“Luyag” Mo Bala Magbulig sa Iban?
1 Nagaulikid gid si Jesus sa mga tawo. Sang nakitluoy sing bulig ang isa ka aruon sa iya, gin-untay ni Jesus ang iya kamot, gintandog ang tawo, kag nagsiling: “Luyag ko. Magmatinlo ka.” (Mar. 1:40-42) Sa anong mga paagi naton mailog ang panimuot ni Jesus sa pagbulig sa iban?
2 Ang Interesado nga mga Tawo: Ang tagsa ka katapo sa kongregasyon may yara bahin sa pagbulig sa mga interesado nga mangin mga sumilimba ni Jehova. Kon may mga bag-uhan nga magtambong sa mga miting, tamyawa sila kag pangilalaha. Mangita sing mga paagi nga mapalig-on sila. Dayawa ang ila mga komento. Dayawa ang ila mga panikasog sa pag-aplikar sang mga prinsipio sang Biblia sa ila kabuhi. Buligi sila sa pagpangita sing matuod nga mga abyan sa sulod sang kongregasyon.
3 Ang Masigkatumuluo: Ang labi nga dapat gid naton buligan sa madamo nga paagi amo ang “mga may labot sa aton sa pagtuo.” (Gal. 6:10) Madamo ang nagaatubang sang mga problema sa panglawas. Paagi sa paghimo sing makapalig-on nga pagduaw sa ila, makabenepisyo sila sa imo pagpakig-upod kag ayhan makabulig ka sa praktikal nga mga paagi. Ang pila mahimo nagaatubang man sing iban pa nga kabudlayan sa ila kabuhi. Ipakita ang imo kabalaka paagi sa pagpamati sa ila kag sa pagpalig-on sa ila. (1 Tes. 5:14) Kinahanglan man sang mga gulang ang aton kooperasyon samtang ginahimo nila ang ila mga katungdanan. (Heb. 13:17) Paagi sa pagpakita sing isa ka handa kag mabinuligon nga espiritu, mangin “nagapabakod nga bulig” kita sa aton mga masigkatumuluo.—Col. 4:11.
4 Ang mga Katapo sang Pamilya: Dapat man naton ilugon ang kabalaka ni Jesus sa mga tawo sa pagpakig-angot naton sa mga katapo sang aton pamilya. Ang daku nga kabalaka amo ang nagapahulag sa mga ginikanan sa ‘padayon nga pagpadaku sang ila mga anak sa disiplina kag sa nagatadlong nga panghunahuna ni Jehova.’ (Efe. 6:4) Makabulig man ang mga anak paagi sa paghanda gilayon kon tion na sang pagtinuon sang pamilya, mga miting sang kongregasyon, ukon pag-alagad sa latagon. Sarang man mapabanaag sang dalagku nga mga anak ang kahanuklog ni Jesus paagi sa pagbulig sa ila mga ginikanan nga nagaluya na bangod sang katigulangon. Sa sini, kag sa iban pa nga paagi, kita tanan sarang “makahimo sang diosnon nga debosyon sa [aton] kaugalingon nga panimalay.”—1 Tim. 5:4.
5 Ang pag-ilog naton kay Jesus sa pagbulig sa iban, mahimo makabulig sa pagbuhin sang mga problema kag nagapasuod sang aton pamilya kag sang kongregasyon. Labing importante sa tanan, mapadunggan naton si Jehova, “ang Amay sang mapinalanggaon nga mga kaluoy.”—2 Cor. 1:3.