Pagkabuhi Suno sa Aton Dedikasyon
1 Nabawtismuhan ka man kasan-o lang ukon madugay na, mahimo nga madumduman mo pa gihapon yadtong importante nga hitabo sa imo kabuhi. Ang aton pagpabawtismo indi ang katapusan kundi, sa baylo, amo ang panugod sang dedikado nga pag-alagad nga sarang magpadayon tubtob sa walay katubtuban. (1 Juan 2:17) Ano ang nadalahig sa pagkabuhi suno sa aton dedikasyon?
2 Sunda ang Halimbawa ni Cristo: Pagkatapos nabawtismuhan, ‘ginsugdan ni Jesus ang iya hilikuton,’ ang pagbantala sing “maayong balita sang ginharian sang Dios.” (Luc. 3:23; 4:43) Sing kaanggid, sang ginsimbuluhan naton ang aton dedikasyon kay Jehova paagi sa bawtismo, nangin ordenado kita nga mga ministro sang maayong balita. Bisan pa daku nga tion kag panikasog ang kinahanglan sa pagtigayon sing materyal nga mga kinahanglanon sa kabuhi, ang aton panguna nga hilikuton amo ang Cristianong ministeryo. (Mat. 6:33) Sa baylo nga magtinguha nga magmanggaranon ukon mangin bantog, ang mga nagdedikar sa Dios nagapanikasog nga ‘himayaon ang ila ministeryo,’ subong sang ginhimo ni apostol Pablo. (Roma 11:13) Ginapakabahandi mo bala ang imo pribilehiyo sa pag-alagad kay Jehova kag ginahimo ang imo labing masarangan agod mahimaya ang imo pag-alagad sa iya?
3 Subong sang ginhimo ni Jesus, dapat naton ‘pamatukan ang Yawa.’ (Sant. 4:7) Ginsulay ni Satanas si Jesus pagkatapos sang Iya bawtismo, kag ginapuntariya man niya karon ang dedikado nga mga alagad ni Jehova. (Luc. 4:1-13) Bangod napalibutan sang kalibutan ni Satanas, dapat disiplinahon naton ang aton kaugalingon, nagalikaw sa bisan ano nga butang nga makahigko sang aton hunahuna ukon makapalain sang aton tagipusuon. (Hulu. 4:23; Mat. 5:29, 30) Ginalaygayan ang mga Cristiano nga “indi [sila] makaambit sa ‘latok ni Jehova’ kag sa latok sang mga demonyo.” (1 Cor. 10:21) Kinahanglan magbantay kita batok sa indi maayo nga mga kalingawan, malain nga mga kaupdanan, kag mga katalagman sa Internet. Dapat man naton sikwayon ang balasahon sang mga apostata. Makabulig sa aton nga magkabuhi suno sa aton dedikasyon kon mangin alisto kita sa sini kag sa iban pa nga mga pahito ni Satanas.
4 Gamita ang mga Aman Sang Dios: Agod makapadayon kita sa pagkabuhi suno sa aton dedikasyon, nag-aman si Jehova sing bulig paagi sa iya Pulong kag sa Cristianong kongregasyon. Ugalia adlaw-adlaw ang pagbasa sa Biblia kag ang pagpangamuyo kay Jehova. (Jos. 1:8; 1 Tes. 5:17) Magkasadya sa mga miting sa kongregasyon. (Sal. 122:1) Makig-upod sa mga nagakahadlok kay Jehova kag nagatuman sa iya mga sugo.—Sal. 119:63.
5 Upod sa bulig sang Dios, sarang ka magkabuhi suno sa imo dedikasyon kay Jehova kag matigayon ang kalipay nga alagaron sia sing dayon.—Sal. 22:26, 27; Fil. 4:13.