Kon Paano Magbantala sa mga Duog Sang Negosyo

1. Ano ang pila ka bentaha sang pagpanaksi sa mga duog sang negosyo?

¹ Luyag mo bala magbantala sa teritoryo diin ginaabiabi pirme ang mga bisita kag talagsa lang nga wala sing tawo? Sarang mo ini mahimo sa teritoryo mismo sang inyo kongregasyon. Paano? Paagi sa pagduaw sa mga balaligyaan. Ang mga manugbantala nga nagapanaksi sa mga balaligyaan masami nagaagom sing maayo nga mga resulta.

2. Paano maorganisar ang pagpanaksi sa mga duog sang negosyo?

² Ang pila ka kongregasyon may mga duog sang negosyo subong bahin sang ila naasayn nga teritoryo. Ang utod nga nagaatipan sang mga teritoryo sang kongregasyon sarang makahanda sang pinasahi nga mga mapa para sa sining malapad nga mga duog sang negosyo. Ang bisan ano nga mapa nga nagasaklam sa sini dapat maathag nga nagapakita nga ining mga duog sang negosyo indi dapat panaksihan subong bahin sang teritoryo. Sa iban nga teritoryo, ang mga duog sang negosyo sarang mapanaksihan lakip sa iban nga mga puluy-an. Kon wala ka pa makapanaksi sa mga duog sang negosyo, tilawi nga magsugod anay sa mga tiangge lang.

3. Ano ang makabulig sa aton nga mangin epektibo sa pagpanaksi sa mga balaligyaan?

³ Maggamit Sing Simple nga Pagpalapit: Kon nagapanaksi sa mga balaligyaan, importante nga ang aton pamayo kaangay sa kon nagatambong kita sa mga miting sa Kingdom Hall. Maayo man nga pilion ang tion nga indi masako ang balaligyaan. Kon posible, magsulod kon wala sing kostumer nga ginaasikaso. Mangabay nga makighambal sa manedyer ukon sa isa nga nagadumala. Mangin malip-ot kag direkta sa punto. Ano ang imo isiling?

4-6. Ano ang sarang naton ihambal kon nagapanaksi sa nagadumala sang balaligyaan ukon sa manedyer?

⁴ Kon nagapakighambal sa nagadumala ukon sa manedyer, puede ka magsiling: “Masako pirme ang mga negosyante amo kon ngaa talagsa lang namon sila maabtan sa ila puluy-an, gani ginduaw ka na lang namon diri sa imo ginatrabahuan. Ang amon mga magasin nagahatag sing bug-os kalibutan nga pagtamod sa mga nagakatabo karon.” Ipresentar dayon ang isa ka malip-ot nga punto sa isa ka magasin.

⁵ Ukon sarang mo matilawan ining simple nga pagpakigsugilanon: “Madamo nga tawo ang luyag nga makahibalo sing dugang pa sa Biblia apang kulang sila sing tion. Ini nga tract nagapaathag sing isa ka walay bayad nga programa nga puede makabulig sa imo nga masapwan ang mga sabat sa imo mga pamangkot tuhoy sa Biblia.” Nian ipakita ang pahina 4-5 sang tract nga Luyag Mo Bala Madugangan ang Imo Nahibaluan sa Biblia?

⁶ Kon daw masako ang nagadumala sang balaligyaan, sarang mo na lang itanyag ang tract kag magsiling: “Balikan ta ka liwat kon indi ka na masako. Luyag ko lang mahibal-an kon ano ang masiling mo sa sining tract.”

7. Paano naton mapalambo ang interes nga masapwan naton sa mga duog sang negosyo?

⁷ Pagpalambo Sang Interes: Sarang ka pa gani makahiwat sing pagtuon sa Biblia sa mga balaligyaan. Regular nga ginadalhan sang mga magasin sang isa ka espesyal payunir ang isa ka negosyante. Sang nagpabutyag sing interes ang tawo sa iya nabasahan, ginpasundayag sang payunir ang kahimusan sa pagtuon sang Biblia, nga nagagamit sang Ginapatuman nga brosyur. Nasugdan ang pagtuon sa ginaobrahan mismo sang tawo. Nagapasunaid sa kahimtangan, 10 ukon 15 minutos lamang ang ginahinguyang sang payunir sa kada pagtuon. Sing kaanggid, kabay nga magpadayon man kita sa pagpangita sa mga takus paagi sa pagpanaksi sa mga duog sang negosyo.