Pagpakita Sing Personal nga Interes—Paagi sa Paghatag Sing Komendasyon
1 Ang sinsero nga komendasyon nagapapagsik sa mga tawo, nagapahulag sa ila, kag nagapahalipay sa ila. Nasapwan sang madamo nga manugbantala nga ang malip-ot apang sinsero nga komendasyon masami nga makabulig agod mamati ang iban sa aton sa ministeryo. Paano naton mahatagan sing komendasyon ang mga tawo samtang ginatinguhaan naton nga bantalaan sila sang maayong balita?
2 Mangin Mapanilagon: Gintalupangod gid sang ginhimaya nga si Jesucristo ang maayong mga binuhatan sang pito ka kongregasyon sa Asia Minor. (Bug. 2:2, 3, 13, 19; 3:8) Sing kaanggid, ang tunay nga interes sa mga tawo nga aton masugilanon sa aton ministeryo magapahulag sa aton nga mangita sing kahigayunan nga makahatag sing komendasyon. Halimbawa, ang isa ka matinlo nga ugsaran, ang isa ka mapinalanggaon nga ginikanan sa iya kabataan, ukon ang isa ka mainabyanon nga yuhum kag pagtamyaw sang tagbalay, tanan ini mga kahigayunan nga makahatag kita sing komendasyon sa ila. Handa ka bala nga panilagan kag kalitan ini nga mga kahigayunan?
3 Mangin Maayo nga Tagpalamati: Kon nagapanaksi, magbangon sing nagakaigo nga mga pamangkot agod makapabutyag sila sang ila opinyon. Padunggi sila paagi sa pagpamati sing maayo. (Roma 12:10) Mahimo nga makasapo ka sing pila ka butang nga mahatagan mo sing sinsero nga komendasyon kag nian basihan mo sang topiko nga inyo maugyunan nga hambalan.
4 Magmahinantupon: Ano ang dapat naton himuon kon ang sabat sang tagbalay indi nahisanto sa kamatuoran sa Biblia? Sa baylo nga baison sia tuhoy sa sayop nga sabat, pasalamati ang sabat sang tagbalay kag magpadayon paagi sa pagsiling “Nakita ko nga interesado ka gid sa sini nga topiko.” (Col. 4:6) Bisan pa palabais ang tagbalay, mahimo naton sia mahatagan sing komendasyon sa iya tunay nga interes sa topiko. Ini nga pamaagi mahimo magpahumok sa isa nga hugot gid nga nagapamatok sa maayong balita.—Hulu. 25:15.
5 Agod makapalig-on, dapat nga sinsero ang aton komendasyon. Ang paghambal sinang makapalig-on nga pulong magadayaw kay Jehova kag mahimo makaganyat sa iban sa mensahe sang Ginharian.