Pagpanukod Sing Kingdom Hall—Isa ka Importante nga Bahin Sang Sagrado nga Pag-alagad
1. Ano ang nahimo na sa pagpanukod sing Kingdom Hall, apang ano pa ang kinahanglanon?
1 Sang nagligad nga tatlo ka tuig kag tunga, 150 ka Kingdom Hall ang natukod sa teritoryo sang sanga sa Pilipinas. Tudok gid naton nga ginapasalamatan ang pagpangabudlay sang mga Kingdom Hall Construction Group kag sa tanan nga nagbulig sa ila. Bisan madamo na ang natukod, madamo pa nga Kingdom Hall ang kinahanglan tukuron. Paano kita tanan makabulig sa sining importante nga bahin sang aton sagrado nga pag-alagad kay Jehova?—Bug. 7:15.
2. Paano kita direkta nga makabulig sa pagpanukod sang Kingdom Hall?
2 Mangin Masinakdagon: Kon bawtismado ka nga manugbantala, ginaagda ka namon nga magboluntaryo upod sa Kingdom Hall Construction Group paagi sa pagsulat sa isa ka Application for Kingdom Hall Construction Volunteer Program (A-25). Matigayon ini nga pormas sa inyo kongregasyon ukon mahimo magpangabay sini sa sanga talatapan paagi sa mga gulang. Kon aprobahan, agdahon ka sa pagboluntaryo sa pagpanukod sang Kingdom Hall sing mga tatlo tubtob anom ka bulan. Ang isa pa ka paagi nga makaboluntaryo ka bisan indi ka mag-aplay amo ang pagboluntaryo sing isa ukon duha ka adlaw ukon isa pa gani ka semana sa ginatukod nga Kingdom Hall sa inyo sirkito ukon sa kaiping nga sirkito. Ang tanan nga boluntaryo dapat kinabubut-on nga magpangabudlay kag dapat magkooperar. (Sal. 133:1) Bisan wala ka sing kalantip sa pagpanukod, makabulig ka gid sa kadalag-an sang proyekto nga pagpanukod. Mahimo ka man mahanas, kag magapaposible ini sa imo nga magamit sing mas mapuslanon pa sa palaabuton.
3. Sa anong iban pa nga paagi nga makabulig kita sa sini nga kahimusan?
3 Kon indi ka makasarang sa pagboluntaryo, mapakita mo ang imo pagsakdag paagi sa pagpalig-on sa iban nga makasarang sa pagpakigbahin sa sini nga kahimusan. Makabulig ka paagi sa pagtatap sang mga asaynment sa kongregasyon sang mga nagboluntaryo sa pagpanukod sang Kingdom Hall. Paagi sa abanse nga pagplano, mapat-od sang mga gulang nga matatap sing maayo ang kongregasyon kon magboluntaryo ang iban sa pagpanukod sang Kingdom Hall. Wala duhaduha, nalipay gid si Jehova kon nahiusa kita para sa pagpasangkad sang intereses sang Ginharian.—Heb. 13:16.
4. Paano naton mapalig-on ang mga nagapakigbahin sa pagtukod sang mga Kingdom Hall?
4 Mangin Positibo: Ang pagtukod sing mga duog sang pagsimba nagakinahanglan sing madugay nga tion kag pagpangabudlay. Amo nga ang mga gin-agda sa pagbulig sa pagtukod mahimo nga madugaydugay nga wala sa ila kongregasyon. Kabay pa nga pasalamatan kag palig-unon naton pirme ang mga boluntaryo sa pagpanukod, nga nagasakripisyo sa pagtatap sa sining “kinahanglanon nga buluhaton.”—Binu. 6:3; Roma 14:19.
5. Paano mapakita sang mga boluntaryo ang pagkabalanse?
5 Mangin Balanse: Ang pagbantala sing Ginharian sang Dios amo ang aton panguna nga teokratikong hilikuton. (Mar. 13:10) Amo nga ang Kingdom Hall Construction Desk kag ang mga Regional Kingdom Hall Office nagatinguha gid sa pagplano sa mga proyekto agod makapakigbahin ang mga boluntaryo sing regular sa ministeryo sa latagon. Sing kaanggid, ang mga boluntaryo nagatinguha man nga mangin balanse sa pagtatap sang ila espirituwal nga mga responsibilidad.
6. Ano ang resulta kon ang tanan sa kongregasyon magakooperar sa pagpasangkad sang matuod nga pagsimba?
6 Ginlaragway ni apostol Pablo ang mga miembro sang kongregasyon nga nagapanghikot sing nahiusa nga “nagapatubo sa lawas agod maglig-on ini sa gugma.” (Efe. 4:16) Ang aton gugma kay Jehova kag sa matuod nga pagsimba magapahulag sa aton sa pagkooperar sing nahiusa agod mabantala ang maayong balita kag masakdag ang pagpanukod sang Kingdom Hall.