“Padayon Ninyo nga Himuon Ini Bilang Pagdumdom sa Akon”
Ang Kamatayon ni Jesus Dumdumon sa Abril 2
1. Ngaa ang Abril 2, 2007, isa ka importante nga petsa?
1 Sa Abril 2, 2007, minilyon ka tawo sa bug-os nga kalibutan ang magatipon agod dumdumon ang mahalaron nga kamatayon ni Jesus. Napatay si Jesus subong sumalakdag sang soberanya sang iya langitnon nga Amay kag naghatag sing pamatuod nga sayop ang panumbungon ni Satanas nga Yawa nga ang mga tawo nagaalagad lamang sa Dios bangod sa makagod nga mga motibo. (Job 2:1-5) Ang Panihapon sang Ginuo nagapahanumdom man sa aton nga paagi sa iya kamatayon subong himpit, wala sala nga tawo, ‘ginhatag ni Jesus ang iya kalag subong gawad nga kabaylo sang madamo.’ (Mat. 20:28) Busa, ginsugo ni Jesus ang iya mga disipulo: “Padayon ninyo nga himuon ini bilang pagdumdom sa akon.” (Lucas 22:19) Wala ka bala ginapahulag sang imo apresasyon sa sining bilidhon nga dulot sang Dios nga magsugod na sa paghanda sa pagdumdom sining labing daku nga buhat sang gugma?—Juan 3:16.
2. Paano naton mahanda ang aton tagipusuon para sa Memoryal?
2 Ihanda ang Imo Tagipusuon: Paagi sa pagbinagbinag sa mga natabo sa kada adlaw sang hingapusan nga mga adlaw sang tawhanon nga kabuhi ni Jesus, mahanda naton ang aton tagipusuon para sa sining pagsaulog sang Memoryal. (Esdras 7:10) Agod buligan kita sa sini, may iskedyul sang pinasahi nga pagbasa sa Biblia nga masapwan sa Pag-usisa sa Kasulatan—2007 kag sa 2007 Calendar. Ining iskedyul sa pagbasa halos nahisanto sa mga adlaw nga nagdul-ong sa kamatayon ni Jesus suno sa kalendaryo nga ginagamit naton karon. Ang mga adlaw kag mga petsa nga ginpatuhuyan sa rekord sang Biblia ginpasad sa kalendaryo sang mga Judiyo, nga nagaisip sang mga adlaw halin sa pagtunod tubtob sa masunod nga pagtunod. Ang iskedyul sa pagbasa sang Biblia para sa Memoryal nahisanto sa sining pamaagi sa pag-isip sang adlaw. Ang pagsunod sa sining iskedyul sa pagbasa kag ang mapangamuyuon nga pagpamalandong sa kadalumon sang gugma sang Dios magabulig sa aton nga makapanginpulos sing bug-os sa pagsaulog sa Memoryal.
3. Paano naton mabuligan ang mga interesado kag mga di-aktibo nga makabenepisyo sa Memoryal?
3 Agdaha ang Iban nga Magtambong: Ginpahibalo sa suplemento sang Pebrero nga Ang Aton Ministeryo sa Ginharian ang isa ka espesyal nga kampanya sa pag-agda sa mga tawo sa sining importante nga okasyon. Nakahimo ka na bala sing mga kahimusan nga makigbahin sing bug-os sa sining kampanya? Nakahimo ka na bala sing listahan sang agdahon mo nga mga kakilala, kag nasugdan mo na bala ang pag-agda sa ila? Maghimo sing plano nga mag-abot sing temprano sa gab-i sang Memoryal agod maabiabi mo ang imo mga ginpang-agda subong man ang iban nga mga interesado. Puede mo sila tuparan sa pulungkuan, agod mapat-od nga may Biblia sila kag songbook. Ipakilala sila sa iban nga kauturan. Pagkatapos sang programa, hatagi sing tion ang pagsabat sa ila mga pamangkot. Agdaha sila nga magtambong sa pinasahi nga pamulongpulong publiko nga ihatag sa Abril 15. Ang mga gulang dapat mangin interesado gid sa pagpat-od nga ang mga nangin di-aktibo makabaton sing imbitasyon sa Memoryal kag sa pinasahi nga pamulongpulong.
4. Paano naton mabuligan ang mga tawo sa pagpadayon sa pag-uswag sa espirituwal pagkatapos sang pagsaulog sang Memoryal?
4 Buligi ang Bag-o nga mga Interesado kag mga Di-aktibo nga Mag-uswag: Ipaathag sing malip-ot sang humalambal sa Memoryal ang kahimusan sa pagtuon sa Biblia kag palig-unon ang mga interesado nga magpadayon sa pagtuon tuhoy kay Jehova. Puede mo gamiton ang iya komento subong basehan sa pagtanyag sing dugang pa nga espirituwal nga bulig sa imo mga gin-agda. Kon wala pa sila nagatuon sa Biblia, pat-ura nga maduaw sila gilayon pagtapos sang Memoryal kag ipasundayag ang kahimusan sang walay bayad nga pagtuon sa Biblia. Agod mag-uswag sila sa espirituwal, kinahanglan man sila magtambong sa mga miting sang kongregasyon. (Heb. 10:24, 25) Agod mahimo ini, palig-una sila nga magtambong sing regular. Dapat man duawon sang mga gulang ang di-aktibo nga mga Cristiano kag buligan sila nga binagbinagon sing maayo ang mga ginpresentar sa Memoryal. Mahimo ini magpalig-on sa ila nga magpanghikot liwat sa kongregasyon.
5. Ano ang mahimo mangin epekto sa aton sang pagsaulog sang Memoryal?
5 Ang pagsaulog sang Memoryal nagahatag sa aton sing kahigayunan nga mapamalandungan sing serioso ang ginhimo ni Jehova kag ni Jesus para sa aton. Ining pagpamalandong nagapadalom sang aton gugma sa ila kag nagaapektar sa aton paggawi. (2 Cor. 5:14, 15; 1 Juan 4:11) Karon na ang tion nga ihanda naton ang aton kaugalingon kag ang mga interesado para sa sining importante nga okasyon, ang panahon nga ‘ginapahayag naton ang kamatayon sang Ginuo.’—1 Cor. 11:26.