Magpahamtang sing Espirituwal nga mga Tulumuron

¹ Daw ano nga pribilehiyo nga madayaw si Jehova sa walay katubtuban! Agod malab-ot ina nga tulumuron, sarang kita makapahamtang sing espirituwal nga mga tulumuron karon kag panikasugan nga malab-ot ini. Magabulig ini sa aton nga magamit sing maalamon ang aton kusog. (1 Cor. 9:​26) Ano nga mga tulumuron ang sarang mo malab-ot?

² Pagtuon sang Biblia: Ginahandaan mo bala ang kada miting sang kongregasyon? Kon amo, nagapanalawsaw ka bala kag nagapamalandong kon nagatuon ka? Halimbawa, kon nagahanda ka para sa semanal nga Pagtinuon sa Lalantawan kag Pagtinuon Sang Kongregasyon sa Libro, ginakuritan mo lamang bala ang mga sabat ukon ginabasa mo man ang ginkutlo nga mga kasulatan kag ginapamalandungan ang mga rason sang ginhatag nga mga pagpaathag? Mahimo mo bala nga tulumuron ang pagpanalawsaw sa pila ka punto kada semana gikan sa ginaasayn nga pagbasa sa Biblia para sa Teokratikong Eskwelahan Para sa Ministeryo? Ining pagpanalawsaw nagakinahanglan sing tion kag panikasog, apang nagadala ini sing bugana nga mga padya.​—Hulu. 2:​4, 5.

³ Mga Miting sang Kongregasyon: Ang isa pa ka tulumuron amo ang pagtambong sing regular sa tanan nga lima ka miting sang kongregasyon. Ang pag-abot sing temprano agod makapakigsugilanon sa masigkatumuluo kag agod makapakigbahin sa nagabukas nga ambahanon kag pangamuyo nagapabakod sang espiritu sang kongregasyon. Mapanikasugan man naton nga magkomento sa kada miting kag tinguhaan nga mapauswag ang aton mga komento. Mahimo mo ipaathag kon ano ang kaangtanan sang isa ka kasulatan nga yara sa parapo sa ginahinun-anunan ukon ipatalupangod kon paano iaplikar ang materyal sa matag-adlaw nga pagkabuhi.​—Heb. 10:24, 25.

⁴ Pag-alagad sa Latagon: Mapauswag gid naton ang aton ministeryo kon nagapahamtang kita sing mga tulumuron. May tulumuron ka bala nga oras nga ginaplano mo nga ihinguyang sa pag-alagad kada bulan? Nasapwan sang iban nga mapuslanon ini. Ukon mapauswag mo bala ang pila ka bahin sang imo ministeryo, subong sang paggamit sing Biblia sa pamalaybalay, paghimo sing maayo nga mga pagduaw liwat, pagpanikasog sa pagsugod sing pagtuon sa Biblia, ukon pagtudlo sing epektibo sa mga estudyante?

⁵ Mga ginikanan, ginapalig-on bala ninyo ang inyo mga kabataan nga magpahamtang sing mga tulumuron sa pag-alagad kay Jehova? Buligi sila nga makita nga ang pag-alagad subong payunir, misyonero, ukon katapo sang pamilya Bethel isa ka maayo nga paagi nga mapakita ang kadalumon sang ila apresasyon kay Jehova.​—Manugw. 12:1.

⁶ Samtang ginausisa naton ang aton mga hilikuton, ginapahamtang ang espirituwal nga mga tulumuron, kag nian ginatinguhaan nga malab-ot ini, makasapo kita sing mas daku nga kalipay sa aton pag-alagad kag mangin tuburan sang pagpalig-on sa iban.​—Roma 1:​12.