Ginahimo Mo Bala ang Imo Ministeryo sing Maid-id?

¹ Sa tulun-an sang Mga Binuhatan, ginasugiran kita nga ginhimo sang mga disipulo ni Jesus ang ila ministeryo paagi sa ‘pagpanaksi sing maid-id’ sa mga tawo. (Binu. 2:40; 8:25; 28:23) Amo gid sina ang tulumuron ni apostol Pablo. (Binu. 20:24) Indi bala nga amo ini ang imo tulumuron subong ministro sang maayong balita? Paano mo ini himuon?

² Handai ang Imo Presentasyon: Agod mapat-od nga nagapanaksi ka sing maayo sa ministeryo, ang paghanda importante. Matuod ini ilabi na kon nagatanyag sing mga magasin, kay ang topiko pirme bag-o. Agod buligan kita nga masangkapan sing mas maayo, ginapakilala sini nga guwa sang Ang Aton Ministeryo sa Ginharian ang isa ka bag-o nga bahin​—⁠ang kolumna sa wala, nga nagalista sang huwaran nga mga presentasyon para sa bag-o nga Lalantawan kag Magmata! nga mga magasin. Ang isa ka sibu-sa-tion nga topiko nga magaganyat sa madamo nga tawo ipatalupangod sa tagsa ka guwa. Paano mo pauswagon ining malip-ot nga mga presentasyon?

³ Magpili sing isa ka panugda nga sa banta mo labing epektibo sa inyo teritoryo. Basaha sing maayo ang artikulo, kag tandai ang espesipiko nga mga punto nga mahimo makapukaw sing interes. Mangita sing isa ka teksto sa magasin nga nahisanto sa ginahambalan kag mahimo mo mabasa sa tagbalay. Idugang ang isa ka malip-ot nga konklusion sa pagpalig-on sa nagapamati sa imo nga basahon ang magasin kag kon nagakaigo, ang malip-ot nga pulong nga ang tagbalay mahimo makaamot sa bug-os kalibutan nga hilikuton sang mga Saksi ni Jehova. Karon, ensayuha ang imo presentasyon.

⁴ Magplano sa Paggamit Sing Biblia: Paagi sa maayo nga pagplano, ang isa ka kasulatan masami nga malakip sa imo presentasyon. Halimbawa, ang eksperiensiado nga mga manugbantala sa madamo nga lugar madinalag-on nga nagapamalaybalay nga nagauyat sing Biblia, nagatamyaw sa tagbalay, kag nagasiling:

◼ “Ginapamangkot namon ang mga tawo kon nagapati sila sa sini . . .” Basaha ang Genesis 1:​1, kag nian mamangkot: “Nagaugyon ka bala sa ginasiling sini?” Kon nagaugyon sia, nian magsiling: “Ako man. Apang, nagahunahuna ka bala nga kon ang tanan nga butang gintuga sang Dios, sia man ang manabat sa kalautan?” Sa tapos kilalahon ang iya sabat, basaha ang Manugwali 7:29. Buksi ang Ihibalo nga libro sa pahina 71, kag basaha ang parapo 2. Palig-una sia nga basahon ang libro. Kon ang tagbalay wala nagaugyon sa ginasiling sang Genesis 1:​1, palig-una sia nga usisaon ang Creation nga libro.

⁵ Tatapa ang Tanan nga Interesado: Indi mo matuman sing bug-os ang imo ministeryo kon wala mo ginatatap ang interesado nga nasalapuan. Kon maayo ang inyo paghambalanay, nakapahamtang ka man sing magasin ukon sing iban nga literatura, isulat ang iya ngalan kag direksion. Tinguhai sing maukod nga palambuon ang iya interes paagi sa pagduaw liwat sa gilayon. Magtanyag gid sing isa ka pagtuon sa Biblia.

⁶ Nahibaluan sang unang-siglo nga mga disipulo nga ginsugo sila ni Jesus nga ‘magpanaksi sing maid-id.’ (Binu. 10:42) Ini man nga sugo naaplikar sa aton, kay amo lamang ini ang paagi nga makahimo kita sing mga disipulo. (Mat. 28:​19, 20) Himuon naton ang aton bug-os nga masarangan agod matuman sing maid-id ang aton ministeryo.​—⁠2 Tim. 4:5.