Itanyag Gid ang mga Magasin sa Imo Ministeryo

1, 2. Ano ang epekto sang Ang Lalantawan kag Magmata! sa kabuhi sang mga tawo?

¹ “Makawiwili, suno sa panahon, kag makapalig-on.” “Ang labing makapalig-on nga balasahon nga akon nabasa.” Ini nga mga komento nagalaragway sing maayo kon ano ang ginabatyag sang mga bumalasa sa bug-os nga kalibutan tuhoy sa Ang Lalantawan kag Magmata! Sa pagkamatuod, hamili gid nga mga kagamitan ang aton mga magasin agod malab-ot ang “tanan nga sahi sang mga tawo” sang maayong balita.—⁠1 Tim. 2:4.

² Ang isa ka negosyante nakatigayon sing Magmata! nga magasin nga naluyagan niya ang topiko. Sang ulihi, ginbasa niya ang kaupod nga magasin sini nga Ang Lalantawan, nga nagaunod sang isa ka artikulo nga nagpahulag sa iya nga usisaon sing maayo ang iya ginapatihan nga Trinidad halin pa sang una. Nangin interesado sia kag ginbawtismuhan anom ka bulan sang ulihi. Ang isa pa ka tawo regular nga nagabaton sing mga magasin apang wala gid niya ini ginabasa. Sa pihak nga bahin, ginalikawan sang iya asawa ang mga Saksi apang ginabasa niya ang mga magasin nga ginabilin nila sa iya bana. Natandog ang tagipusuon sang asawa sa saad sang Biblia nga isa ka paraiso nga duta nga puno sing matarong nga tawo. Sang ulihi, sia, ang iya bata nga lalaki, kag ang iya manghod nga babayi nangin alagad ni Jehova.

3. Ano ang bentaha kon ang magasin itanyag sing pares?

³ Itanyag Ini nga Pares: Subong sang ginapakita sining ginsambit nga mga halimbawa, indi naton mapat-od kon sin-o ang makabasa sang aton mga magasin ukon kon ano ang makapainteres sa ila. (Man. 11:6) Gani mapuslanon nga itanyag nga pares Ang Lalantawan kag Magmata!, bisan isa lang ka magasin ang aton ginapresentar. Sa pila ka kahimtangan, basi maayo nga itanyag ang pila ka nanuhaytuhay nga gua sang aton magasin sa isa ka pagduaw.

4. Paano naton maiskedyul ang aton pagpanagtag sang magasin?

⁴ Mapuslanon nga mag-iskedyul sing isa ka adlaw kada semana para sa pagpanagtag sing magasin. Sa 2005 nga Calendar of Jehovah’s Witnesses, ang Sabado ginatawag nga “Magazine Day.” Sa pagkamatuod, bangod magkatuhay ang duog kag personal nga mga sirkunstansia, basi lain nga adlaw ang gamiton sang iban sa pagtanyag sang aton mga balasahon. Bahin bala ini sang imo semanal nga iskedyul?

5. Sa anong mga kahigayunan nga dapat mangin alisto kita sa pagpanagtag sing mga magasin, kag ano ang makabulig sa aton sa paghimo sini?

⁵ Magpahamtang Sing Tulumuron: Ang paghimo sing tulumuron sa pagpahamtang sing magasin kada bulan makabulig agod mahatagan pa gid sing igtalupangod ang magasin. May ruta ka bala sang magasin? Nagatanyag ka bala sing magasin sa imo masugilanon sa ministeryo? Sarang ka bala makatanyag sing magasin samtang nagapanaksi sa kalye, sa mga duog sang negosyo, kag sa publiko nga mga duog? May dala ka bala nga magasin kon nagabiyahe, nagapamalaklon, kag kon may mga transaksion? Himusli ang tagsa ka kahigayunan nga buligan ang iban agod makabenepisyo sa Ang Lalantawan kag Magmata!

6. Paano naton magamit ang aton daan nga mga magasin?

⁶ Puede man naton mangin tulumuron ang pagpanagtag sang ekstra apang daan na nga mga gua. Bisan ang mga magasin nagdugay na sing isa ukon duha ka bulan, hamili gihapon ang impormasyon sini. Ipahamtang ini sa mga interesado. Para sa minilyon ka tawo, ang Lalantawan kag Magmata! nangin “pulong . . . sa husto nga tion.” (Hulu. 25:11) Gamiton naton ini agod buligan ang minilyon pa nga makakilala kag maalagad si Jehova.