Internasyonal nga Pagpatindog sing mga Kingdom Hall sa Pila ka Pungsod sa Europa
1 Sang nagligad lang nga mga dekada gindumilian ang hilikuton sang mga Saksi ni Jehova sa pila ka kadutaan sa Europa, lakip ang Nasidlangan nga Europa. Sa kalabanan nga kaso, mapiguson gid ang mga pagdumili. Mabudlay ang dayag nga mga miting, kag ang paggamit sa Kingdom Hall halos imposible. Apang, sang nagligad nga mga tinuig, “si Jehova nakahimo sing daku nga butang sa ginhimo niya sa aton. Nasadyahan kita.”—Sal. 126:3.
2 Sugod sang 1983, ang mapiguson nga pagdumili sa mga Saksi ni Jehova amat-amat nga nagtahaw. Sang 1989, ginkilala sing legal ang mga Saksi ni Jehova sa Poland kag Hungary. Sang 1991, ginkilala sing legal ang mga Saksi ni Jehova sa Rusya. Sugod sadto, naglambo ang hilikuton sa Rusya kag sa mga republika sang anay Unyon Sobyet. Sa ulot sang Marso 1996 kag Oktubre 1998, gin-aprobahan sang Nagadumala nga Hubon ang pagpahulam para sa 359 ka Kingdom Hall nga ginpangabay sang mga sanga talatapan nga nagadumala sang 11 ka kadutaan sa Europa.
3 Samtang ginatan-aw mo ang mga retrato sa sini nga suplemento, pamalandungi ang daku kag makatilingala nga mga butang nga ginhimo ni Jehova para sa iya katawhan. (Sal. 136:4) Malipay ka sa paghibalo nga ang mga amot sang bug-os kalibutan nga paghiliutod ginagamit gid sing maayo, nagapakita sang ginsiling ni Jesus, subong sang ginrekord sa Juan 13:35: “Sa sini ang tanan makahibalo nga kamo mga disipulo ko, kon maghigugmaanay kamo.”
4 Lakip sa mga pungsod sa Europa nga nakabenepisyo sang kahimusan sa pagbulig patindog sa mga Kingdom Hall sa mga duog nga pigado amo ang Romania, diin 36 ka Kingdom Hall ang gintukod didto sugod sang Hulyo 2000. Paagi sa paghimo sing alangay nga plano sa halos tanan nila nga Kingdom Hall, nakapatindog ang Ukraine sing 61 sang tuig 2001 kag 76 pa gid sa 2002. Paagi sa mga kuarta nga gin-amot sa Kingdom Hall Fund, ginatos ka Kingdom Hall ang natukod sa Bulgaria, Croatia, Macedonia, Moldova, Rusya, kag Yugoslavia.
5 Indi mahapos ang magpatindog sing mga Kingdom Hall sa pila ka kadutaan, kag daku nga panikasog ang ginhimo agod masugdan ang aktual nga pagtukod. Masami nga madugay ang paghanda sa pagtukod. Kag ang gasto sa pagtukod sing Kingdom Hall sa sina nga bahin sang Europa mas daku sangsa madamo nga bahin sang Aprika ukon Bagatnan nga Amerika. Apang, bangod sang daku nga pag-uswag sa kadamuon sang mga sumilimba ni Jehova, ginatos gihapon ka Kingdom Hall ang kinahanglan sang pigado nga mga pungsod sa Europa!
6 Daw ano ka makalilipay makita ang madasig nga pagtukod sining mga Kingdom Hall! Isa ka ekselente nga panaksi sa mga kaingod ang nahimo diin ini gintukod, subong sang ginpakita sang madamo nga eksperiensia. Sa pila ka duog, nakadayaw ang lokal nga mga opisyales sa kahanda nga ginpakita sa pagsunod sa mga kasuguan sang pagtukod.
7 Husto gid ang tagna ni Isaias tuhoy sa pag-uswag sang matuod nga pagsimba sa sini nga tion. Paagi sa manalagna ang Dios nagsaad: “Ako, si Jehova, magapadali sini sa iya kaugalingon nga tion.” (Isa. 60:22) Pat-od gid nga ang nagligad nga dekada amo ang tion nga ginpauswag ni Jehova ang Nasidlangan nga Europa. Kabay nga padayon nga ibubo ni Jehova ang iya bugana nga pagpakamaayo sa aton mga panikasog nga padasigon ang pagtukod sing mga Kingdom Hall sa madamo nga kadutaan paagi sa paghatag naton sing dugang nga suporta sa Kingdom Hall Fund! Magaresulta ini sing madamo pa nga Kingdom Hall nga mapatindog sa mga duog nga pigado. Makaamot ini sa pag-uswag sang matuod nga pagsimba sa madamo nga bahin sang Europa kag sa mas daku pa nga panaksi nga mahatag tubtob “sa ukbong sang duta.”—Binu. 13:47.
[Mga retrato sa pahina 3]
Kingdom Hall Complex Moscow, Rusya
[Mga retrato sa pahina 4-6]
Bag-o nga mga Kingdom Hall sa Nasidlangan nga Europa
Strumica, Macedonia
Daruvar, Croatia
Sokal, Lviv District, Ukraine
Bitola, Macedonia
Mladost, Bulgaria
Plovdiv, Bulgaria
Kurdzhipskoye, Maykop, Rusya
Bački Petrovac, Yugoslavia
Tlumach, Ivano-Frankivsk District, Ukraine
Rava-Ruska, Lviv District, Ukraine
Stara Pazova, Yugoslavia
Zenica, Bosnia and Herzegovina
Sokal, Lviv District, Ukraine
Zhydachiv, Lviv District, Ukraine