Hupti ang Kalingawan sa Nagakaigo nga Duog Sini
1 Sa sining mabudlay nga mga adlaw, dapat naton bag-uhon sa tion kag tion ang lakat sang aton pangabuhi. Ang paglingawlingaw nagakaigo. Apang, ang sobra kadamo nga tion nga ginahinguyang sa kalingawan, pagliwaliwa, kag pag-inupdanay mahimo magresulta sa paghinguyang sang isa sing nagadiutay nga tion sa espirituwal nga mga paghimud-os. Dapat naton huptan ang kalingawan sa nagakaigo nga duog sini. (Mat. 5:3) Paano ini posible? Paagi sa pagsunod sa laygay nga makita sa Efeso 5:15-17.
2 Magtalana Sing mga Limitasyon: Si Pablo nagsulat nga ang mga Cristiano dapat ‘magpadayon sa pagbantay sing maayo’ kon paano sila maalamon nga nagakabuhi. Ang paghaganhagan kag pagpugong sa kaugalingon kinahanglan agod limitehan ang tion sa paglingawgaw sa kon ano gid ang kinahanglan. Nagakaigo nga hunahunaon sing serioso kon paano naton ginagamit ang tion nga indi kita masako. Ang kalingawan dapat may mapuslanon nga katuyuan sa baylo nga magpabatyag sa aton nga gin-uyangan naton ang aton tion ukon magpakapoy sa aton. Kon indi kita malipayon, indi kontento, kag daw nagbatyag nga nakasala pagkatapos nga himuon ang isa ka butang, nagapakita ini nga dapat naton bag-uhon ang aton paggamit sing tion.
3 Mangin Makatarunganon: Naglaygay si Pablo tuhoy sa ‘pagbakal sang nagakaigo nga tion’ para sa mas importante nga mga butang sa kabuhi, nga indi mangin “di-makatarunganon.” Indi pagtugutan sang dedikado nga mga Cristiano ang ila kabuhi nga masentro sa kalingawan. Bisan pa ang pahuway kag pagliwaliwa makapapagsik sa aton lawas, ang ginahalinan sang espirituwal nga enerhiya amo ang aktibo nga kusog sang Dios. (Isa. 40:29-31) Mabaton naton ang iya espiritu may kaangtanan sa teokratikong mga hilikuton—pagtuon sa Biblia, pagtambong sa mga miting sang kongregasyon, pagpakigbahin sa pag-alagad sa latagon—indi paagi sa kalingawan.
4 Magtalana Sing mga Prioridad: Ginsugo ni Pablo ang mga Cristiano nga ‘padayon nga hangpon kon ano ang kabubut-on ni Jehova.’ Si Jesus nagtudlo nga ang aton mga hilikuton dapat nasentro sa Ginharian sang Dios subong ang aton prioridad sa kabuhi. (Mat. 6:33) Kinahanglan nga unahon naton ang mga butang nga magapahanugot sa aton nga magkabuhi suno sa aton dedikasyon kay Jehova. Pagkatapos sini, ang tion sa paglingawlingaw mahimo huptan sa nagakaigo nga duog sini. Kon mahimo ini, may maayo nga epekto ini, kag labi pa kita nga malipay sa sini.—Manugw. 5:12.