Ginapangapinan Mo Bala ang Pulong sang Dios?
1 Sa isa ka kalibutan nga masami ginapangduhaduhaan ang Biblia, ang matuod nga mga Cristiano makugi nga nagasakdag sa Pulong sang Dios. Bangod kumbinsido kita nga “ang bug-os nga Kasulatan inspirado sang Dios,” nagaugyon kita kay Jesucristo, nga nagpamatuod sa iya pangamuyo kay Jehova: “Ang imo pulong kamatuoran.” (2 Tim. 3:16; Juan 17:17) Paano naton mapangapinan sing epektibo ang Pulong sang Dios?
2 Tun-i ang Kasulatan: Wala sing duhaduha nga maid-id nga gintun-an ni Jesus ang Pulong sang Dios. Nagpaposible ini sa iya nga makatudlo gikan sa Kasulatan sa bug-os niya nga ministeryo. (Luc. 4:16-21; 24:44-46) Paano kita makatipon sing nagakaigo nga ihibalo sa kasulatan? Ginahimo naton ini paagi sa pagbasa sang Biblia kada adlaw kag sa pagpamalandong sa mga bersikulo nga sa banta naton ilabi na nga makapalig-on sa aton ukon mabuligon para sa ministeryo. Kon maghanda para sa mga miting, dapat naton tan-awon kag basahon mismo sa Biblia ang ginasambit nga mga teksto kag ayhan maghanda sing komento sa sini. Kon nagatambong sa mga miting, dapat sundan naton sa aton Biblia ang teksto nga ginabasa sang humalambal. Ang pagtuon sa mga teksto sa Biblia magahanda sa aton sa ‘paggamit sing husto sa pulong sang kamatuoran.’—2 Tim. 2:15.
3 Pasugira ang Biblia: Kon nagapakigbahin sa ministeryo, dapat naton tugutan nga magsugid ang Biblia. Halimbawa, kon itugot sang mga kahimtangan, dapat naton tinguhaan nga ipaambit sa tagbalay ang isa ka teksto. Kon mamangkot sia ukon mamatok, labing maayo nga gamiton naton ang Biblia sa pagsabat. Kon masako ang tagbalay, mahimo gihapon naton mapatalupangod ang isa ka panghunahuna sa Biblia paagi sa pagsiling, “Antes ako maglakat, tuguti ako sa pagbasa sa imo sang isa ka teksto.” Kon posible, basaha ini gikan sa Biblia, kag ipakita sa tagbalay agod masundan niya ang imo ginabasa.
4 Sang nakita sang isa ka tagbalay ang isa ka teksto nga nagapakita nga sayop ang Trinidad, nagtuaw sia, “Nagasimba ako sa bug-os ko nga kabuhi, kag wala gid ako sing hinalung-ong sa ginasiling sang Biblia tuhoy sini!” Ginbaton niya gilayon ang isa ka pagtuon sa Biblia. Nagsiling si Jesus nga pamatian sang iya mga karnero ang iya tingog. (Juan 10:16, 27) Ang labing maayo nga paagi agod nga mahibaluan sang mga bunayag ang kamatuoran amo ang direkta nga pagpakita sini gikan sa Kasulatan. Kabay nga mangin mga manugpangapin kita sang Pulong sang Dios sang kamatuoran!