Ang Pagbantala sang Ginharian Nagabulig sa Pagluwas sang mga Kabuhi!

¹ Amo ini ang pinakaimportante nga hilikuton nga ginahimo sa kalibutan karon. Ginatuon ni Jehova nga Dios, ni Jesucristo, kag sang linaksa nga anghel ang ila igtalupangod sa sini. Ano bala ini, kag ngaa importante ini? Amo ini ang pagbantala sang Ginharian, kag nagabulig ini sa pagluwas sang mga kabuhi!​—Roma 1:​16; 10:​13, 14.

² Ang iban nga tawo nagahunahuna nga mas makabulig kita sa iban kon madalahig kita sa mga hilikuton sa pagpauswag sining aton kalibutan. Madamo ang nangin masako katama sa mga panikasog nga makatigayon sing paghidait, mabulong ang mga balatian, ukon mapauswag ang ekonomiya. Apang ano gid bala ang makabulig sing labi sa mga tawo?

³ Isa ka Importante Katama nga Hilikuton: Ang mensahe lamang sang Ginharian ang makapaathag sang katuyuan sang kabuhi, sang kabangdanan sang pag-antos, kag sang lamang masaligan nga paglaum sa palaabuton. Ang maayong balita nagabulig sa mga tawo nga mangin mga abyan ni Jehova kag sa amo makabaton sang “paghidait sang Dios nga nagalabaw sa tanan nga panghunahuna.” (Filip. 4:7) Ang mensahe lamang sang Ginharian ang makahatag sing praktikal nga panuytoy nga makabulig sa mga tawo nga malandas ang mga problema sang kabuhi sa karon kag nagapaathag kon paano makapabilin nga buhi kon laglagon na ang malaut nga kalibutan sa palaabuton. (1 Juan 2:​17) Indi bala nga ining mga butang takus gid sang aton kapisan sa pagbantala sang Ginharian?

⁴ Sa pag-ilustrar: Ano bala ang pinakamaayo nga paagi nga mabuligan ang nagakatulog nga mga pumuluyo sang isa ka minuro nga nabutang sa peligro sang isa ka dam nga malapit na mawasak? Sag-ahan ang gabok na nga dam? Patahumon ang komunidad nga malapit na malaglag? Indi! Ang mga pumuluyo dapat mapukaw, paandaman sang nagahilapit nga kalamidad, kag buligan nga makapalagyo! Ang mga nagakatulog karon sa espirituwal yara sa serioso katama nga katalagman. (Luc. 21:34-​36) Sanglit ining sistema sang mga butang malapit na magtaliwan, tinguhaan gid naton nga magbantala sing may pagkahilingagawon sa tanan naton nga masarangan!—2 Tim. 4:2; 2 Ped. 3:11, 12.

⁵ Magpadayon sa Sini: Mangita kita sing mga paagi nga malab-ot ang madamo pa nga sinsero nga mga tawo sing maayong balita​—sa ila mga puluy-an, sa mga higad-dalan, sa telepono, kag sing di-pormal. Ang ginapahimo sa aton ni Jehova amo ang labing importante nga hilikuton nga mahimo naton. Kon ginahimo naton ini sing makugihon, ‘maluwas naton ang aton kaugalingon kag ang mga nagapamati sa aton.’​—1 Tim. 4:​16.