Mangin Masako sa Pagbantala!
1. Ano nga laygay ni Pablo ang nagakaigo nga talupangdon naton?
1 “Ibantala ang pulong, mangin masako sa sini.” (2 Tim. 4:2) Ngaa importante ang laygay ni Pablo sa aton adlaw? Paano ini nga pinamulong makaapektar sa aton kag sa iban?
2. Ngaa dapat kita mag-ukod sa pagpangita sa mga wala pa makabati sang maayong balita?
2 Kabuhi ang Nadalahig: Minilyon nga tawo sa bug-os nga kalibutan ang wala pa makabati sang maayong balita nga makaluwas sa ila. (Roma 10:13-15; 1 Tim. 4:16) Madamo pa nga interesado ang masapwan sa teritoryo nga pirme nabantalaan. Kon magbantala kita sa iban nga adlaw ukon oras, mahimo kita makasapo sing iban nga tawo. Paagi sa maukod nga pagpangita, mangin matinlo ang aton konsiensia kag wala kita sing kasal-anan sa dugo.—Binu. 20:26.
3. Paano naton magamit sing maalamon ang aton tion sa pagministeryo?
3 Bisan pa sa mapintas nga paghingabot, ang mga Cristiano sang unang siglo ‘nagpuno sang Jerusalem sang ila panudlo.’ (Binu. 5:28) Determinado man bala kita nga “magpanaksi sing maid-id”? (Binu. 10:42) Kon nagaministeryo, ginagamit bala naton sing maalamon ang aton tion? Kon nagahimo kita sing kahimusan sang grupo nga pagduaw liwat, ginakalitan bala naton ang tion paagi sa pagbantala sa mga nagalabay samtang nagahulat sa iban?
4. Paano ang masako nga pagbantala magabulig sa aton nga makapadayon sa pagbantay?
4 Nagapaalisto Pa Gid sa Aton: Bangod malapit na ang katapusan sining sistema sang mga butang, kinahanglan nga magpabilin kita nga alisto kag padayon nga nagabantay. (1 Tes. 5:1-6) Kon regular naton nga ginasugid ang paglaum parte sa Ginharian, malikawan naton ang kabug-atan sa sining sistema sang mga butang. (Luc. 21:34-36) Bangod sini, mapahulag kita nga makigbahin sing dugang pa sa nagaluwas kabuhi nga hilikuton samtang “ginadumdom” pirme ang adlaw ni Jehova.—2 Ped. 3:11, 12.
5. Paano ang pagtahod sa kabuhi nagapahulag sa aton sa pagministeryo?
5 Kon masako kita sa pagbantala, ginapakita naton ang pagtamod ni Jehova sa kabuhi: “Indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.” (2 Ped. 3:9; Ezeq. 33:11) Kabay pa nga mangin determinado kita nga istoryahon ang madamo nga tawo sa aton teritoryo tubtob sa aton masarangan. Ginahimo naton ini tanan para sa kadayawan ni Jehova!—Sal. 109:30.