Palambua ang Ikasarang sa Pagpangatarungan sa Iban
1. Anong kasaysayan sa Biblia ang aton usisaon, kag ngaa?
1 Ang diskurso ni apostol Pablo sa sinagoga sa Antioquia sa Pisidia, nga narekord sa Binuhatan 13:16-41, isa ka maayong halimbawa kon paano mangatarungan sa iban. Ginahunahuna ni Pablo ang ginhalinan kag panimuot sang iya mga tagpalamati kag ginpahisuno sini ang iya pagpresentar sang maayong balita. Samtang gin-usisa naton ini nga kasaysayan, binagbinagon naton kon paano naton sia mailog sa aton pagministeryo.
2. Ano ang matun-an naton gikan sa pamaagi ni Pablo sa pagdiskurso?
2 Magpangita Sing Butang nga Ginaugyunan: Bisan pa ang mensahe ni Pablo nasentro sa panguna nga papel ni Jesus sa katumanan sang katuyuan sang Dios, wala niya ginsugdan ang iya diskurso paagi sa sini. Sa baylo, nagpamulong sia sang butang nga ginaugyunan sang iya kalabanan nga tagpalamati nga Judiyo—nga amo ang maragtas sang mga Judiyo. (Binu. 13:16-22) Sing kaanggid, mangin mas epektibo kita sa pagkumbinsi sa mga tawo kon mangita kita sing butang nga ginaugyunan nila. Mahimo nga maggamit kita sing mataktikanhon nga mga pamangkot kag mamati sing maayo agod mahantop kon ano gid ang importante para sa ila, agod mapabutyag nila ang ila mga balatyagon.
3. Ngaa mabudlay sa mga tagpalamati ni Pablo nga batunon si Jesus subong ang ginsaad nga Mesias?
3 Sa pagsugid sa maragtas sang mga Judiyo, ginpahanumdom ni Pablo ang iya tagpalamati sa ginsaad sang Dios nga Manluluwas nga magahalin sa kaliwatan ni David. Apang, madamong Judiyo ang nagapaabot sang isa ka baganihan nga hangaway nga magahilway sa ila gikan sa pagdumalahan sang Roma kag magabayaw sang Judiyong pungsod sa iban nga pungsod. Pat-od gid nga nahibaluan nila ang pagsikway sang mga Judiyong lider sa Jerusalem kay Jesus, pagtugyan sa iya sa Romanong awtoridad, kag pagpatay sa iya. Paano sila kumbinsihon ni Pablo nga ining Isa amo ang ginsaad nga Mesias?
4. Paano nangatarungan si Pablo sa iya tagpalamati nga mga Judiyo?
4 Ipahisuno ang Imo Pamaagi: Nakahibalo sa ginahunahuna sang iya mga tagpalamati, naggamit si Pablo sing Kasulatan sa pagpangatarungan sa ila pasad sa mga butang nga ila na ginbaton. Halimbawa, ginpakilala niya si Jesus subong kaliwat ni David kag ang isa nga ginkilala ni Juan Bautista, nga ginkabig sang madamo nga manalagna sang Dios. (Binu. 13:23-25) Ginsugid ni Pablo nga paagi sa pagsikway kag pagpatay kay Jesus, ‘gintuman sang mga relihiosong lider ang mga butang nga ginasiling sang mga Manalagna.’ (Binu. 13:26-28) Dugang pa, ginpaathag niya nga may nakakita gid nga si Jesus nabanhaw, kag ginpatalupangod niya ang pamilyar nga dinalan sa Kasulatan nga natuman sang ginbanhaw si Jesus.—Binu. 13:29-37.
5. (a) Paano ginpahisuno ni Pablo ang iya pamaagi kon nagapakigsugilanon sa mga Griego? (b) Paano naton mailog ang halimbawa ni Pablo kon nagabantala sa aton teritoryo?
5 Sa pihak nga bahin, sang nagpamulong sia sa mga Griego sa Areopago sa Atenas, naggamit si Pablo sing lain nga pamaagi. (Binu. 17:22-31) Apang amo man nga mensahe ang iya ginpresentar, kag sa sining duha ka kahimtangan nangin maayo ang resulta sang iya panikasog. (Binu. 13:42, 43; 17:34) Amo man karon, mangin mas epektibo kita sa aton ministeryo kon tinguhaan naton nga mangita sing mga butang nga ginaugyunan sang aton tagpalamati kag kon ipahisuno naton ang aton pamaagi sa ila nahibaluan na kag sa ila ginahunahuna.