May Hamili Kita nga Bahandi nga Ipaambit

¹ Ang Pulong sang Dios puno sing espirituwal nga mga bahandi nga ginapabaloran gid naton. (Sal. 12:6; 119:11, 14) Isa ka bes, naggamit si Jesus sing mga ilustrasyon nga nagalaragway sa nanuhaytuhay nga aspekto sang Ginharian, kag nian ginpamangkot niya ang iya mga disipulo: “‘Nahangpan bala ninyo ini tanan?’ Nagsiling sila sa iya: ‘Huo.’ Nian nagsiling sia sa ila: ‘Kon amo, ang tagsa ka manunudlo sang mga tawo, nga natudluan tuhoy sa ginharian sang langit, kaangay sa isa ka tawo, isa ka agalon sang panimalay, nga nagapagua sang bag-o kag daan nga mga butang sa iya talaguan sing bahandi.’”​—Mat. 13:1-52.

² Ang mga kamatuoran sa Biblia nga natun-an naton sang nagsugod kita sa pagtuon mahimo naton kabigon subong daan na nga mga bahandi. Paagi sa aton padayon nga pagtuon sa mas madalom nga mga butang sang Pulong sang Dios, makasapo kita sang iban pa nga mga kamatuoran sa Biblia nga makabig naton nga bag-o nga mga bahandi. (1 Cor. 2:7) Nian paagi sa “matutom kag mainandamon nga ulipon,” nahangpan naton ining bag-ong mga bahandi.​—Mat. 24:45.

³ Ginapabaloran gid naton ining daan kag bag-o nga espirituwal nga mga bahandi. Ginapahulag kita sini nga magpahanas kag magtigayon sing eksperiensia subong mga manunudlo sang Pulong sang Dios kag magpaambit sing maalwan sa iban sang hamili nga mga kamatuoran nga aton natun-an.

⁴ Magtuon sa Halimbawa ni Jesus: Ginapabaloran ni Jesus ining mga bahandi amo nga nagpanikasog gid sia nga ipaambit ini sa iban. Bisan pa kapoy na sia, padayon gihapon sia nga nagapagua sing mga bahandi gikan sa iya “tambubo.”​—Juan 4:6-14.

⁵ Bangod sa gugma ni Jesus sa mga tawo nga imol sa espirituwal, napahulag sia nga ipaambit sa ila ang nagahatag-kabuhi nga mga bahandi sang kamatuoran tuhoy sa Dios. (Sal. 72:13) Naluoy gid sia sa mga gutom sa espirituwal amo nga “nagpanudlo sia sa ila sang madamo nga butang.”​—Mar. 6:34.

⁶ Iluga si Jesus: Kon ginapabaloran naton ang aton mga bahandi, panikasugan gid naton, kaangay ni Jesus, nga ipakita sing direkta gikan sa Biblia ang espirituwal nga mga hiyas. (Hulu. 2:1-5) Bisan pa nga kon kaisa mahimo nga ginakapoy kita, isugid gihapon naton ang Makasulatanhon nga mga kamatuoran nga may kapagsik. (Mar. 6:34) Ang aton daku nga pagpabalor sa mga bahandi magapahulag sa aton nga himuon ang aton labi nga masarangan sa ministeryo, kag panikasugan gid naton pirme nga makigbahin sa sini sing bug-os.