Ang Pagsalakay sang mga Manugkabayo nga Nagaapektar sa Imo
1, 2. Paano nadalahig ang mga alagad sang Dios karon sa katumanan sang matagnaon nga palanan-awon nga ginrekord sa Bugna 9:13-19?
1 “Ang ikan-um nga manugtunda nagpatunog sang iya budyong.” Pagkatapos sini, nagsalakay ang “mga hangaway nga manugkabayo” nga nagadamo sing “duha ka gatos ka milyon.” Indi ini ordinaryo nga puersa militar. “Ang mga ulo sang mga kabayo subong sang mga ulo sang mga leon.” Ang kalayo, aso, kag asupre nagagua sa ila mga baba, kag ang ila “mga ikog kaangay sa mga man-ug.” Ining simbuliko nga pagsalakay sang mga manugkabayo nagaresulta sang kalaglagan sa maagyan sini. (Bug. 9:13-19) Nahibaluan mo bala kon paano ka nadalahig sa katumanan sining talalupangdon nga matagnaon nga palanan-awon?
2 Ang hinaplas nga nagkalabilin kag ang ila mga kaupod, ang iban nga mga karnero, nahiusa nga nagapahibalo sang mga paghukom sang Dios. Nagresulta ini sa bug-os nga pagbuyagyag sang patay nga kahimtangan sa espirituwal sang Cristiandad. Usisaon naton ang duha ka bahin sang matagnaon nga palanan-awon nga nagapadaku kon ngaa ang ministeryo sang mga alagad sang Dios epektibo gid.
3. Ano nga paghanas ang imo nabaton agod mahambal mo sing epektibo ang mensahe sang Dios?
3 Nahanas kag Nasangkapan sa Pagbantala Sang Mensahe Sang Dios: Paagi sa Teokratikong Eskwelahan Para sa Ministeryo kag sa iban nga mga miting sa kongregasyon, nahanas ang mga ministro sang Dios sa paghambal sang mensahe sang Dios nga may awtoridad. Bilang pag-ilog kay Jesus kag sa iya mga disipulo, nagalakat sila sa pagpangita sa mga takus, nga nagabantala kon diin may tawo. (Mat. 10:11; Mar. 1:16; Luc. 4:15; Binu. 20:18-20) Epektibo gid ining pasad-sa-Biblia nga pamaagi sa pagbantala!
4. Anong mga galamiton ang sarang matigayon sang madamo nga manugbantala agod mahimo nila ang ila hilikuton?
4 Binilyon ka Biblia, libro, brosyur, kag mga magasin ang ginpanagtag sang Cristianong mga ministro bilang pagtuman sa sugo sang Dios nga magbantala. Ini nga mga publikasyon sarang matigayon sa halos 400 ka lenguahe, nga may nagkalainlain nga mga topiko kag nagagamit sing mga pamaagi nga magaganyat sa lainlain nga mga tawo. Ginagamit mo bala sing maayo ini nga mga galamiton?
5, 6. Ano ang nagapakita nga may langitnon nga pagsakdag ang katawhan ni Jehova?
5 Langitnon nga Panuytoy kag Pagsakdag: Ang matagnaon nga palanan-awon nagpaathag man nga ang hilikuton nga ginrepresentar sang simbuliko nga pagsalakay sang mga manugkabayo ginasakdag sang Dios. (Bug. 9:13-15) Ang bug-os kalibutan nga hilikuton sa pagbantala natuman, indi tungod sa kaalam ukon gahom sang tawo, kundi paagi sa espiritu sang Dios. (Zac. 4:6) Si Jehova nagagamit sang mga anghel sa pagtuytoy sini nga hilikuton. (Bug. 14:6) Sa amo, upod ang mga panikasog sang iya tawhanon nga mga Saksi, nagaaman si Jehova sing langitnon nga pagsakdag agod makapalapit sa iya ang mga mapainubuson.—Juan 6:45, 65.
6 Bangod nahanas kag nasangkapan sing maayo sa pagpahayag sing mensahe sang Dios, kag nagapanghikot sa idalom sang pagtuytoy sang mga anghel, indi mapunggan ang katawhan ni Jehova. Padayunon naton nga himuon ang aton bahin sa katumanan sining makakulunyag nga matagnaon nga palanan-awon.