Bulig Para sa Pagpanaksi sa Telepono

Bisan pa ang pagpamalaybalay amo ang aton prioridad sa pagbantala, ang pagpanaksi sa telepono epektibo man nga paagi para ipalapnag ang maayong balita sa mga teritoryo sang kongregasyon, ilabi na sa mga lugar nga indi makadtuan ang mga pamalay.—Luc. 10:5-7; Binu. 5:42; 20:20.

Ini nga porma sang ministeryo makabulig gid sa mga utod nga indi makalakat kag nagatener lang sa ila puluy-an. Kon updan sila sang iban nga kauturan sa pagpanaksi sa telepono, makapalig-unay gid sila. (Roma 1:11, 12) Nagakaigo man ini kon malain ang tiempo. Mas maayo nga diutay lang ang kadamuon sa grupo para ang tanan makapakigbahin gid.

May mga panugda sa pahina 5-6 nga makabulig sa aton sa pagpanaksi sa telepono. Puede mo sulatan ang blangko sing mga presentasyon nga epektibo sa inyo teritoryo ukon sing mga naandan mo na nga gamiton. Mahimo mo ipaseroks ang panugda kag amo ini ang imo sulatan. Mas maayo kon ara ini sa lamesa samtang nagapanaksi ka sa telepono.

Ano pa ang imo kinahanglan sa pagpanaksi sa telepono? Repasuha ini nga listahan kon nagahanda ka.

◼ Kaugalingon nga Biblia

◼ Reasoning From the Scriptures

◼ Good News for People of All Nations

◼ Ano Gid ang Ginatudlo Sang Biblia?

◼ Bag-o nga mga magasin kag Ang Aton Ministeryo sa Ginharian

◼ Lainlain nga tract kag brosyur

◼ Mga handbill

◼ House-to-house record kag lapis ukon bolpen

TIPIGI

MGA PANUGDA SA PAGPANAKSI SA TELEPONO

DUMDUMA INI NGA MGA PUNTO:

◼ Relaks lang kag mangin natural. Mangin matinahuron, mapinasensiahon, kag mainabyanon.

◼ Maghambal sing malagday, mahalungon, kag sa iguigo nga kabaskugon.

◼ Magyuhum kag magkumpas nga daw pareho lang nga ara sa atubangan mo ang imo kaistorya.

◼ Likawi ang indi kinahanglanon nga pagdulogdulog.

◼ Paistoryaha ang tagbalay, kag pasalamati sia sa iya mga sabat.

◼ Kon mamangkot sia, sulita ini para mabuligan ka sang imo upod nga makit-an ang sabat sa Biblia, Reasoning nga libro, ukon sa iban pa nga publikasyon. (Mas maayo kon indi mo paggamiton ang speakerphone.)

◼ Indi paghinambiti ang parte sa donasyon, kay basi maghunahuna sia nga nagapangayukayo ka. Sa nagakaigo nga tion kon magkit-anay na kamo, mahimo mo sia silingon nga ang aton hilikuton ginasuportahan sang boluntaryo nga mga donasyon.

MGA INTRODUKSION

◼ “Hello. Ako si . . . Nagtawag ako kay indi ako makapakig-istorya sa imo sing personal. Lapit man lang ang amon balay sa imo ginaistaran. [Mahimo mo isugid ang imo adres.] Gusto ko mahibaluan ang imo opinyon parte sa . . . ”

◼ “Hello. Ako si . . . Ginabuligan ko ang akon mga kaingod nga masabat ang ila mga pamangkot parte sa Biblia. May ginahunahuna ka bala nga pamangkot parte sa Biblia . . . ?”

◼ “Hello. Ako si . . . Wala ako sing may ginabaligya; isa ako sa mga kaingod mo, diri sa . . . Madamo sa mga kaingod naton ang nabalaka parte sa . . . ” [Hinambiti ang bag-o nga balita nga ginakabalak-an sa inyo lugar.]

◼ [Isulat ang imo paagi.]

[Ipadayon ang imo presentasyon. Mahimo mo basahon ang panugda sa Reasoning nga libro, Ang Aton Ministeryo sa Ginharian, ukon maghanda sang imo kaugalingon nga presentasyon.]

◼ [Isulat ang imo paagi.]

Pagtanyag sang pagtuon sa Biblia sa una nga pagtawag:

◼ “Hello. Ako si . . . Isa ako sa imo mga kaingod diri sa . . . Nagtawag ako kay nagatanyag kami sang libre nga pagtuon sa Biblia kag may bakante pa ang akon iskedyul. Amo ini ang pila sa mga topiko nga aton istoryahan halin sa imo Biblia. [Basaha ang duha ukon tatlo ka tig-ulo sang mga kapitulo sang libro nga Ginatudlo Sang Biblia.] Diin sa sini ang nanamian mo gid? [Tuguti sia nga magsabat.] Ang ginbasa ko kaina, tig-ulo sang mga kapitulo sang libro nga Ano Gid ang Ginatudlo Sang Biblia? Gusto mo idul-ong ko sa imo ang isa ka kopya sini nga libro? Wala ini sing bayad.”

Kon nagapangalag-ag ang tagbalay, mahimo ka magsiling:

◼ “Ti puede ko ikaw tawgan liwat bisan kadali lang para istoryahan kon ano gid ang ginatudlo sang Biblia parte sa topiko nga nanamian mo? Amo ni oras OK lang sa imo?”

◼ [Isulat ang imo paagi.]

Kon magsiling ang tagbalay . . .

“SIN-O ANG GINAREPRESENTAR NINYO?”

◼ “Isa ako sa mga Saksi ni Jehova,” kag ipadayon ang imo presentasyon.

“PAANO MO NAKUHA ANG NUMBER KO?”

◼ “Sa directory,” kag ipadayon ang imo presentasyon.

“ANG AKON NGALAN ARA SA DO-NOT-CALL LIST.”

◼ “Wala ako nagabaligya gani wala ako sina nga listahan,” kag ipadayon ang imo presentasyon.

Kon indi gusto ang tagbalay nga tawgan sia liwat sang mga Saksi ni Jehova . . .

◼ “Sige a, ginarespeto namon ang imo gusto,” kag indi na pag-ipadayon ang imo presentasyon. [Ilista dayon ang iya ngalan kag ang petsa sang imo pagtawag kag ibutang ini sa sobre sang inyo teritoryo.]

Kon answering machine ang magsabat . . .

◼ “Ako si . . . , nagtawag ako kay nagahimo kami sing public service para buligan ang mga tawo nga masabat ang ila mga pamangkot parte sa Biblia. Matawag lang ako liwat.”

◼ [Isulat ang imo paagi.]

MGA KONKLUSION:

◼ “May publikasyon ako nga gusto ipakita sa imo. Nagahatag ini sing dugang nga impormasyon parte sa topiko nga aton ginaistoryahan. Puede ko bala ini idul-ong sa inyo? Wala ini sing bayad.”

◼ “Nalipay gid ako nga nakaistoryahanay ta. Puede ayhan makabisita kami (sang akon bana/asawa) sa inyo balay para istoryahan ta sing dugang pa ang parte sini? Puede namon sabton ang pamangkot nga: ․․․․․.”

◼ “Nasadyahan gid ako sang pag-istoryahanay ta. Sa sunod ko nga pagtawag, binagbinagon naton ang sabat sang Biblia sa sini nga pamangkot: ․․․․․. OK lang nga amo ni nga oras ako matawag?”

◼ [Isulat ang imo paagi.]

Kon nagapangalag-ag sia nga magbisita ka sa iya, puede ka magsiling:

◼ “Kon gusto mo ipadala ko na lang ini sa imo.”

◼ “Tawgan ta na lang ka liwat para mapadayon ta ang pag-istoryahanay. OK lang nga amo ni oras ako matawag?”

◼ [Isulat ang imo paagi.]