Si Jehova Nagabulig sa mga Nagasalig sa Iya
1 Ginatamod sang madamo nga tawo ang kuarta, gahom, kag tawhanon nga mga ikasarang subong amo ang mga yabi sa kadalag-an. (Sal. 12:4; 33:16, 17; 49:6) Apang, yadtong nagakahadlok kag nagasalig kay Jehova ginapasalig sang Biblia nga “sia ang ila kabulig kag taming.” (Sal. 115:11) Binagbinagon naton ang duha ka bahin diin kinahanglan naton nga ipakita ang aton pagsalig kay Jehova.
2 Subong Cristianong mga Ministro: Sa tion nga may mga asaynment kita sa kongregasyon ukon nagapanudlo sa ministeryo sa latagon, dapat magsandig kita sa aton Dios. Binagbinaga ang halimbawa ni Jesus. Bisan pa nga Anak sia sang Dios, wala sia magsalig sa iya kaugalingon nga kaalam ukon ikasarang kundi nagsalig sia sing bug-os sa iya langitnon nga Amay. (Juan 12:49; 14:10) Mas labi pa gid nga dapat himuon naton ini! (Hul. 3:5-7) Paagi lamang sa pagpakamaayo ni Jehova nga ang aton kubos nga mga panikasog makapadungog sa iya kag makahatag sing benepisyo sa iban.—Sal. 127:1, 2.
3 Mapakita naton ang aton pagsandig kay Jehova paagi sa pagpangamuyo para sa iya panuytoy kag sa bulig sang iya balaan nga espiritu. (Sal. 105:4; Luc. 11:13) Dugang pa, mapakita naton ang pagsalig sa Dios paagi sa pagpasad sang aton panudlo sa iya Pulong, ang Biblia. Ang mensahe sini may ikasarang sa pagtandog sa mga tagipusuon kag pagpabag-o sa mga kabuhi. (Heb. 4:12) Kon kita ‘mag-alagad nga nagasandig sa kusog nga ginaaman sang Dios,’ mahimaya si Jehova.—1 Ped. 4:11.
4 Pag-atubang sa mga Problema: Dapat mangayo man kita sing bulig kay Jehova kon may mga pag-ipit kag mga problema. (Sal. 46:1) Halimbawa, ang isa ka amo mahimo magpangalag-ag sa paghatag sa aton sing tion nga makatambong sa isa ka asambleya, ukon mahimo nga makaatubang kita sang isa ka mabudlay nga kahimtangan sa aton pagkabuhi subong pamilya. Ginapakita naton ang aton pagsalig kay Jehova paagi sa hanuot nga pagpangamuyo sa iya kag sa pag-aplikar sa panuytoy nga ginaaman niya paagi sa iya Pulong kag organisasyon. (Sal. 62:8; 119:143, 173) Paagi sa paghimo sini, maeksperiensiahan sang mga alagad ni Jehova ang iya bulig sa ila pagkabuhi.—Sal. 37:5; 118:13, 16.
5 Si Jehova mismo nagapasalig sa aton: “Bulahan ang mabukod nga lalaki nga nagasalig kay Jehova, kag ang iya ginasaligan amo si Jehova.” (Jer. 17:7) Kabay nga ginapakita naton ang aton pagsalig sa iya sa tanan naton nga ginahimo!—Sal. 146:5.