Kon Ano ang Isiling Tuhoy sa mga Magasin

Ang Lalantawan Hulyo 1

“Madamo sa aton ang indi makahibalo kon ano ang isiling sa aton abyan nga may malubha nga balatian. Sa banta mo, makabulig bala ini nga laygay? [Basaha ang Santiago 1:19. Nian tuguti sia sa pagsabat.] Ini nga artikulo nagahatag sing praktikal nga mga panugda nga pasad sa mga prinsipio sa Biblia.” Ipakita ang artikulo sa pahina 10.

Magmata! Hulyo

“Dapat bala ordenahan ang mga babayi subong mga ministro? [Tuguti sia sa pagsabat.] Yari ang ginsiling sang Biblia parte sa isa ka babayi. [Basaha ang Roma 16:1.] Pero, nagsiling man ang isa pa ka teksto nga dapat maghipos ang mga babayi sa kongregasyon. Gani, ano ang pagtamod sang Biblia sa sini? Ginapaathag ina sa sini nga artikulo.” Ipakita ang artikulo sa pahina 28.

Ang Lalantawan Agosto 1

“Madamo nga tawo ang nahadlok nga basi malaglag ang duta paagi sa paglupok sang mga bomba ukon pagbag-o sang klima. Sa banta mo matabo bala ina? [Tuguti sia sa pagsabat.] Talupangda kon ano ang ginasiling sang Biblia sa sini. [Basaha ang Bugna 11:18.] Ginasabat sini nga magasin ang apat ka kinaandan nga pamangkot parte sa kalaglagan sang kalibutan.”

Magmata! Agosto

“Mahimo nga nasugilanon ka na sang isa sa mga Saksi ni Jehova sang una. Natingala ka bala kon ngaa nagapamalaybalay kami, ilabi na kay kalabanan sang mga tawo indi man interesado? [Tuguti sia sa pagsabat. Nian basaha ang Mateo 24:14.] Nahibaluan namon nga madamo ang may sayop nga pagpati parte sa amon. Ginapaathag sini nga magasin kon sin-o gid ang mga Saksi ni Jehova.”