Pinasahi nga Kampanya sa Tract—Oktubre 20–Nobiembre 16!

¹ Sugod sa Lunes, Oktubre 20 tubtob sa masunod nga apat ka semana, magapakigbahin kita sa pinasahi nga pagpanagtag sang bag-o nga tract nga ginatig-uluhan Luyag Mo Bala Mahibaluan ang Kamatuoran? Ginalauman nga ining bug-os globo nga pinasahi nga kampanya magapukaw sa interes sang mas madamo nga tawo sa lamang nga tuburan sang kamatuoran.​—Juan 17:17.

² Ang tract nagahatag sing malip-ot kag Makasulatanhon nga mga sabat sa anom ka importante nga pamangkot: “Nagaulikid gid bala ang Dios sa aton?” “Madula pa ayhan ang inaway kag pag-antos?” “Ano ang nagakatabo kon mapatay kita?” “Mabuhi pa bala liwat ang mga patay?” “Ginapamatian bala sang Dios ang akon pangamuyo?” kag “Paano ko matigayon ang matuod nga kalipay?” Ang mga relihion sang Cristiandad wala gid nakahatag sing makapakumbinsi nga mga sabat sa sining mga pamangkot. Bisan yadtong mga di-“Cristiano” nagapalibog man sa sining mga butang, apang wala sila nakahibalo nga ang maathag nga mga sabat yara sa Biblia. Busa, ginapaabot nga mas madamo nga tawo ang magapabalor sa sining mensahe.

³ Tuptupi ang Inyo Teritoryo: Panikasugi gid nga matuptupan ninyo ang tanan nga pamalay sa inyo teritoryo. Kon daku ang inyo teritoryo, mahimo kamo palig-unon sang mga gulang nga bisan ang mga balay nga wala sing tawo bilinan sang tract. Indi pagkalipati nga hatagan sang tract ang imo mga kaingod, paryente, kakilala sa trabaho ukon sa eskwelahan, kag ang iban pa nga tawo nga pirme mo ginasugilanon. Basi puede mo planuhon nga mag-auxiliary payunir sa Oktubre ukon sa Nobiembre. May bata ka bala ukon estudyante sa Biblia nga nagauswag sa espirituwal kag mahimo na magbuylog sa aton sa sining kampanya subong di-bawtismado nga manugbantala? Kon may yara, pahibalua ang mga gulang.

⁴ Kon Ano ang Ihambal: Agod madamo ka sing mapalab-utan sing mensahe, mas maayo kon lip-uton mo lang ang imo presentasyon. Pamangkuta ang tagbalay sang isa sa anom ka pamangkot nga makita sa panghapin kag ipakita sa iya ang sabat sa tract. Sa sini nga paagi, mapasibu sang tanan nga manugbantala ang ila presentasyon sa kinahanglanon sang mga tawo sa ila teritoryo. Kon may magpakita sing interes, irekord ini kag baliki. Sa mga talipuspusan sang semana, mahimo itanyag ang bag-o nga mga magasin upod ang tract. Pagkatapos sang kampanya sa Nobiembre 16, itanyag naton ang Ginatudlo Sang Biblia nga libro. Ang mabilin nga mga tract mahimo gamiton subong sang kinaandan nga mga tract.

⁵ Magsugod sing Pagtuon sa Biblia: Ini nga tract gindesinyo gid agod buligan kita nga makasugod sing mga pagtuon sa Biblia. Kon nagaduaw liwat sa tawo nga nagpakita sing interes, mahimo mo sia pamangkuton kon ano nga kamatuoran sa Biblia ang naghatag sa iya sing lugpay ukon kaumpawan? Ipatalupangod ang katapusan nga pahina nga nagasambit tuhoy sa kahimusan nga pagtuon sa Biblia, kag hatagi sia sing kopya sang Ginatudlo Sang Biblia nga libro. Kon posible, binagbinaga sing makadali ang isa ukon duha ka parapo sa kapitulo nga nagahinun-anon sa topiko nga iya ginpili.

⁶ Ginapangita ni Jehova yadtong magasimba sa iya “sa espiritu kag kamatuoran.” (Juan 4:23) Kabay nga tanan kita makigbahin sa sining pinasahi nga kampanya agod mabuligan ang iban nga mahibaluan ang kamatuoran!