Programa Para sa Adlaw sang Pinasahi nga Asembleya sa 2010

1. (a) Ano nga mga tema pasad sa Kasulatan ang ginpasangkad sang nagligad nga mga adlaw sang pinasahi nga asembleya? (b) May partikular bala nga mga punto gikan sa nagligad nga mga adlaw sang pinasahi nga asembleya nga nakabulig sa imo pagministeryo?

¹ “Pat-ura ang Mas Importante nga mga Butang,” “Malig-on nga Nagatindog Subong Isa ka Panong,” “Padayon nga Magpanaksi sang Kamatuoran,” kag “Kita ang Lunang—Si Jehova ang Aton Maninihon.” (Fil. 1:9, 10, 27; Juan 18:37; Isa. 64:8) Pila lamang ini sa madamo nga tema nga ginbinagbinag sang nagligad nga mga adlaw sang pinasahi nga asembleya. Nalangkag bala kamo sa pagtambong sa aton adlaw sang pinasahi nga asembleya sa 2010? Pasangkaron sini ang tema nga: “Malip-ot Na Lang ang Nabilin nga Tion,” nga nabase sa 1 Corinto 7:29.

2. Paano mapukaw ang inyo kalangkag para sa asembleya?

² Mangin malangkagon sa inyo pag-istoryahanay parte sa adlaw sang pinasahi nga asembleya sa tion nga ipahibalo na ang petsa sa inyo kongregasyon. Ginabuligan sang pila ka ginikanan ang ila kabataan nga malangkag man sa pagpaabot sang asembleya paagi sa pagsulat sang petsa sini sa ila kalendaryo, lakip na ang listahan sang mga kinahanglanon, kag nian isipon nila kon pila na lang ka adlaw ang nabilin antes sang ila asembleya. Sa tion sang inyo Pangpamilya nga Pagtuon, mahimo nga repasuhon ninyo ang inyo mga nota sang nagligad nga mga asembleya. Mahimo man kamo makahanda paagi sa pagrepaso sang Magbenepisyo sa Pagpanudlo Sang Teokratikong Eskwelahan Para sa Ministeryo, pahina 13-16, agod mabuligan kamo kag ang inyo pamilya sa pagtalupangod kon “paano kamo nagapamati.”—Luc. 8:18.

3. Paano naton bug-os nga mapanginpuslan ang programa?

³ Iaplikar ang Inyo Matun-an: Ang kinaandan nga mabatian pagkatapos sang asembleya amo, “Kanami gid sang programa!” Matuod gid ini, bangod isa ini sa madamo nga aman ni Jehova. (Hulu. 10:22) Agod mangin mapuslanon ang mga impormasyon, kinahanglan nga pamalandungan ninyo ini kag dumdumon. (Luc. 8:15) Kaliti ang tion sang inyo pagpauli pagkatapos sang asembleya sa pagbinagbinag sang programa upod sa inyo pamilya ukon mga kaupod sa salakyan. Binagbinaga ang mga tulumuron kag mga punto sang kada isa nga makabulig sa inyo pagministeryo. Makabulig ini sa inyo agod indi madali malimtan ang impormasyon pagkatapos sang asembleya.—Sant. 1:25.

4. Ngaa mangin pinasahi gid ini nga asembleya para sa aton?

⁴ Nagabatyag kita pirme nga espesyal kita kon hatagan kita sing regalo nga kinahanglan gid naton. Nalangkag bala kita sa iaman ni Jehova sa aton sa masunod nga adlaw sang pinasahi nga asembleya? Makasiguro gid kita nga mapanginpuslan naton ini. Makapat-od man kita nga makabaton kita sing nagakaigo nga regalo gikan sa aton langitnon nga Amay nga si Jehova. Ginahimo niya ini paagi sa pagpalig-on kag paghanas sa aton agod matuman naton ang hilikuton nga gintangdo niya sa aton.—2 Tim. 4:2; Sant. 1:17.