“Magmainit sa Espiritu”
1. Ano nga mga kinaiya ang dapat naton ipakita sa aton pagbantala?
1 Ang tanan nga bahin sang aton Cristiano nga pag-alagad dapat padayon nga nagauswag. Gani, ginapalig-on kita nga “magmainit sa espiritu” kag “magpaulipon kay Jehova.” (Roma 12:11) Apang, madamo nga butang ang mahimo magpaluya sa aton kakugi sa pagministeryo. Paano naton ‘mapadabdab kaangay sang kalayo’ ang aton kakugi kag kapagsik sa aton pag-alagad?—2 Tim. 1:6, 7.
2. Ano ang kaangtanan sang personal nga pagtuon sa Biblia sa kakugi sa ministeryo?
2 Personal nga Pagtuon sa Biblia: Ang isa ka epektibo nga manugbantala sang Ginharian nagahigugma gid sa kasuguan sang Dios kag nagaaplikar sini. (Sal. 119:97) Kon may matun-an kita nga kamatuoran sa Biblia sa tion sang aton personal nga pagtuon, nagapalig-on ini sa aton kag nagapabaskog sa aton kakugi. Ang aton gugma sa Manug-aman sini nga kamatuoran kag ang aton handum nga ipaambit ang maayong balita sa iban, nagapahulag sa aton nga dayawon ang Dios kag ipahayag ang iya ngalan. (Heb. 13:15) Maathag nga ang makugi nga pagbantala sang maayong balita nagapakita sang aton pagpabalor sa kapuslanan sini.
3. Paano kita mabuligan sang balaan nga espiritu sang Dios sa aton pagministeryo?
3 Mangabay sing Espiritu sang Dios: Indi kita magmadinalag-on sa aton ministeryo kon paagi lamang sa aton kaugalingon. Ang matuod nga kakugi nagagikan sa tayuyon nga pagpasagahay sang espiritu sang Dios. (1 Ped. 4:11) Ang pagpakigsuod sa Ginahalinan sang “gahum” magahatag sa aton sing kaisog sa espirituwal agod makapanaksi kita nga may kasidla. (Isa. 40:26, 29-31) Sang nagaatubang sing mga kabudlayan si apostol Pablo sa iya pagministeryo, ‘natigayon niya ang bulig nga gikan sa Dios.’ (Binu. 26:21, 22) Ang makapabakod nga balaan nga espiritu ni Jehova magabulig sa aton nga magmainit sa aton ministeryo, gani dapat naton ini pangabayon.—Luc. 11:9-13.
4. Ano ang mahimo mangin resulta sang aton kakugi, apang ano ang dapat naton dumdumon?
4 Ang aton kakugi sa pagbantala sang Ginharian masami nga nagabulig nga mangin makugi man ang aton masigka-Cristiano. (2 Cor. 9:2) Ginabaton sang mga tawo ang aton mensahe kon ginapresentar naton ini nga may kapagsik kag kombiksion. Apang, ang kakugi dapat pirme updan sing pagkamataktikanhon kag kalulo. (Tit. 3:2) Sa tanan nga tion, padunggan naton ang tagbalay kag tahuron ang iya kahilwayan sa pagpili.
5. Anong inspirado nga laygay ang dapat naton sundon?
5 Subong mga manugbantala sang Ginharian, kabay nga pirme kita “magmainit sa espiritu.” Palambuon naton ang kakugi paagi sa personal nga pagtuon sa Biblia kag hanuot nga pangamuyo kay Jehova, ang nagahatag sing gahom paagi sa iya balaan nga espiritu. Pat-od gid nga matuman naton sing makugihon ang aton ministeryo “paagi sa balaan nga espiritu kag malig-on nga pagsalig.”—1 Tes. 1:5.