Dayawa si Jehova sa Daku nga Kongregasyon

1, 2. Anong kahigayunan ang bukas sa aton sa tion sang distrito nga kombension, kag ano ang isa ka paagi nga mahimo naton ini?

¹ Isa ka makahalawhaw nga kahigayunan nga mahimaya si Jehova sa aton distrito nga kombension kada tuig. Pareho ang aton balatyagon kay David nga nag-amba: “Dayawon ko ikaw sa daku nga kongregasyon; sa tunga sang kadam-an dayawon ko ikaw.” (Sal. 35:18) Sa palaabuton nga “Diosnon nga Pagkamatinumanon” Distrito nga Kombension, paano naton mapat-od nga subong isa ka nahiusa nga katawhan, madayaw naton si Jehova?

² Ang aton paggawi amo ang isa ka paagi nga mahimo naton ini. Ang tagdumalahan sang isa ka pasilidad nga ginahiwatan sang kombension nagsiling: “Sa tion sang inyo kombension, ginasilingan namon ang iban nga grupo sang relihion nga luyag mag-arkila sang pasilidad nga magkari kag tan-awon kon paano ang mga Saksi ni Jehova nagahiwat sang kombension, bangod maayo gid ang ila kahimusan.” Paagi sa aton panagway, aton kooperasyon, kag aton paggawi, kita tanan nagapakita sing pagdayaw, nga nagakaigo para sa aton Dios.—⁠1 Ped. 2:⁠12.

3, 4. Paano ang kaugdang magabulig sa aton nga magpamayo sing nagakaigo subong isa ka Cristianong ministro sa kombension kag pagkatapos sang sesyon?

³ Personal nga Panagway: Kinahanglan ang kaugdang sa aton pagpanapot kag pagpamayo agod madayaw si Jehova. (1 Tim. 2:9) Ang Eskwelahan Para sa Ministeryo nga libro pahina 132, nagsiling: “Ang isa ka tawo nga maugdang nagahalong nga indi masaklaw sing di-kinahanglanon ang iban kag indi maghatag sing di-nagakaigo nga atension sa iya kaugalingon.” Sa madamong kadutaan, kinaandan na lang ang di-maugdang nga pamayo. Apang, ginaapresyar gid ni Jehova ang aton panikasog nga marepresentaran sia sing nagakaigo. (Binu. 15:14) Bisan pa kon ang kombension ginahiwat sa isa ka sports center ukon isa ka recreational facility, ini nga pagtililipon sa isa ka “daku nga kongregasyon” sa sulod sang tatlo ka adlaw nga kombension. Amo nga kon nagatipon kita sa atubangan ni Jehova, dapat kita mamayo nga may dignidad nga nagakaigo sa pinakamataas nga Persona sa uniberso.—⁠1 Cron. 29:11.

⁴ Dapat man naton talupangdon ang aton panagway pagkatapos sang sesyon kada adlaw. Bisan pa luyag naton magsuksok sing mas komportable sa tion sang pagliwaliwa ukon sa tion sang pagkaon sa isa ka restawran, importante gihapon nga ang aton pamayo kag pamustura nagakaigo para sa mga “matinahaon sa Dios.” (1 Tim. 2:10) Indi talaksan ang uso sa kalibutan para sa kalahamut-an nga pamayo. (1 Juan 2:16, 17) Ang aton Cristianong mga publikasyon nagaaman sing mabuligon nga mga laragway sang maugdang, naareglar sing maayo nga pamayo sa mga lalaki kag mga babayi sa nanuhaytuhay nga okasyon. Ang pagtakod sang aton badge card samtang yara sa duog nga ginahiwatan sang kombension nagapahanumdom sa aton nga mga Cristianong ministro kita sa tanan nga tion.—⁠2 Cor. 6:3, 4.

5. Anong maayong halimbawa ang ginpahamtang sang mga tawo sang adlaw ni Esdras?

⁵ Tahura ang Latok ni Jehova: Sang mga adlaw ni Esdras, sang naghanda sia sa pagbasa sang Kasulatan, “ang bug-os nga katawhan nagtindog” bilang pagtahod kag pagpaabot sang instruksion nga ila mabatian. Samtang nagabasa si Esdras, “ang bug-os nga katawhan nagpamati sing matinalupangdon.” (Neh. 8:3, 5, 6) Nahibaluan nila nga si Jehova ang nagapamulong sa ila, kag nagpahulag ini sa ila nga mamati sing matinahuron. Amo man bala sina ang aton panimuot sa tion sang kombension?

6, 7. Paano kita makapakita sing pagtahod sa latok ni Jehova?

⁶ Naghanda ang Soberanong Ginuo sang uniberso sing isa ka piesta para sa aton. (Isa. 25:⁠6; 1 Cor. 10:21) Kon ginapabaloran gid naton ang aton duog sa espirituwal nga latok ni Jehova, mangin tulumuron gid naton nga tambungan ang tanan nga tatlo ka adlaw nga kombension. Naplano mo na bala ang inyo dalayunan, salakyan, kag pagbakasyon sa sekular nga trabaho? Nakaiskedyul ka na bala sing nagakaigo nga tion sa paghanda kag paglakbay agod makaabot sa duog sang kombension sing temprano pa kag makapangita sing mapungkuan, makapakigsugilanon sa mga kauturan, kag makabuylog sa ila sa pagdayaw kay Jehova sa nagabukas nga ambahanon kag pangamuyo?—⁠Sal. 147:1.

⁷ Ang pagtahod sa latok ni Jehova magapahulag sa aton nga mamati sing maayo sa programa kag maglikaw sa di-kinahanglanon nga pag-istorya sa iban, pagkaon, ukon paglagawlagaw sa mga koridor samtang may programa pa. Paagi sa matutom kag mainandamon nga ulipon nga klase, nag-aman si Jehova sing espirituwal nga pagkaon nga kinahanglanon gid naton karon. (Mat. 24:45) Dapat gid naton tambungan ang tanan nga programa. Dapat man tuparan sang mga ginikanan ang ila kabataan sa pulungkuan agod mabuligan sila nga makabenepisyo sing bug-os.—⁠Deut. 31:12.

8. Ano ang ginapangabay sa aton tuhoy sa palanyagahon, kag ngaa?

⁸ Ginapangabay kita nga magbalon sa baylo nga magbiya sa duog sang kombension agod magbakal sing palanyagahon. Mapinasalamaton gid kita nga madamo ang nagsunod sini nga panuytoy sang nagligad nga kombension. Maayo gid kon sundon naton ini karon nga tuig! (Heb. 13:17) Ini nga kahimusan nagaaman sing maayong kahigayunan nga makapalig-unanay sa paghiliupod naton sa mga kauturan kag makaamot sa isa ka palibot nga nahiusa kag may paghidait nga nagapadungog kay Jehova.—⁠Sal. 133:1.

9, 10. Paano pa gid naton madayaw si Jehova sa tion sang kombension?

⁹ Pagpanaksi Sing Di-pormal: Samtang nagapakadto kag nagapauli sa kombension, madamo kita sing kahigayunan nga madayaw si Jehova paagi sa aton bibig. (Heb. 13:15) Kon nagakaon kita sa restawran ukon nagapakig-istorya sa mga nagatrabaho sa hotel, kalitan naton ang pagpanaksi sa ila. Ang aton tagipusuon kag hunahuna puno sing espirituwal nga mga bahandi. Ipaambit naton ining maayong mga butang sing di-pormal.—⁠1 Ped. 3:⁠15.

¹⁰ Ginakalangkagan gid naton ining kahigayunan nga madayaw si Jehova sa ‘tunga sang nagatipon nga katilingban.’ (Sal. 26:12) Kabay pa nga nahiusa kita sa pagdayaw kay Jehova sa “Diosnon nga Pagkamatinumanon” Distrito nga Kombension.

[Kahon sa pahina 5]

Mga Pahanumdom sa Distrito nga Kombension

◼ Oras Sang Programa: Ang programa magasugod sa 8:30 sang aga sa Biernes kag Sabado, kag 9:00 sang aga sa Domingo. Pila ka minuto antes sang sesyon, ang tsirman magapungko na sa plataporma samtang nagatokar ang nagabukas nga musika sa Ginharian. Tanan kita dapat nakapungko na sa sina nga tion agod makasugod ang programa sing solemne. Ang programa matapos sa 4:35 sang hapon sa Biernes kag Sabado kag 4:10 sang hapon sa Domingo.

◼ Palarkingan: Sa tanan nga duog sang kombension nagatinguha kita sa paghimo sing mga kahimusan sa palarkingan. Ang tanan nga may salakyan dapat magsunod sa panuytoy sang mga attendant sa palarkingan agod mangin matawhay ini sa iban. Sanglit sa aton mga assembly hall ang palarkingan limitado lamang, mahimo nga mag-akupar na lang kamo sing isa ka salakyan kon posible sa baylo nga tig-isa ukon tig-duha ka tawo lang sa kada salakyan.

◼ Pagreserba Sang Pulungkuan: Mahimo lamang ireserba ang pulungkuan sa kaupod mo nga nagbiyahe ukon kaupod mo sa dalayunan.

◼ Donasyon: Daku ang magasto sa pagpalakat sang distrito nga kombension. Mapakita naton ang aton apresasyon paagi sa boluntaryo nga amot sa bug-os kalibutan nga hilikuton sa aton Kingdom Hall ukon sa duog sang kombension. Ang tanan nga tseke nga iamot sa kombension dapat ibayad sa “Watch Tower.”

◼ Panyaga: Palihug magbalon sing palanyagahon sa baylo nga magbiya sa duog sang kombension agod magbakal sing pagkaon sa restawran ukon sa karenderia sa tion sang intermisyon. Ang gamay nga suludlan nga mahimo mabutang sa idalom sang pulungkuan mahimo magamit. Ang dalagku nga suludlan, kristal nga mga suludlan, kag alkoholiko nga mga ilimnon wala ginatugutan sa pasilidad sang kombension.

◼ Rekording: Ang bisan ano nga kagamitan sa pagrekord indi dapat iangot sa mga kagamitan sa koryente ukon sa sound system sang pasilidad kag mahimo lamang ini gamiton sa paagi nga indi makatublag sa iban.

◼ Bawtismo: Ang mga kandidato sa bawtismo dapat magpungko na sa ginhanda nga mga bangko para sa ila antes magsugod ang programa sa Sabado sang aga. Ang kada isa magdala sing maugdang nga bayo nga pangpaligo kag tualya. Agod mapat-od nga ang ila bayo nagakaigo sa okasyon, dapat ini hinun-anunan sang gulang nga nagarepaso sa Organisado nga libro sa kandidato.

◼ Badge Card: Palihug itakod ang inyo badge card sa tanan nga tion samtang yara sa kombension kag kon nagabiyahe pakadto-pauli. Matigayon ninyo ini paagi sa inyo kongregasyon. Indi paghulata nga malapit na lang ang adlaw sang kombension bag-o kamo mangabay sini para sa imo kag sa imo pamilya.

◼ Pagpangretrato: Kon mangretrato ka, dapat wala ini sing flash sa tion sang sesyon.

◼ Mga Pager kag Cell Phone: Dapat ini i-set nga indi makaisturbo.

◼ Aksidente kag Emerhensia: Kon may medikal nga emerhensia sa duog sang kombension, palihug tawga ang malapit nga attendant, agod mapahibalo niya dayon ang Departamento sang First Aid kag ang kalipikado nga nagboluntaryo sa first-aid makabulig gilayon sa sini nga emerhensia.