Pamangkot

◼ Ano ang dapat naton dumdumon kon nagagamit sing mga cellular phone kag mga electronic pager?

Ining mga gamit nagapaposible sa aton nga makig-angot sa iban sa halos bisan diin man kita nga duog. Bisan pa mahimo mapuslanon ini, dapat kita maghalong nga indi maggamit sing mga cell phone kag mga pager sa di-nagakaigo nga tion agod indi magtublag sa aton ministeryo ukon sa Cristianong mga miting. Paano ini matabo?

Binagbinaga ang mangin epekto kon magtunog ang aton cell phone ukon pager samtang nagapanaksi kita sa ministeryo sa latagon. Ano ang hunahunaon sang tagbalay? Ano nga impresyon ang mahatag naton kon magdulog kita sa pagpakighambal agod sabton ini? Indi gid naton luyag nga maghimo sing bisan anong butang nga mag-upang sa iban sa pagpamati sa mensahe sang Ginharian. (2 Cor. 6:3) Busa, kon nagadala kita sing cell phone ukon pager, dapat naton pat-uron nga indi ini makatublag sa aton ukon sa iban samtang nagapakigbahin kita sa ministeryo sa latagon.

Ano abi kon nagahulat kita samtang nagapakighambal ang iban? Kon nagpat-od kita sing tion para sa pag-alagad sa latagon, indi bala nga dapat naton isentro ang aton hunahuna sa sina nga hilikuton? Subong pagtahod sa aton sagrado nga pag-alagad, palihug tatapa ang di-kinahanglanon nga personal nga mga butang ukon sosyal nga mga intereses sa iban nga tion. (Roma 12:7) Sa pagkamatuod, wala ini nagakahulugan nga maglikaw kita sa paggamit sing telepono agod maghatag sing dugang nga panaksi ukon mag-iskedyul para sa dugang nga pagpanaksi.

Ilabi na nga dapat kita maghalong sa paggamit sing mga cell phone kon nagamaneho, sanglit ginapakita sang madamo nga pagtuon nga ang paggamit sini nagadugang sing katalagman nga maaksidente. Dapat gid naton tumanon sing estrikto ang bisan ano nga kasuguan nga nagadumili sang paggamit sing mga cell phone kon nagamaneho.

Nagatambong kita sa Cristianong mga miting, mga asambleya, kag mga kombension agod simbahon si Jehova kag agod matudluan niya. Kon ginaapresyar gid naton ang pagkasagrado sining mga okasyon, indi bala nga dapat naton pat-uron nga ang aton mga cell phone kag mga pager indi makatublag sa aton ukon sa iban? Kon may hilingagawon nga butang nga nagakinahanglan sang aton gilayon nga igtalupangod, dapat naton ini atenderon sa guwa sang duog sang miting. Indi gani, dapat naton atenderon ang personal kag sekular nga mga butang sa iban nga mga tion, kag indi sa tion nga gintigana para sa pagsimba.​—1 Cor. 10:​24.

Kabay nga ang aton paggamit sing mga cellular phone ukon sang bisan ano nga elektroniko nga gamit pirme magapakita sang konsiderasyon sa iban kag sang aton tudok nga apresasyon sa espirituwal nga mga butang.