“Ipakita nga Mapinasalamaton Kamo”
1 Sang gin-ayo ni Jesus ang napulo ka aruon, isa lamang sa ila ang nagbalik kag nagpasalamat. Namangkot si Jesus: “Napulo ka aruon ang gin-ayo, indi bala? Kon amo, diin na ang siam?” (Luc. 17:11-19) Ginapakita sini nga dapat gid kita mangin mainapresyahon kag mapinasalamaton sa tagsa ka maayong dulot kag himpit nga regalo nga ginabaton naton gikan sa aton maalwan kag mahigugmaon nga Amay sa langit nga si Jehova nga Dios!—Col. 3:15; Sant. 1:17.
2 Ano ang pila ka butang nga dapat naton pasalamatan? Ginapasalamatan naton ang gawad, ang pinakadaku nga regalo sang Dios sa katawhan. (Juan 3:16) Mapinasalamaton man kita nga ginbuyok kita ni Jehova palapit sa iya. (Juan 6:44) Ang aton Cristianong paghiusa isa pa ka butang nga dapat naton pasalamatan. (Sal. 133:1-3) Walay duhaduha nga madamo pa kita sing madumduman nga regalo nga nabaton naton gikan kay Jehova. Kabay nga indi naton pag-ilugon ang di-mapinasalamaton nga mga Israelinhon nga ginkalimtan nila ang mga ginhimo ni Jehova para sa ila!—Sal. 106:12, 13.
3 Ipakita ang Imo Pagkamapinasalamaton: Bisan pa napulo ka aruon ang nag-apresyar sa ginhimo ni Jesus sa ila, isa lamang ang nagpakita sing pagkamapinasalamaton. (Luc. 17:15) Sing kaanggid, mapakita man naton ang aton pagkamapinasalamaton paagi sa makugi nga pagpakigbahin sa ministeryo. Kon nagapasalamat gid kita sa tanan nga ginhimo sang aton mahigugmaon kag langitnon nga Amay, ang aton tagipusuon magapahulag sa aton nga balusan ang iya gugma kag kaalwan paagi sa mapisan nga pagsugid sa iban tuhoy sa iya. (Luc. 6:45) Kag samtang ginasugid naton sa iban ang tuhoy sa ‘makatilingala nga buhat nga ginhimo’ ni Jehova para sa aton, labi pa nga magatubo ang aton gugma kag apresasyon kay Jehova.—Sal. 40:5.
4 Palig-una ang iban nga Mangin Mainapresyahon: Dapat kita mangita sing paagi nga mabuligan ang aton kabataan kag mga ginatudluan sa Biblia nga magpalambo sing apresasyon. Madamo sing kahigayunan ang mga ginikanan nga mahimo ini, subong sang pagpakigsugilanon sa ila kabataan tuhoy sa mga butang nga gintuga ni Jehova. (Roma 1:20) Kon nagadumala kita sing isa ka pagtuon sa Biblia, mahimo naton pamangkuton ang aton estudyante, “Ano ang ginasugid sini sa aton tuhoy sa personalidad ni Jehova?” Samtang labi nga nagalambo ang apresasyon sang estudyante, labi man nga magalambo ang iya gugma sa Dios kag ang iya determinasyon nga pahamut-an sia.
5 Sa sining katapusan nga mga adlaw, madamo ang di-mainapresyahon kag di-mapinasalamaton. (2 Tim. 3:1, 2) Daw ano gid ang kahamuot ni Jehova kon makita niya ang iya matutom nga mga alagad nga nagapakita sing pagkamapinasalamaton paagi sa ila makugi nga pagpakigbahin sa ministeryo!—Sant. 1:22-25.