Buligi ang Inyo Kabataan nga Mag-uswag sa Ministeryo
1 May daku gid nga salabton ang mga ginikanan sa paghanas sa ila kabataan agod makigbahin sa ministeryo samtang lamharon pa sila. Mahimo nila ini sa madamo nga paagi. May pila ka kabataan nga makasaulo na sang teksto antes pa sila makahibalo magbasa. May mabaskog ini nga epekto sa mga nagapamati. Samtang nagadaku ang kabataan, madamo pa sila sing mahimo sa ministeryo. Mga ginikanan, paano ninyo mabuligan ang inyo kabataan nga makigbahin sa pagpanaksi? Ayhan makabulig gid ang masunod nga mga panugda.
2 Pagkatapos makapanamyaw, ayhan magsiling ka:
◼ “Ang akon bata, si [ngalan sang bata], may isa ka importante nga teksto nga luyag ipabati sa imo.” Ang imo bata mahimo magsiling: “Ginpahibalo sa akon sang teksto sa Salmo ang ngalan sang Dios. [Basahon sang bata ukon ihambal ang kaundan sang Salmo 83:18.] Ining mga magasin nagabinagbinag kon ano ang pagahimuon ni Jehova para sa aton. Mahimo ko bala mabilin ini sa imo?” Mahimo mo tapuson ang inyo paghambalanay paagi sa pagpaathag kon paano ginasakdag ang aton bug-os kalibutan nga hilikuton.
3 Ukon mahimo mo gamiton ini nga pamaagi:
◼ “Ginahanas ko ang akon bata, si [ngalan sang bata], nga magbulig sa iban sa komunidad. Luyag niya ipaambit sa imo ang isa ka malip-ot nga mensahe gikan sa Biblia.” Mahimo sia magsiling: “Ang isa ka paagi nga luyag ko makabulig sa mga tawo amo ang pagpaambit sa ila sang paglaum nga ginahatag sa aton sang Biblia para sa palaabuton. [Basahon sang bata ukon ihambal ang kaundan sang Bugna 21:4.] Ginapaathag sining magasin kon ano ang pagahimuon sang Ginharian sang Dios para sa aton. Sa banta ko, malipay ka sa pagbasa sini.”
4 Ang padayon nga paggamit sang ginpasimple nga presentasyon nagahatag sing kompiansa sa kabataan sa pagpaambit sing mensahe sang Ginharian. Ang mga sesyon sa pag-ensayo nga nagakonsentrar sa paghambal sing maathag kag sa nagakaigo nga katunugon nagabulig sa ila nga maghambal sa bisan ano nga kahimtangan. Ang maayo nga abanse nga paghanda kag ang hanuot nga komendasyon magabulig sa mga bata nga magpahayag sang ila pagtuo.
5 Paagi sa sining pagpalig-on, madamo nga kabataan ang nangin kalipikado nga mangin di-bawtismado nga mga manugbantala. Makalilipay gid nga makita ang aton kabataan nga nagauswag sa Cristianong ministeryo!—Sal. 148:12, 13.