo dapat tukuron agod makahimulos ang tanan sa mga benepisyo sining pinasahi nga kahimusan sa espirituwal. Matan-ay mo bala ang imo puluy-an subong isa ka lugar para hiwatan sang pagtinuon sa libro? Madamo sang naghimo sini ang nakaagom sing espirituwal nga mga pagpakamaayo.