Kon Paano Nagapakita sing Personal nga Interes ang mga Manugtatap sa Pagtinuon sang Kongregasyon sa Libro
1 Gindesinyo ang Pagtinuon Sang Kongregasyon sa Libro agod mangin “posible ang paghatag sing personal nga igtalupangod sa espirituwal nga pag-uswag sang isa. . . . Isa ini ka pagpabanaag sang mahigugmaon nga kaluoy ni Jehova kag sang iya malum-ok nga pag-ulikid sa iya katawhan.” (om p. 75; Isa. 40:11) May importante nga papel ang manugtatap sang pagtinuon sa libro sa pag-aman sining personal nga atension.
2 Sa Pagtinuon sa Libro: Bangod gintuyo gid nga mangin magamay ang mga grupo sa pagtinuon sang libro, sarang makilala sing maayo sang manugtatap sang pagtinuon sa libro ang mga katapo sang iya grupo. (Hulu. 27:23) Masami nga may mga kahigayunan nga makapakig-angot sa isa kag isa antes ukon pagkatapos sang pagtuon kada semana. Sa sulod sang isa ka bulan, mahimo mahambal niya ang halos tagsa ka tawo sa grupo. Magabulig ini sa mga katapo sang pagtinuon sa libro nga mangin komportable sa pagpalapit sa iya kon nagaatubang sila sing mga pagtilaw ukon nagakinahanglan sing pagpalig-on.—Isa. 32:2.
3 Ginatinguhaan sang manugtatap sang pagtinuon sa libro nga palig-unon ang tanan sa grupo nga magpakigbahin sa pagtinuon. Ang isa ka paagi nga mahimo niya ini amo ang pagdumala sa pagtinuon sa mainayuhon kag malulo nga paagi. (1 Tes. 2:7, 8) Nagapangita sia sing mga paagi agod malakip niya ang tanan sa paghambalanay, lakip ang mga lamharon. Kon ang pila mahuluy-on magkomento, sarang sia makatanyag sing pribado nga bulig paagi sa pagpangabay sing abanse sa ila nga basahon ang isa ka kasulatan ukon magkomento sa isa ka partikular nga parapo. Ukon sarang niya ipakita sa ila kon paano magkomento sa ila kaugalingon nga mga tinaga.
4 Kon ang assistant sang manugtatap sa pagtinuon sa libro isa ka ministeryal nga alagad, padumalahon sia sang manugtatap sing isa ka bes sa kada duha ka bulan. Makahatag ini sing kahigayunan sa manugtatap nga maobserbahan ang assistant kag makatanyag sing mabuligon nga mga panugda. Isa gid ini ka maayo nga kahimusan agod mabuligan ang mga utod nga lalaki nga mapauswag ang ila arte sa pagpanudlo!—Tito 1:9.
5 Sa Ministeryo sa Latagon: Ang isa sang panguna nga responsabilidad sang manugtatap sa pagtinuon sa libro amo ang manguna sa pag-ebanghelyo. (Num. 27:16, 17) Nagahimo sia sing praktikal nga mga kahimusan para sa grupo nga pagpanaksi kag nagatinguha nga buligan ang tanan sa grupo nga makasapo sing kalipay sa ila ministeryo. (Efe. 4:11, 12) Agod mahimo ini, tulumuron niya nga mag-upod sa pagbantala sa tagsa ka katapo sang grupo. Nagapangabudlay man sia upod sa manugtatap sa pag-alagad sa paghimo sing kahimusan nga mabuligan sang mas eksperiensiado nga manugbantala yadtong luyag magpauswag sang pila ka bahin sang ila ministeryo.
6 Subong Mahigugmaon nga Manugbantay: Interesado ang manugtatap sa pagtinuon sa libro sa mga kauturan nga bangod sang ila mga sirkunstansia diutay lamang ang ila pagpakigbahin sa pagbantala. Ginapat-od niya nga mahibaluan sadtong may mga limitasyon bangod sang katigulangon ukon indi na makahalin sa puluy-an bangod sang balatian kag sadtong temporaryo nga indi makabantala bangod sang malubha nga balatian ukon kasamaran, nga may kahimusan nga puwede sila makareport bisan sing 15 minutos lamang kon indi nila makumpleto ang isa ka oras sa sulod sang isa ka bulan. (Ang Komite sa Pag-alagad Sang Kongregasyon amo ang magapat-od kon sin-o ang kalipikado para sa sini nga aman.) Interesado man sia sa katapo sang grupo nga mahimo nangin di-aktibo, nagatinguha nga buligan sila agod makapanghikot liwat sa kongregasyon.—Lucas 15:4-7.
7 Ginapasalamatan gid naton ang mahigugmaon nga interes nga ginapakita sang mga manugtatap sa pagtinuon sa libro! Ang personal nga atension nga ginahatag nila nagabulig sa ‘tanan nga mahiusa sa pagtuo, sa talaksan sang kataason sang kabug-usan ni Cristo.’—Efe. 4:13.