Dayawa si Jehova Kada Adlaw
1. Ang mga alagad sang Dios napahulag nga himuon ang ano, kag ngaa?
1 Ginpabutyag ni Hari David ang iya determinasyon nga dayawon si Jehova “sa tagsa ka adlaw,” tubtob sa walay katubtuban. (Sal. 145:2, 7, 21) May rason man kita nga dayawon si Jehova kada adlaw.—Sal. 37:10; 145:14, 18; 2 Ped. 3:13.
2. Paano ang mga pamilya makadayaw kay Jehova kada adlaw?
2 Sa Aton Puluy-an: May makapalig-on kita nga mga literatura nga makabulig sa aton nga mahambalan ang parte sa Dios kag sa Biblia kon nagabinagbinag kita sang adlaw-adlaw nga teksto, nagahiwat sang aton Pangpamilya nga Pagsimba, kag kon nagahanda para sa mga miting sa kongregasyon. Madamo nga pamilya ang nagakaon nga magkaupod bisan isa lang ka bes kada adlaw. Sa sina nga tion wala sila nagasako-sako, matawhay sila nga nagaistoryahanay kag nagahatag ini sa ila sing kahigayunan nga madayaw si Jehova. Ina nga pag-istoryahanay sang mga ginikanan kag sang ila kabataan makabulig nga mapadaku ang kabataan sa “disiplina kag nagatuytoy nga panghunahuna ni Jehova.”—Efe. 6:4; Deut. 6:5-7.
3. Ano ang aton mga kahigayunan sa pagdayaw kay Jehova kon kaupod naton ang aton mga kauturan?
3 Upod sa mga Kauturan: May maayo kita nga mga kahigayunan nga madayaw si Jehova upod sa aton mga masigkatumuluo sa tion sang aton pag-alagad sa latagon kag sa mga miting sang kongregasyon. (Hulu. 15:30; Fil. 4:8; Heb. 13:15) Bangod pareho kita nga nagahigugma kay Jehova, mahapos kita nga magpabutyag sing sinsero nga apresasyon sa kaayo ni Jehova kon nagapakighambal kita sa isa kag isa.—Sal. 106:1.
4. Luwas sa aton publiko nga ministeryo, sa ano pa nga mga kahimtangan madayaw naton si Jehova?
4 Kon Nagapakighambal sa mga Indi Tumuluo: Bisan mahimo wala ginatugot sang aton kahimtangan nga makigbahin sa aton publiko nga ministeryo kada adlaw, ang pagpakighambal sing makadali sa aton mga katrabaho, kaeskwela, kag sa iban pa tuhoy kay Jehova kag sa iya mga katuyuan makahatag sing paglaum sa bunayag sing tagipusuon nga mga tawo. (Sal. 27:14; 1 Ped. 3:15) Samtang nagasakay sa eroplano ang isa ka utod nga babayi, nagpanaksi sia sa upod niya nga pasahero nga nalugpayan kag napalig-on sa iya nabatian amo nga ginhatag niya sa utod ang iya adres kag numero sang telepono para makakontakanay sila. Samtang nagaantos ang kalibutan bangod sa nagadugang nga problema kag nagalala nga kahimtangan, ang katawhan ni Jehova padayon nga nagadala sing “maayong mga balita sang kaayohan” sa mga tawo nga handa magpamati. Nagahatag ini sa iban sing paglaum kag rason nga dayawon si Jehova.—Isa. 52:7; Roma 15:11.
5. Ngaa handum gid naton nga dayawon si Jehova, kag ano ang mahimo sini?
5 Daw ano gid ang kahamuot ni Jehova nga mabatian ang iya mga alagad nga nagadayaw sa iya kada adlaw! Subong nga ang mga tinuga ni Jehova sa palibot naton nagadayaw sa iya, madayaw man naton sia kada adlaw sa aton mga puluy-an, sa kongregasyon, kag kon nagapakighambal kita sa mga indi tumuluo. Paagi sa sini mabuligan naton sila nga dayawon man si Jehova.—Sal. 19:1-4.