Ipakita ang Imo Pagpasalamat
1 Bisan pa nga nagakabuhi kita sa “makahalanguyos nga mga tion,” madamo kita sing rason nga magpasalamat kay Jehova. (2 Tim. 3:1) Ang nagapanguna sa sini amo ang hamili nga dulot sang iya Anak para sa aton. (Juan 3:16) Dugang pa, samtang ginagutom sa espirituwal ang mga yara sa butig nga relihion, may bugana kita nga espirituwal nga pagkaon. (Isa. 65:13) Bahin kita sang isa ka bug-os kalibutan nga paghiliutod kag may pribilehiyo nga makigbahin sa makalilipay nga pag-uswag sang matuod nga pagsimba. (Isa. 2:3, 4; 60:4-10, 22) Paano naton mapasalamatan si Jehova bangod sang pagpakamaayo nga ginhatag niya sing bugana sa aton?—Col. 3:15, 17.
2 Malipayon kag Bug-os Tagipusuon nga Pag-alagad: Sang nagahinun-anon tuhoy sa paghatag sing materyal, si apostol Pablo nagsulat: “Ang Dios nagahigugma sa manughatag nga malipayon.” (2 Cor. 9:7) Ini nga prinsipio naaplikar man sa aton pag-alagad sa Dios. Ang pagkamapinasalamaton mapakita sa aton kakunyag sa kamatuoran, sa aton kalipay sa Cristianong mga miting, sa aton kakugi sa ministeryo sa latagon, kag sa aton pagkamalipayon sa pagtuman sang kabubut-on sang Dios.—Sal. 107:21, 22; 119:14; 122:1; Roma 12:8, 11.
3 Ang Kasuguan sa dumaan nga Israel wala maghatag sing espesipiko nga kadamuon para sa pila ka dulot. Ang tagsa ka sumilimba sarang makapakita sang iya pagpasalamat paagi sa paghatag “suno sa pagpakamaayo ni Jehova” nga nabaton niya. (Deut. 16:16, 17, NW) Sing kaanggid karon, ang mapinasalamaton nga tagipusuon magapahulag sa aton nga makigbahin sa hilikuton sang Ginharian nga pagbantala kag paghimo sing disipulo tubtob ginatugot sang aton mga kahimtangan. Ang bulan sang Mayo magahatag sa aton sing isa pa ka maayo nga kahigayunan nga mapakita ang aton pagpasalamat. Ang pila sarang makapanginpulos gikan sa bakasyon sa eskwelahan agod mag-auxiliary payunir, samtang ang iban naman sarang makahinguyang sing dugang nga tion sa pag-alagad sa latagon samtang maayo ang panahon. Sarang mo bala mapasangkad ang imo ministeryo sini nga bulan?
4 Nagabugana sa Pagpasalamat: Ang isa ka importante gid nga paagi sa pagpabutyag sang aton pasalamat kay Jehova amo ang pangamuyo. (1 Tes. 5:17, 18) Ang Pulong sang Dios nagapalig-on sa aton nga ‘magbugana sa pagpasalamat.’ (Col. 2:7) Bisan pa tuman kita kasako ukon ginahul-an, dapat ilakip naton pirme ang pagpasalamat sa aton matag-adlaw nga mga pangamuyo. (Fil. 4:6) Huo, paagi sa aton ministeryo kag subong man sa aton mga pangamuyo, kabay nga kita “nagabunga man sa madamo nga pagpasalamat sa Dios.”—2 Cor. 9:12.