Bantayi Sing Maayo ang Inyo Paggamit Sing Tion
1. Ano nga kabudlayan ang ginaatubang sang mga tawo bisan diin karon?
1 Sa sining panag-on nga madamo sing kagamitan nga nagapadasig kag nagapahapos sang trabaho, madamo nga tawo ang daw may mas madamo nga hilimuon kag diutay nga tion sa paghimo sini. Nabudlayan ka bala maghupot sing isa ka maayo nga espirituwal nga rutina? Luyag mo bala nga may madamo ka nga tion para sa ministeryo? Paano naton magamit sing epektibo ang aton tion?—Sal. 90:12; Fil. 1:9-11.
2, 3. Ano ang mga problema nga resulta sang teknolohiya sa impormasyon, kag paano naton mausisa ang aton kaugalingon?
2 Kilalaha ang mga Butang nga Nagauyang Sang Tion: Dapat usisaon naton tanan sa tion kag tion kon paano naton ginagamit ang aton tion. Ang Biblia nagapalig-on: “Tan-awa sing mainandamon kon paano ang paggawi ninyo, indi subong nga di-maalam kundi subong nga mga maalam, nga nagahimulos sang kahigayunan [‘nga ginabakal ang nagakaigo nga tion para sa inyo kaugalingon,’ NW] bangod nga ang mga adlaw malaut.” (Efe. 5:15, 16) Binagbinaga ang mga problema nga resulta sang moderno nga teknolohiya sa impormasyon. Bisan pa ang mga kompyuter kag ang iban pa nga elektroniko nga kagamitan mapuslanon, mahimo ini mangin siod kon wala naton ginabantayan sing maayo ang paggamit naton sing tion.—1 Cor. 7:29, 31.
3 Dapat pamangkuton naton ang aton kaugalingon: ‘Nagahinguyang bala ako sing tion kada adlaw sa pagbasa ukon pagsabat sing makaulugot lamang nga mga mensahe sa E-mail? Pirme bala ako nagagamit sing telepono ukon nagapadala sing elektroniko nga mga mensahe tuhoy sa witiwiti nga mga butang? (1 Tim. 5:13) Ginabuksan ko bala ang Internet nga wala sing katuyuan ukon wala sing namunamo nga nagasaylosaylo sing estasyon kon nagatan-aw sing telebisyon? Ang kasakuon bala sa elektroniko nga mga hampang nagalaksam sang tion para sa akon pagtuon sa Pulong sang Dios?’ Ini nga mga buhat makahalit sa aton espirituwalidad.—Hulu. 12:11.
4. Ano nga pagbag-o ang ginhimo sang isa ka pamatan-on, kag ngaa?
4 Paggamit sa Tion Sing Maalamon: Ginakuha sang elektroniko nga kagamitan ang aton tion kag ang aton igtalupangod. Ang isa ka pamatan-on nga naduyog sa mga hampang sa kompyuter nagbaton: “Kon kaisa kon maghampang ako antes maggua sa ministeryo ukon magtambong sa Cristianong miting, nabudlayan gid ako magkonsentrar. Halos pirme ko ginapamensar kon paano ko mahampang sing maayo pa ang isa ka hampang kon makapauli na ako. Naapektuhan gid ang akon personal nga pagtuon kag regular nga pagbasa sing Biblia. Ang akon kalipay sa pag-alagad sa Dios nagakadula.” Bangod nahisayran niya nga kinahanglan magbag-o sia, ginpanas niya ang tanan niya nga hampang sa kompyuter. “Mabudlay gid yadto,” hinumdom niya. “Nabuyo na gid ako sa mga hampang. Apang nabatyagan ko man ang daku nga kadalag-an bangod nahibaluan ko nga ginhimo ko ini para sa akon kaayuhan.”—Mat. 5:29, 30.
5. Paano kita makabakal sing tion para sa espirituwal nga mga hilikuton, kag paano kita makabenepisyo sa paghimo sini?
5 Ayhan kinahanglan nga himuon ini kon may mga bahin nga dapat ka maghimo sing mga pagbag-o. Makabakal ka bala sing tunga sa oras kada adlaw gikan sa di-importante nga mga hilikuton? Mga amo sini kalawig nga tion ang kinahanglan agod mabasa ang bug-os nga Biblia sa sulod sang isa ka tuig. Makapaladya gid ini sa espirituwal! (Sal. 19:7-11; 119:97-100) Magtalana sing pat-od nga mga oras para sa pagbasa sing Biblia, paghanda sa mga miting, kag sa ministeryo sa latagon. (1 Cor. 15:58) Makabulig ini sa imo nga malikawan ang nagauyang sing oras nga mga butang kag magabulig ini sa imo agod ‘mahangpan kon ano ang kabubut-on sang Ginuo.’—Efe. 5:17.