Pinasahi nga Pagpang-imbitar Para sa Memoryal!

1. Ano ang himuon sang mga manugbantala sa bug-os nga kalibutan sugod sa Marso 21, 2009 kag ngaa?

¹ Sa Huebes, Abril 9, 2009, ang tanan nga nagasimba kay Jehova nga Dios sa bug-os nga kalibutan magatipon agod pamalandungan ang iya walay tupong nga gugma sa katawhan. (Roma 5:6-8) Ginapaabot gid naton nga minilyon ka interesado ang magatambong upod sa aton sa pagsaulog sang kamatayon ni Jesus. Ipanagtag ang pinasahi nga imbitasyon para sa Memoryal sugod sa Marso 21 sa bug-os nga kalibutan.

2. Ano nga mga punto ang dapat mo dumdumon kon nagahatag ka sing imbitasyon?

² Mga Punto nga Dapat Dumdumon: Gamita ang mga laragway, mga pamangkot, kag ang teksto nga yara sa imbitasyon. Halimbawa, mahimo mo ipakita ang laragway ni Jesus kag magsiling: “Gusto ko gid nga agdahon ka sa anibersaryo sang kamatayon ni Jesus sa Huebes, Abril 9, 2009.” Dayon, basaha ang tig-ulo sang imbitasyon kag ang mga pamangkot. Silinga sia nga puede niya updon ang iya pamilya kag ang bisan sin-o nga gusto niya agdahon.

3. Paano mo palig-unon ang mga ginhatagan mo sing imbitasyon nga magtambong gid?

³ Kon daku ang teritoryo sang inyo kongregasyon, mahimo pangabayon kamo sang inyo mga gulang nga ibilin ang mga imbitasyon sa mga balay nga wala sing tawo. Sa Sabado kag Domingo, itanyag ang magasin lakip ang imbitasyon. Himua nga tulumuron nga imbitahon ang inyo mga ginaduaw liwat, ginatun-an sa Biblia, paryente, klasmeyt, kaupod sa trabaho, kaingod, kag iban pa nga mga kilala. Sang nagligad nga tuig, gin-agda sang utod nga babayi ang 30 niya ka paryente, dayon pila ka beses niya nga ginpahanumdom sila kon daw ano ka importante ini nga okasyon. Nalipay gid sia nga 25 ang nagtambong, kag 4 sa ila ang nagtuon sa Biblia sang ulihi!

4. Ano ang dapat naton planuhon subong, kag ngaa?

⁴ Magplano Na Subong: Mahimo madugangan sang mga kauturan ang ila tion sa pagbantala sa bulan sang Marso kag Abril. Kon may mga kabataan ka ukon mga gintun-an sa Biblia nga nagauswag, mahimo amo ini ang maayo nga tion agod mangin di-bawtismado sila nga mga alagad. Dapat subong pa lang planuhon mo na para makapakigbahin ka sing maayo sa pagpang-imbitar sa mga tawo nga saulugon ang pinakadaku nga ekspresyon sang gugma ni Jehova kag ni Jesus.​—Juan 3:16; 15:13.